ຄະນະພັກຮາກຖານ ກອງບັນຊາການ ປກສ ເມືອງອຸທຸມພອນ ສັງເກດຄືນກ່ຽວກັບຜົນງານການເຄື່ອນໄຫວຊີ້ນຳ ນຳພາໃນໄລຍະຜ່ານມາ.
ສະຫາຍ ພັນໂທ ສວນ ໄຊຍະລິນ ຮອງເລຂາພັກຮາກຖານ ກອງບັນຊາການ ປກສ ເມືອງ ກໍ່ໄດ້ສະຫຼຸບສັງເກດຕີລາຄາວ່າ: ທົ່ວຮາກຖານພັກມີ 5 ໜ່ວຍຂື້ນກັບ. ມີສະມາຊິກພັກທັງໝົດ 109 ສະຫາຍ, ຍິງ 25 ສະຫາຍ, ສຳຮອງ 11 ສະຫາຍ, ຍິງ 4 ສະຫາຍ ແລະ ຄະນະພັກຮາກຖານມີ 7 ສະຫາຍ.

ຕະຫຼອດໄລຍະຜ່ານມາ ຄະນະພັກ-ຄະນະບັນຊາ ໄດ້ເລັ່ງໃສ່ຄວາມເປັນລະບຽບ ຮຽບຮ້ອຍຂອງສັງຄົມ ໂດຍຕິດພັນກັບການຫັນທິດລົງຮາກຖານກຸ່ມບ້ານ, ກຳແໜ້ນບັນດາເປົ້າໝາຍຕ່າງໆທີ່ເຂົ້າມາເຄື່ອນໄຫວພາຍໃນ ເມືອງ ໂດຍສະເພາະເລັ່ງໃສ່ເປົ້າໝາຍທາງດ້ານການເມືອງ, ເປົ້າໝາຍຄົນຕ່າງປະເທດທີ່ເຂົ້າມາເຄື່ອນໄຫວພັກເຊົາ, ເຮັດທຸລະກິດ, ຄ້າຂາຍ, ທ່ອງທ່ຽວ, ຢ້ຽມຢາມ, ສາມາດເກັບກຳໄດ້ເປົ້າໝາຍສົງໃສຈາກຕ່າງປະເທດ ທີ່ເຂົ້າມາເຄື່ອນໄຫວລວມມີ 7 ປະເທດ., 8 ອົງການ, ບໍລິສັດຂອງຄົນລາວ ແລະ ຄົນຕ່າງປະເທດ, ເອົາໃຈໃສ່ກວດກາຄຸ້ມຄອງຄົນເຂົ້າ-ອອກເມືອງ.
ນອກຈາກນີ້ ທາງເຈົ້າໜ້າທີ່ ຍັງເອົາໃຈໃສ່ຕິດຕາມຕໍ່ກັບກຸ່ມຄົນບໍ່ດີ ທີ່ເຂົ້າມາເຄື່ອນໄຫວ ໂຄສະນາສ້າງຄວາມປັ່ນປ່ວນ, ສ້າງຄວາມແຕກແຍກ, ໃສ່ຮ້າຍປ້າຍສີຕໍ່ການນຳພາຂອງພັກ-ລັດ, ສິ່ງໜື່ງອີກ ກໍ່ແມ່ນບັນຫາການເຄື່ອນໄຫວສວຍໃຊ້ສາສະໜາຕ່າງປະເທດ ເປັນສາກບັງໜ້າ ຜ່ານມາ ກໍ່ປະກົດເຫັນການເຄື່ອນໄຫວທີ່ບໍ່ຖືກຕ້ອງ ເປັນຕົ້ນການສ້າງໂບດ ທີ່ບໍ່ໄດ້ຮັບອະນຸຍາດ, ການເຕົ້າລວມບໍ່ຖືກສະຖານທີ່ ອັນສ້າງຄວາມຫຍຸ້ງຍາກໃຫ້ແກ່ການຄຸ້ມຄອງຂອງອຳນາດການປົກຄອງທ້ອງຖິ່ນ ແລະ ວຽກງານດ້ານອື່ນໆກໍ່ໄດ້ເອົາໃຈໃສ່ເຊັ່ນດຽວກັນ.
ທ່ານ ພັນໂທ ສວນ ໄຊຍະລິນ ຍັງເວົ້າອີກວ່າ:

ນອກຈາກຜົນງານທີ່ພົ້ນເດັ່ນຫຼາຍດ້ານກໍ່ຕາມ ແຕ່ກໍ່ບໍ່ສາມາດປະສະຈາກໄດ້ສິ່ງທີ່ມີຂໍ້ຄົງຄ້າງຕ່າງໆ ບໍ່ວ່າຈະເປັນການເຊື່ອມຊືມກຳແໜ້ນແນວທາງນະໂຍບາຍຂອງ ພັກ-ລັດ ຍັງບໍ່ທັນເລິກເຊິ່ງເທົ່າທີ່ຄວນ, ສະພາບແວດ ລ້ອມຂອງສັງຄົມມີຫຼາຍບັນຫາກາຍເປັນສິ່ງທ້າທາຍ, ທົດສອບ ແລະ ສົ່ງຜົນກະທົບ ໂດຍທາງກົງ-ທາງອ້ອມຕໍ່ການນຳພາ ດ້ານຄຸນທາດການເມືອງບໍ່ທັນໜັກແໜ້ນ ເຫັນແຕ່ຜົນປະໂຫຍດສ່ວນຕົວສູງກວ່າສ່ວນລວມ ຈິ່ງເຮັດໃຫ້ຄວາມຮັບຜິດຊອບຕໍ່ໜ້າທີ່ວຽກງານບໍ່ທັນສູງ.
ຈາກນັ້ນ ບັນດາສະຫາຍຄະນະໜ່ວຍພັກແຕ່ລະໜ່ວຍທີ່ເຂົ້າຮ່ວມ ກໍ່ຍັງໄດ້ປະກອບຄຳຄິດເຫັນ ໃນການເຄື່ອນໄຫວວຽກງານວິຊາສະເພາະ ທີ່ພົບພໍ້ກັບບັນຫາ ແລະ ສິ່ງທີ່ອຳນວຍຄວາມສະດວກ, ຫຍຸ້ງຍາກຕ່າງໆ.
ໂອກາດນີ້ ທ່ານ ໂພໄຊ ອິນທະວົງສາ ຄະນະປະຈຳພັກເມືອງ ກໍ່ໄດ້ນຳພາຄົ້ນຄວ້າເຊື່ອມຊືມເອກະສານ ກ່ຽວກັບການດຳເນີນຊີວິດການເມືອງ ເພື່ອກ້າວສູ່ກອງປະຊຸມໃຫຍ່ 3 ຂັ້ນ, ຜ່ານບົດແນະນຳ ກ່ຽວກັບການນຳໃຊ້ເອກະສານ ສຶກສາອົບຮົມການເມືອງແນວຄິດ ເພື່ອກຽມກອງປະຊຸມໃຫຍ່ 3 ຂັ້ນຂອງພັກ ແລະ ເອກະສານອື່ນໆ.
ໂອກາດເຂົ້າຮ່ວມ ທ່ານ ປະສົງສິນ ຈະເລີນສຸກ ເລຂາພັກເມືອງ ເຈົ້າເມືອງໆອຸທຸມພອນ ກໍ່ໄດ້ໃຫ້ກຽດມີຄຳເຫັນໂອ້ລົມ ພ້ອມທັງຮຽກຮ້ອງໃຫ້ທຸກສະຫາຍພາຍໃນພັກ ຈົ່ງໄດ້ພ້ອມກັນຮັກສາ ຄວາມສາມັກຄີພາຍໃນກົມກອງໃຫ້ເປັນປຶກແຜ່ນ, ແຕ່ຖ້າຂາດຄວາມສາມັກຄີ ເຮັດວຽກຫຍັງ ກໍ່ຍາກທີ່ຈະປະສົບຜົນສຳເລັດ, ທຸກຄົນຕ້ອງຊ່ວຍເຫຼືອເຊິ່ງກັນ ແລະ ກັນ, ຖືເອົາການຕຳນິສົ່ງຂ່າວໃຫ້ກັນ ແລະ ກັນ ເປັນບ່ອນກໍ່ສ້າງກັນ.
ເຊິ່ງກອງປະຊຸມແມ່ນໄດ້ຈັດຂຶ້ນໃນ ວັນທີ 18 ກັນຍາ 2019 ທີ່ສະໂມສອນຂອງ ເມືອງອຸທຸມພອນ. ໂດຍການເຂົ້າຮ່ວມເປັນປະທານຂອງ ທ່ານ ປະສົງສິນ ຈະເລີນສຸກ ເລຂາພັກເມືອງ ເຈົ້າເມືອງໆອຸທຸມພອນ, ທ່ານ ໂພໄຊ ອິນທະວົງສາ ຄະນະປະຈຳພັກເມືອງ ຮອງເຈົ້າເມືອງ, ບັນດາທ່ານ ໃນຄະນະພັກ-ຄະນະປົກຄອງເມືອງ, ຄະນະພັກ-ຄະນະບັນຊາ ກອງບັນຊາການ ປກສ ເມືອງ ຕະຫຼອດຮອດ ພະນັກງານນັກຮົບພາຍໃນກົມກອງດັ່ງກ່າວເຂົ້າຮ່ວມ.