ໃນຕອນເຊົ້າຂອງວັນທີ 17 ກັນຍາ 2019 ຜ່ານມານິ້ຢູ່ທີ່ຫ້ອງປະຊຸມຊັ້ນສອງຂອງຫ້ອງວ່າການປົກຄອງເມືອງໄຊບູລີ ໄດ້ມີພິທີມອບ-ຮັບໜ້າທີ່ຫົວໜ້າຫ້ອງການການເງິນລະຫວ່າງຜູ້ເກົ່າ ແລະຜູ້ໃໝ່ໂດຍພາຍໃຕ້ການເປັນປະທານຂອງທ່ານ ກົງຈັກ ໜໍ່ແກ້ວ ຄະນະປະຈໍາພັກແຂວງ ຫົວໜາພະແນກການເງິນ ແຂວງ ສະຫວັນນະເຂດ, ພ້ອມນັ້ນກໍ່ຍັງມີທ່ານເຈົ້າເມືອງໄຊບູລີ, ຮອງເລຂາພັກເມືອງ, ຄະນະປະຈໍາພັກເມືອງ, ກໍາມະການພັກເມືອງ, ຫົວໜ້າຫ້ອງການຕ່າງໆອ້ອມຂ້າງເມືອງ, ພະນັກງານທີ່ກ່ຽວຂ້ອງເຂົ້າຮ່ວມ

ໃນພິທີທ່ານ ຈອມສີ ພະທິທັກ ຮອງເລຂາພັກເມືອງ ຫົວໜ້າຄະນະຈັດຕັ້ງເມືອງຍັງໄດ້ຜ່ານຂໍ້ຕົກລົງຂອງທ່ານເຈົ້າເມືອງໄຊບູລີ, ສະບັບເລກທີ 416/ຈມ.ຊບລ ລົງວັນທີ 17 ກັນຍາ 2019 ວ່າດ້ວຍການຍົກຍ້າຍພະນັກງານ ມາດຕາ1ຕົກລົງຍົກຍ້າຍ ທ່ານ ສົມພອນ ນາມມະໂຄດ ຫົວໜ້າຫ້ອງການເງິນເມືອງໄຊບູລີໄປປະຈໍາການຢູ່ຫ້ອງການເງິນ ນະຄອນໄກສອນ ພົມວິຫານ, ຜ່ານຂໍ້ຕົກລົງຂອງທ່ານເຈົ້າເມືອງໄຊບູລີ ສະບັບເລກທີ 608/ຈມ.ຊບລ ລົງວັນທີ 03 ກັນຍາ 2019 ວ່າດ້ວຍການແຕ່ງຕັ້ງຫົວໜ້າຫ້ອງການເງິນເມືອງໄຊບູລີ ມາດຕາ1 ຕົກລົງແຕ່ງຕັ້ງທ່ານ ວິທະຍາ ນິລັນ ຮອງຫົວໜ້າຫ້ອງການເງິນ ຂຶ້ນເປັນຫົວໜ້າຫ້ອງການເງິນເມືອງໄຊບູລີ,

ຜ່ານຂໍ້ຕົກລົງຂອງທ່ານເຈົ້າເມືອງໄຊບູລີ ສະບັບເລກທີ 607/ຈມ.ຊບລ ລົງວັນທີ 03 ກັນຍາ 2019 ວ່າດ້ວຍການແຕ່ງຕັ້ງຮອງຫົວໜ້າຫ້ອງການ ແລະ ຮັກສາການຫົວໜ້າຫ້ອງການເງິນເມືອງໄຊບູລີ ມາດຕາ1 ຕົກລົງແຕ່ງຕັ້ງທ່ານ ແສງຈັນ ສິງຫາລາດ ຫົວໜ້າໜ່ວຍງານຊັບສິນລັດ ຂຶ້ນເປັນຮອງຫົວໜ້າຫ້ອງການ ແລະຮັກສາການຫົວໜ້າຫ້ອງການເງິນເມືອງໄຊບູລີ ແລະ ຜ່ານຂໍ້ຕົກລົງຂອງທ່ານເຈົ້າເມືອງໄຊບູລີ ສະບັບເລກທີ 606/ຈມ.ຊບລ ລົງວັນທີ 03 ກັນຍາ 2019 ວ່າດ້ວຍການແຕ່ງຕັ້ງຫົວໜ້າໜ່ວຍງານ ມາດຕາ1 ແຕ່ງຕັ້ງທ່ານນາງ ຄໍາຫຼ້າ ບຸດທິຈັກ ຮອງຫົວໜ້າຊັບສິນລັດຂຶ້ນເປັນຫົວໜ້າໜ່ວຍງານຊັບສິນລົດ; ຈາກນັ້ນໃນພິທີກໍ່ໄດ້ມີການຜ່ານຮ່າງບົດບັນທຶກການມອບຮັບວຽກລະວ່າງຫົວໜ້າຫ້ອງການເງິນເມືອງຜູ້ເກົ່າ ແລະຜູ້ທີ່ຈະມາຮັບໜ້າທີ່ເປັນຫົວໜ້າຫ້ອງການເງິນຜູ້ໃໝ່ຈາກນັ້ນກໍ່ໄດ້ມີການເຊັນບົດບັນທຶກການມອບ-ຮັບວຽກຕໍ່ໜ້າປະທານ ແລະແຂກທີ່ເຂົ້າຮ່ວມເປັນສັກຂີພະຍານໃນຄັ້ງນີ້.