ກອງປະຊຸມປຶກສາຫາລືຄົ້ນຄວ້າປະກອບຄຳຄິດຄຳເຫັນໃສ່ຮ່າງແຜນພັດທະນາເສດຖະກິດສັງຄົມ 5 ປີຄັ້ງທີ VII ແລະ ທິດທາງແຜນການພັດທະນາເສດຖະກິດສັງຄົມ 5 ປີຄັ້ງທີ່ VIII ຮອບສຸດທ້າຍ ຂອງເມືອງພຽງ ໄດ້ຈັດຂື້ນໃນວັນທີ 18 ກັນຍາ 2019 ນີ້ຢູ່ທີ່ຫ້ອງປະຊຸມເມືອງພຽງ ແຂວງໄຊຍະບູລີ, ໂດຍໃຫ້ກຽດເຂົ້າຮ່ວມຂອງ ທ່ານ ເພັງນິລັນ ຄຳພັນເພັງ ຮອງເຈົ້າແຂວງໄຊຍະບູລີ, ມີຄະນະຮັບຜິດຊອບດ້ານອານຸກໍາມະການເນື້້ອໃນຂອງແຂວງ, ຂອງເມືອງເຂົ້າຮ່ວມ.

ຈຸດປະສົງ ກໍ່ເພື່ອເຮັດໃຫ້ເນື້ອໃນຮ່າງແຜນພັດທະນາເສດຖະກິດ-ສັງຄົມ 5 ປີ ຄັ້ງທີ VII ແຕ່ປີ 2014-2019 ແລະ ທິດທາງແຜນການ 5 ປີຄັ້ງທີ VIII ແຕ່ປີ 2020-2024 ຂອງເມືອງພຽງໃຫ້ມີເນື້ອໃນອຸດົມສົມບູນຮັດກຸມ ແລະຊັດເຈນຖືກຕ້ອງຕາມຕົວເລກຄາດໝາຍ ແລະ ສາມາດຮັບຮອງປະຕິບັດໄດ້ເຊັ່ນ: ດ້ານເສດຖະກິດມະຫາພາກ, ການດຸ່ນດ່ຽງ ງົບປະມານ,ການດຸ່ນດ່ຽງທາງດ້ານແຮງງານ ແລະ ສ້າງວຽກເຮັດງານທຳ. ການປະຕິບັດ 8 ມາດຕະການຊຸກຍູ້ເສດຖະກິດ, ການຜະລິດ, ການບໍລິການ, ການຈັດຕັ້ງຜັນຂະຫຍາຍມະຕິ 7 ຂອງກອງປະຊຸມຄົບຄະນະບໍລິຫານງານສູນກາງພັກສະໄໝທີ X , ວຽກງານກະສິກຳປ່າໄມ້, ວຽກງານອຸດສາຫະກຳ ແລະ ການຄ້າ, ວຽກງານພະລັງງານບໍ່ແຮ່, ວຽກງານໂຍທາທິການ ແລະ ຂົນສົ່ງ, ວຽກງານຊັບພະຍາກອນທຳມະຊາດ ແລະ ສິ່ງແວດລ້ອມ, ວຽກງານໄປສະນີໂທລະຄົມ, ວຽກງານວິທະຍາສາດ ແລະ ເຕັກໂນໂລຊີ, ວຽກງານສຶກສາທິການ ແລະ ກິລາ, ວຽກງານສາທາ, ວຽກງານຖະແຫຼງຂ່າວ, ວັດທະນະທຳ ແລະ ທ່ອງທ່ຽວ, ວຽກງານແຮງງານ ແລະ ສະຫວັດດີການ,ວຽກງານພັດທະນາຊົນນະບົດລຶບລ້າງຄວາມທຸກຍາກ, ຂົງເຂດບໍລິຫາານລັດ. ການຈັດຕັ້ງປະຕິບັດເປົ້າໝາຍການພັດທະນາແບບຍືນຍົງ ແລະ ການລົງທຶນເພື່ອການພັດທະນາ ທັງໝົດນັ້ນກໍ່ເພື່ອໃຫ້ເປັນເອກະພາບກັນຖືກຕ້ອງຕາມຄວາມເປັນຈິງ ໃນການຈັດຕັ້ງປະຕິບັດແຕ່ລະຂົງເຂດວຽກງານ ໃນແຕ່ລະປີຜ່ານມາ ເພື່ອກະກຽມຜ່ານໃນກອງປະຊຸມໃຫຍ່ອົງຄະນະພັກເມືອງ ເມືອງພຽງ ຄັ້ງທີ VIII ທີ່ຈະໄຂຂື້ນໃນຕົ້ນອາທິດໜ້ານີ້.

ຂ່າວ: ບຸນທີ.