ໃນວັນທີ່ 19 ກັນຍາ 2019, ທີ່ສະໂມສອນຂອງເມືອງຫລາ, ແຂວງອຸດົມໄຊ, ກອງປະຊຸມໃຫຍ່ຜູ້ແທນອົງຄະນະພັກຫລາ ຄັ້ງທີ່ XI ໄດ້ເປີດຂື້ນຢ່າງເປັນທາງການ, ໂດຍການເປັນປະທານຂອງສະຫາຍ ຫຸມພັນ ບຸບຜາຄຳ ເລຂາພັກເມືອງ ເຈົ້າເມືອງໆຫລາ ເປັນກຽດເຂົ້າຮ່ວມຂອງ ສະຫາຍ ປອ ຄຳພັນ ເຜີຍຍະວົງ, ກຳມະການສູນກາງພັກເລຂາຄະນະບໍລິຫານງານພັກແຂວງ ເຈົ້າແຂວງໆອຸດົມໄຊ,ສະຫາຍ ວັນໄຊ ຟອງສະຫວັນ ຮອງເລຂາຄະນະພັກ ຮອງຫົວໜ້າຄະນະຈັດຕັ້ງສູນກາງພັກ ມີຄະນະປະຈຳພັກແຂວງ, ກຳມະການພັກແຂວງ, ຮອງເລຂາພັກເມືອງ, ຄະນະປະຈຳພັກເມືອງ, ກຳມະການພັກເມືອງ, ພະນັກງານອາວຸໂສບຳນານອະດິດການນຳເມືອງ, ຜູ້ແທນສົມບູນທີ່ມາຈາກຄະນະພັກຮາກຖານແລະໜ່ວຍພັກທົ່ວເມືອງຫລາ, ແຂກຮັບເຊີນທີ່ມາຈາກຂັ້ນແຂວງ ແລະ ບັນດາເມືອງຂອງແຂວງ ອຸດົມໄຊ, ເມືອງຂວາແຂວງຜົ້ງສາລີ, ເມືອງນ້ຳບາກ ແຂວງຫລວງພະບາງ ເຂົ້າຮ່ວມ.

ໃນພິທີ, ສະຫາຍ ຫຸມພັນ ບຸບຜາຄຳ, ເລຂາຄະນະບໍລິຫານງານພັກເມືອງໆຫລາ ໄດ້ກ່າວເປີດກອງປະຊຸມຢ່າງເປັນທາງການ ພ້ອມທັງ ຜ່ານຮ່າງບົດລາຍງານການເມືອງ ກອງປະຊຸມໃຫຍ່ຜູ້ແທນອົງຄະນະພັກເມືອງຫລາ ຄັ້ງທີ່ XI ໄດ້ເປີດຂື້ນ ເພື່ອພ້ອມກັນທົບທວນຕີລາຄາຄືນກ່ຽວກັບການຈັດຕັ້ງປະຕິບັດແນວທາງປ່ຽນແປງໃໝ່ຮອບດ້ານທີ່ມີຫລັກການຂອງພັກ ກໍ່ຄືການຈັດຕັ້ງປະຕິບັດເນື້ອໃນຈິດໃຈມະຕິກອງປະຊຸມໃຫຍ່ຂອງອົງຄະນະພັກເມືອງດ້ານຕັ້ງໜ້າ, ຂໍ້ຂາດຕົກບົກຜ່ອງ ແລະ ບົດຮຽນທີ່ຖອດຖອນໄດ້ຢ່າງພາວະວິໄສ ພ້ອມດຽວກັນນັ້ນຈະໄດ້ພ້ອມກັນກຳນົດທິດທາງ ໜ້າທີ່ໃນ 5 ປີຕໍ່ຫນ້າ. ແຕ່ນີ້ຮອດປີ 2024 ບັນຫາສຳຄັນຜູ້ແທນກອງປະຊຸມໃຫຍ່ ຈະໄດ້ພ້ອມກັນເລືອກຕັ້ງເອົາຄະນະບໍລິຫານງານພັກເມືອງຊຸດໃຫມ່ທີ່ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ ມີຄວາມຮັບຜິດຊອບຕໍ່ຫນ້າທີ່ການເມືອງ ເພື່ອແບກຫາບຄວາມຮັບຜິດຊອບໜ້າທີ່ການເມືອງໃນການຕັ້ງຫນ້າປະຕິບັດແນວທາງປ່ຽນແປງໃຫມ່ຮອບດ້ານທີມີຫຼັກການຂອງພັກ, ເອົາໃຈໃສ່ “ ຍົກສູງຄວາມ ສາມາດນໍາພາ, ສຸມທຸກກໍາລັງແຮງ ສູ້ຊົນພັດທະນາເມືອງຫຼາ ໃຫ້ມີການຫັນປ່ຽນຢ່າງຕັ້ງຫນ້າໃນທຸກດ້ານ, ຕາມທິດຢືນຢົງ, ສີຂຽວ ແລະ ເປັນມິດກັບສິ່ງແວດລ້ອມ ” ເອົາໃຈໃສ່ພັດທະນາເມືອງຫຼາໃຫ້ໄປຕາມ 4 ໃຈກາງຂອງແຂວງເຊັ່ນ:

ດ້ານປ້ອງກັນຊາດ-ປ້ອງ ກັນຄວາມສະຫງົບ, ດ້ານເສດຖະກິດ, ດ້ານວັດທະນະທໍາ-ສັງຄົມ ແລະ ດ້ານການບໍລິການ-ທ່ອງທ່ຽວ. ຕັ້ງຫນ້າຫັນລົງກໍ່ສ້າງຮາກຖານການເມືອງ ແລະ ພັດທະນາຊົນນະບົດຮອບດ້ານ, ພັດທະນາຈຸດສຸມໃນຊົນນະບົດໃຫ້ມີການຫັນປ່ຽນ, ຈັດຕັ້ງປະຕິບັດທຸກວຽກງານໃຫ້ໄປຕາມທິດສາມສ້າງໃຫ້ສໍາເລັດ ຕາມຄາດຫມາຍ.

ກອງປະຊຸມໃຫຍ່ຜູູ້ແທນອົງຄະນະພັກເມືອງຫລາຄັ້ງທີ 11 ມີຜູ້ແທນສົມບູນເຂົ້າຮ່ວມ 87 ສະຫາຍ ຍິງ 2 ສະຫາຍທີ່ເປັນຕົວແທນໃຫ້ແກ່ສະມາຊິກພັກ ທີ່ມາຈາກຄະນະພັກຮາກຖານ, ໜ່ວຍພັກທົ່ວອົງຄະນະພັກເມືອງຫລາ ທັງໝົດ 1,210 ສະຫາຍ ກອງປະຊຸມໃຫຍ່ຜູ້ແທນອົງຄະນະພັກເມືອງຫລາ ຄັ້ງທີ 11 ດຳເນີນເປັນເວລາ 2 ວັນ ຮອດວັນທີ 20 ກັນຍາຈິ່ງສຳເລັດ.