ໃນວັນທີ 18 ກັນຍາ 2019 ທີ່ຜ່ານມາ, ທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ພ້ອມຄະນະ ສົມທົບກັບຄະນະ ອພສ ເມືອງອຸທຸມພອນ, ມູນນິທິອາສາຊ່ວຍເຫຼື່ອຜູ້ປະສົບໄພແຂວງ ສະຫວັນນະເຂດ ໜ່ວຍບໍລິການເມືອງອຸທຸມພອນ ໄດ້ນຳເອົາເຄື່ອງຊ່ວຍເຫຼື່ອບັນເທົາທຸກຈຳນວນໜຶ່ງ ໄປມອບໃຫ້ 05 ບ້ານ ຂອງເມືອງຈຳພອນ ແຂວງສະຫວັນນະເຂດ ທີ່ຍັງປະສົບໄພນ້ຳຖ້ວມຄື: ບ້ານເພຍກາ, ແກ້ງປູນ, ວັງເມົາ, ລຳເທນ ແລະ ລຳບ໋ອງ. ສຳລັບເຄື່ອງທີ່ນຳໄປມອບໃນຄັ້ງນີ້ ປະກອບມີ: ເຂົ້າສານ, ໝີ່, ປະກະປ໋ອງ, ເຂົ້າໜົມ, ນ້ຳດື່ມ, ສາດ, ເຊື່ອ, ໝອນ, ເຄື່ອງນຸ່ງຮົ່ມ ແລະ ເງິນຈຳນວນໜຶ່ງ. ລວມມູນຄ່າທັງໝົດ 28 ລ້ານ 5 ແສນກວ່າກີບ. ໃຫ້ກຽດມອບເຄື່ອງດັ່ງກ່າວໂດຍ ທ່ານ ປະສົງສິນ ຈະເລີນສຸກ ເຈົ້າເມືອງໆອຸທຸມພອນ ແລະ ໃຫ້ກຽດກ່າວຮັບ ຕາງໜ້າໃຫ້ 05 ບ້ານດັ່ງກ່າວໂດຍ ທ່ານ ຄຳລຸຍ ຍາດຕິວົງ ເຈົ້າເມືອງໆຈຳພອນ. ເຊິ່ງມີບັນດາທ່ານ ຫົວໜ້າຫ້ອງການ, ຄະນະຫ້ອງການ ແລະ ພາກສ່ວນກ່ຽວຂ້ອງເຂົ້າຮ່ວມເປັນສັກຂີພິຍານ.

ຕາມການລາຍງານຂອງຄະນະກຳມະການເຝົ້າລະວັງໄພພິບັດເມືອງຈຳພອນ ໄດ້ໃຫ້ຮູ້ວ່າ: ໃນໄລຍະຜ່ານມາ ກໍ່ມີຫຼາຍພາກສ່ວນເຂົ້າມາຊ່ວຍເຫຼືອ ແລະ ມອບເຄື່ອງໃຫ້ຜູ້ຖືກຜົນກະທົບຈາກໄພນ້ຳຖ້ວມ ຢູ່ເມືອງຈຳພອນ ໃນບາງບ້ານ ແຕ່ໃນຈຳນວນ 05 ບ້ານດັ່ງກ່າວ ມີບ້ານທີ່ຫ່າງໄກ່ຊອກຫຼີກ ເສັ່ນທາງຖືກຕັດຂາດ ບໍ່ສາມາດສັນຈອນໄປ-ມາໄດ້, ການເຂົ້າເຖິງປະຊາຊົນຜູ້ປະສົບໄພພົບຄວາມຫຍຸ້ງຍາກ, ປະຊາຊົນຫຼາຍຄອບຄົວ ໄດ້ຮັບຜົນກະທົບ ເຊັ່ນ: ບ້ານເພຍກາ ມີ 105 ຄອບຄົວ, ແກ້ງປູນ 92 ຄອບຄົວ, ວັງເມົາ 97 ຄອບຄົວ, ລຳເທນ 111 ຄອບຄົວ ແລະ ລຳບ໋ອງ 221 ຄອບຄົວ.
ຕໍ່ກັບສະພາບການດັ່ງກ່າວ ທາງຄະນະການນຳຂອງເມືອງອຸທຸມພອນ ກໍ່ໄດ້ສະແດງຄວາມເປັນຫ່ວງເປັນໃຍ ມາຍັງບັນດາຜູ້ປະສົບໄພ ກໍ່ຄືຜູ້ຖືກຜົນກະທົບຈາກໄພນ້ຳຖ້ວມ ແລະ ພ້ອມທັງຢັ້ງຢືນວ່າ ຈະສືບຕໍ່ປຸກລະດົມ ພໍ່ແມ່ປະຊາຊົນ ກໍ່ຄືຊາວເມືອງອຸທຸມພອນ ເພື່ອຂໍລະດົມການປະກອບສ່ວນ ຊ່ວຍເຫຼືອທາງດ້ານທຶນຮອນ ແລະ ວັດຖຸສິ່ງຂອງ ໃຫ້ກັບຜູ້ປະສົບໄພນ້ຳຖ້ວມຈົນກວ່າສະພາບຈະກັບມາເປັນປົກກະຕິ.

ນັກຂ່າວເມືອງອຸທຸມພອນ
ພອນປະເສີດ ແຜນພັກດີ