ກອງປະຊຸມໃຫຍ່ຄັ້ງທີ XII ຂອງອົງຄະນະພັກ ເມືອງຊຳເໜືອແຂວງຫົວພັນ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 19 ກັນຍາ 2019 ນີ້ ທີ່ສະໂມສອນແຂວງ ໂດຍການເປັນປະທານຂອງສະຫາຍ ພຸດພັນ ແກ້ວວົງໄຊ ກຳມະການພັກແຂວງ ເລຂາຄະນະບໍລິຫານງານພັກເມືອງ ເຈົ້າເມືອງຊຳເໜືອ, ເປັນກຽດເຂົ້າຮ່ວມຂອງ ສະຫາຍ ວັນໄຊ ແພງຊຸມມາ ກຳມະການສູນກາງພັກ ເລຂາຄະນະບໍລິຫານງານພັກແຂວງເຈົ້າແຂວງຫົວພັນ, ມີບັນດາສະຫາຍຮອງເລຂາຄະນະບໍລິຫານງານພັກແຂວງ, ຄະນະປະຈຳພັກແຂວງ, ຜູ້ຕ່າງໜ້າຄະນະຈັດຕັ້ງສູນກາງພັກ, ຫ້ອງວ່າການສູນກາງພັກ, ສະຫາຍໃນຄະນະປະຈຳພັກເມືອງ, ກຳມະການພັກເມືອງຊຳ ເໜືອ, ເລຂາຄະນະບໍລິຫານງານພັກເມືອງ 9 ເມືອງທົ່ວແຂວງຫົວພັນ ແລະ ຜູ້ແທນສົມບູນທີ່ເປັນຕົວແທນແກ່ປະຊາຊົນບັນດາເຜົ່າໃນທົ່ວເມືອງຊຳເໜືອເຂົ້າຮ່ວມ 163 ສະຫາຍ, ຍິງ 17 ສະຫາຍ

ກອງປະຊຸມໄດ້ສະຫຼຸບຕີລາຄາຄືນສະພາບການຈັດຕັ້ງປະຕິບັດມະຕິກອງປະຊຸມໃຫຍ່ຄັ້ງທີ XI ຂອງອົງຄະນະພັກເມືອງຊຳເໜືອ 5 ປີຜ່ານມາ ( 2014 – 2019 ) ໃນນີ້ໄດ້ເອົາໃຈໃສ່ວຽກງານປ້ອງກັນຊາດ – ປ້ອງກັນຄວາມສະຫງົບເປັນວຽກງານທີ່ສຳຄັນເຮັດໃຫ້ທົ່ວເມືອງມີສະຖຽນລະພາບທາງດ້ານການ ເມືອງ, ສັງຄົມມີຄວາມສະຫງົບ ຫັ້ນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ ໂຄສະນາເຜີຍແຜ່ແນວທາງປ້ອງກັນຊາດ – ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ແກ່ພະນັກງານສະມາຊິກພັກ, ພະນັກງານລັດຖະກອນ ແລະ ພໍ່ແມ່ປະຊາຊົນບັນດາເຜົ່າໄດ້ຢ່າງທົ່ວເຖິງ;ການພັດທະນາເສດຖະກິດ ແລະ ແກ້ໄຂຄວາມທຸກຍາກໄດ້ສຸມໃສ່ຊີ້ນຳ – ນຳພາການຈັດຕັ້ງປະຕິບັດຕາມທິດທາງ ແລະ ຄາດໝາຍທີ່ມະຕິກອງປະຊຸມໃຫຍ່ຄັ້ງທີ XI ໄດ້ຮັບຮອງ ສຸມໃສ່ສົ່ງເສີມການລົງທຶນຂອງນັກທຸລະກິດທັງພາຍໃນ ແລະ ຕ່າງປະເທດ, ເອົາໃຈໃສ່ກໍ່ສ້າງພື້ນຖານໂຄງລ່າງ ພ້ອມທັງຂຸດຄົ້ນນຳໃຊ້ທ່າແຮງທີ່ມີຂອງແຕ່ລະທ້ອງຖິ່ນ ເພື່ອປະກອບສ່ວນເຂົ້າໃນການພັດທະນາເສດຖະກິດ -ສັງຄົມ ກໍ່ຄືການພັດທະນາແກ້ໄຂຊີວິດການເປັນຢູ່ຂອງປະຊາຊົນເມືອງຊຳເໜືອນັບມື້ດີຂຶ້ນ. ຮອດປະຈຸບັນລວມຍອດຜະລິດຕະພັນໃນ( GDP ) ທົ່ວເມືອງ 5 ປີບັນລຸ 2.114 ຕື້ກວ່າກີບ.

ໃນນີ້ກະສິກຳກວມ 43,60%, ອຸດສາຫະກຳ – ຫັດຖະກຳ 14,07% ແລະ ການຄ້າ – ການບໍລິການ ກວມ 42,33% ຮອດປະຈຸບັນສະເລ່ຍລາຍຮັບໃສ່ພົນລະເມືອງຜູ້ໜຶ່ງໄດ້ 7 ລ້ານກວ່າກີບຕໍ່ຄົນຕໍ່ປີ. ນອກຈາກນີ້ຍັງສຸມໃສ່ນຳພາ – ຊີ້ນຳການພັດທະນາຕາມຂະແໜງການ, ຄຸ້ມຄອງຕິດຕາມບັນດາວິສາຫະກິດທີ່ກຳລັງດຳເນີນການເຄື່ອນໄຫວ ໃຫ້ເຄື່ອນໄຫວຖືກຕ້ອງຕາມລະບຽບກົດ ໝາຍ. ບັນດາພື້ນຖານໂຄງລ່າງຄ່ອຍໆໄດ້ຮັບການພັດທະນາ ແລະ ຍົກລະດັບເປັນກ້າວໆມາເປັນຕົ້ນແມ່ນການປົກປັກຮັກສາເສັ້ນທາງຫຼວງແຫ່ງຊາດ, ທາງຊົນນະບົດ, ການຄຸ້ມຄອງໂຄງການກໍ່ສ້າງ ແລະ ສ້ອມແປງເສັ້ນທາງທີ່ມີແລ້ວ ຍົກລະດັບເສັ້ນທາງດິນແດງທີ່ມີເປັນເສັ້ນທາງປູແຮ່ປະຈຸບັນທົ່ວເມືອງມີເສັ້ນທາງເຂົ້າເຖິງທຸກບ້ານ, ບ້ານທີ່ມີເສັ້ນທາງທຽວໄດ້ສອງລະດູ 68 ບ້ານກວມເອົາ 61,82%; ທົ່ວເມືອງມີຕາຂ່າຍໄຟຟ້າເຂົ້າເຖິງ 107 ບ້ານ ແລະ ມີຄົວເຮືອນຊົມໃຊ້ໄຟຟ້າຕາຂ່າຍກວມ 95,82% ສຸມໃສ່ຂຸດຄົ້ນທຸກແຫຼ່ງລາຍຮັບເຂົ້າງົບປະມານໃຫ້ບັນລຸຕາມຄາດໝາຍ ພ້ອມທັງຄຸ້ມຄອງລາຍຈ່າຍໃຫ້ຖືກຕ້ອງຕາມລະບຽບການ; ການພັດທະນາວຽກງານວັດທະນະທຳ – ສັງຄົມໄດ້ເອົາໃຈໃສ່ຍົກລະດັບຄວາມສາມາດຂອງຄູອາຈານ ແລະ ສຸມໃສ່ການຮຽນ – ການສອນຊັ້ນມໍຕົ້ນບຳລຸງສາມາດປະກາດເປັນເມືອງຈົບຊັ້ນປະຖົມບຳລຸງໃນທົ່ວເມືອງໄດ້, ຂະຫຍາຍໂຮງຮຽນອອກສູ່ເຂດຊົນນະບົດຢ່າງທົ່ວເຖິງ ເຮັດໃຫ້ອັດຕາການເຂົ້າຮຽນສຸດທິຊັ້ນປະຖົມບັນລຸ 99,8%, ຊັ້ນມໍຕົ້ນ 96,5% ແລະ ຊັ້ນມໍປາຍ 68,5%; ຂະຫຍາຍຕາໜ່າງສາທາລະນະສຸກອອກສູ່ຊົນນະບົດ ເຮັດໃຫ້ປະຊາຊົນໄດ້ຮັບການບໍລິການດ້ານສາທາລະນາສຸກຢ່າງທົ່ວເຖິງ.ຄຽງຄູ່ກັນນີ້ຍັງໄດ້ເອົາໃຈໃສ່ປົກປັກຮັກສາ ແລະ ເສີມຂະຫຍາຍມູນເຊື້ອວັດທະ ນະທຳຮີດຄອງປະເພນີອັນດີງາມຂອງເຜົ່າ – ຂອງຊາດໃຫ້ຄົງຢູ່ກັບປະຊາຊົນບັນດາເຜົ່າຕະຫຼອດໄປ.
ກອງປະຊຸມຜູ້ແທນຈະໄດ້ຈະໄດ້ພ້ອມກັນປ່ອນບັດຄັດເລືອກເອົາຄະນະບໍລິຫານງານພັກເມືອງຊຳ ເໜືອຊຸດໃໝ່ໃຫ້ໄດ້ຕາມເປົ້າໝາຍ ແລະ ກອງປະຊຸມຈະດຳເນີນເປັນເວລາ 2 ວັນຈິ່ງສຳເລັດ.

ພາບຂ່າວ: ສົມໝາຍ ສອນສຸພັນ