ໃນຕອນບ່າຍວັນທີ 19 ກັນຍາ 2019 ຢູ່ທີ່ສະໂມສອນ ໂຮງຮຽນ ມໍ ປາຍ ໂພນສະຫວັນ ໄດ້ ຈັດພິທີສະຫຼຸບການຈັດຕັ້ງປະຕິບັດແຜນພັດທະນາ ການສຶກສາສົກຮຽນ 2018-2019 ແລະໄຂສົກຮຽນໃໝ່ 2019-2020 ຂຶ້ນ ໂດຍມີ ທ່ານ ຖາວອນ ອິນສີຊຽງໃໝ່ ຮອງຫົວໜ້າພະແນກສຶກສາທິການ ແລະ ກິລາແຂວງເຂົ້າຮ່ວມ.

ທ່ານ ນາງ ພອນເພັດ ສຸດທິໄຊຍະລາດ ອໍານວຍການໂຮງຮຽນ ມໍປາຍໂພນສະຫວັນ ໄດ້ສະຫຼຸບຄືນການເຄື່ອນໄຫວວຽກງານດ້ານຕ່າງໆໃນໄລຍະຜ່ານມາ ເປັນຕົ້ນວຽກພັດທະນາຫຼັກສູດ, ວຽກປັບປຸງຄຸນນະພາບການຮຽນ-ການສອນ, ວຽກບໍລິຫານຄຸ້ມຄອງການສຶກສາ,ການປັບປຸງການຈັດຕັ້ງ, ການເຄື່ອນໄຫວນອກຫຼັກສູດ ໂດຍສະເພາະ5ຫຼັກມູນຂອງການສຶກສາ, ການຈັດຕັ້ງນະໂຍບາຍ ແລະ ອື່ນໆ, ສຳລັບວຽກການຮຽນ-ການສອນ ສົກຮຽນຜ່ານມາ ນັກຮຽນສາມາດເສັງເລື່ອນຊັ້ນແລະຈົບຂັ້ນໄດ້ລື່ນຄາດໝາຍ ຕາມແຜນການ, ຊັ້ນມໍ 1 ມີນັກຮຽນ 86 ຄົນ ເສັງໄດ້ 100%, ມໍ 2 ມີ 73ຄົນ ເສັງໄດ້ 100%, ມໍ5 ມີ 309ຄົນ ເສັງໄດ້ 100%, ມໍ 6 ມີ 326 ຄົນ ເສັງໄດ້ 100% ແລະ ມໍ7ມີ 216 ຄົນ ເສັງໄດ້ 100%, ນອກຈາກການຮຽນໄດ້ດີພາຍໃນໂຮງຮຽນແລ້ວ ຍັງໄດ້ສົ່ງນັກຮຽນ ເຂົ້າໄປເສັງນັກຮຽນເກັ່ງຂັ້ນແຂວງ ໃນວິຊາຕ່າງໆຕື່ມອີກ, ສຳລັບວຽກກິດຈະກຳ ກໍ່ມີການເຄື່ອນໄຫວປະດິດບົດຟ້ອນ, ເຄື່ອນໄຫວຝຶກຊ້ອມ ແລະ ສະແດງສິລະປະ-ວັນນະຄະດີ ຮັບໃຊ້ງານສຳຄັນຕ່າງໆໄດ້ຫຼາຍຄັ້ງ, ແຂ່ງຂັນກິລາມິດຕະພາບ, ການເພີ່ມພູນຜະລິດຜົນ ແລະ ວຽກອື່ນໆ

ຈາກນັ້ນກໍ່ ໄດ້ຜ່ານແຜນພັດທະນາການສຶກສາ ປະຈຳສົກຮຽນ 2019-2020ຕື່ມອີກ, ໂດຍເລັ່ງໃສ່ ປະຕິບັດໃຫ້ຄົບຕາມ5ຫຼັກມູນຂອງການສຶກສາ ຄື ຄຸນສົມບັດສຶກສາ,ປັນຍາສຶກສາ,ແຮງງານສຶກສາ,ສິລະປະສຶກສາແລະພາລະສຶກ ສາ,ພ້ອມສືບຕໍ່ປັບປຸງຫຼັກສູດການຮຽນ-ການສອນ ໃຫ້ມີຄຸນະພາບສູງຂຶ້ນ,ຈາກນັ້ນຄະນະຮັບຜິດຊອບແຕ່ລະຊັ້ນຮຽນ ແລະຕາງໜ້ານັກຮຽນ ກໍ່ໄດ້ຂຶ້ນຈັບມືປະຕິບັດ 3 ຂໍ້ແຂ່ງຂັນ ຄື ສອນດີ-ຮຽນເກັ່ງ,ຕ້ານປະກົດການຫຍໍ້ທໍ້ ແລະ ສ້າງສະພາບແວດລ້ອມທີ່ດີ.

ໃນພິທີຍັງໄດ້ມອບໃບກຽດຕິຄຸນໃຫ້ ສູນສະຫວັນເຊັນເຕີ ທີ່ປະກອບສ່ວນພັດທະນາໂຮງຮຽນ ຄືໄດ້ສ້າງຫ້ອງເຕັ້ນ,ຫ້ອງດົນຕີ ພ້ອມອຸປະກອນຕ່າງໆ ມູນຄ່າ 117ລ້ານກວ່າກີບ ແກ່ໂຮງຮຽນ.
ຈາກນັ້ນ ໃນພິທີທ່ານ ຖາວອນ ອິນສີຊຽງໃໝ່ ໄດ້ປະກອບຄຳເຫັນແລະໂອ້ລົມ ໂດຍເນັ້ນ 6 ວຽກໃຫຍ່ ເຊັ່ນ ວຽກສຶກສາອົບຮົມການເມືອງແນວຄິດ ໃຫ້ພະນັກງານຄູ-ອນຈານ ,ວຽກພັດທະນາ ແລະຍົກສູງຄຸນນະພາບການຮຽນ ການສອນໃຫ້ສູງກວ່າເກົ່າ ສ້າງສື່ການຮຽນຽການສອນໃຫ້ຫຼາກຫຼາຍ,ສຳລັບວຽກກິດຈະກຳກໍ່ເປັນວຽກສຳຄັນ ແລະ ຕິດພັນກັບການຮຽນ ເຊິ່ງມັນເປັນການປູກຈິດສຳນຶກໃຫ້ນັກຮຽນ ຮັກການຮຽນ ຮັກການອອກແຮງງານ ແລະອື່ນໆ,ຈາກນີ້ກໍ່ມີວຽກ ການປ້ອງກັນສະກັດກັ້ນສິ່ງເສບຕິດ ແລະປະກົດການຫຍໍ້ທໍ້ ໃນໝູ່ນັກຮຽນ,ວຽກພັດທະນາພື້ນຖານ ຍາດແຍ່ງແລະຂໍການຊ່ວຍເຫຼືອຈາກສັງຄົມແລະພາກສ່ວນອື່ນໆ ເພື່ອພັດທະນາໂຮງຮຽນ,ສຸດທ້າຍກໍ່ເນັ້ນໃຫ້ນັກຮຽນ ຮູ້ຈັກໜ້າທີ່ຂອງຕົນ ນັ້ນກໍ່ຄື ຕັ້ງໃຈຮຽນໃຫ້ເກັ່ງ ເປັນຄົນດີຂອງຄອບຄົວ ຂອງພໍ່ແມ່ ຂອງໂຮງຮຽນ ແລະ ສັງຄົມ.