ໃນຕອນເຊົ້າຂອງວັນທີ 20 ກັນຍາ 2019 ນີ້ ຢູ່ທີ່ສະໂມສອນ ໂຮງຮຽນ ມສ ອິນແປງ ເມືອງແປກ ແຂວງຊຽງຂວາງ ໄດ້ຈັດພິທີປະກາດຮັບຮອງເອົາ 5 ບ້ານຄື: ບ້ານ ໃຫຍ່ຄັງວຽງ, ບ້ານ ໝ້ຽງນາລາມ, ບ້ານ ສີຄູນ, ບ້ານ ໝັ້ນຊົມ ແລະ ບ້ານ ລາວທອງ ເປັນຄອບຄົວ ແລະ ບ້ານສາມັກຄີປອງດອງຂື້ນຢ່າງເປັນທາງການ. ພາຍໃຕ້ການເປັນປະທານຂອງ ທ່ານ ເພັດດາວັນ ດາລາວົງແສນ ເລຂາພັກຮາກຖານບ້ານໃຫຍ່ຄັງວຽງ ເປັນກຽດເຂົ້າຮ່ວມພິທີໂດຍທ່ານ ຄໍາກ້ອນ ອົ້ວນວນສາ ຄະນະຈຳພັກເມືອງ ຮອງເຈົ້າເມືອງໆແປກ, ທ່ານ ດວງໄຊ ທໍ່ຢ່າບຼົ່ງ ຮອງປະທານແນວລາວສ້າງຊາດແຂວງຊຽງຂວາງ, ທ່ານ ສົມຄວນ ພົນເສນາ ກຳມະການພັກມືອງ ປະທານແນວລາວສ້າງຊາດເມືອງ, ມີບັນດາຫົວໜ້າ-ຮອງຫົວໜ້າຫ້ອງການຂອງເມືອງ, ຄະນະກຸ່ມ, ຄະນະບ້ານທັງ5ບ້ານ, ແຂກຖືກເຊີນ ແລະເຖົ້າແກ່ແນວໂຮມ, ຜູ້ຊົງຄຸນວຸດທິເຈົ້າກົກ-ເຈົ້າເຫຼົ່າຕະຫຼອດຮອດພໍ່ແມ່ປະຊາຊົນບັນດາເຜົ່າ5ບ້ານເຂົ້າຮ່ວມ.

ໃນພິທີທ່ານ ເພັດດາວັນ ດາລາວົງແສນ ຕາງໜ້າຄະນະບ້ານທັງ5ບ້ານ ຂຶ້ີນກ່າວໄຂພິທີຢ່າງເປັນທາງການ. ຈາກນັ້ນ, ທ່ານ ປະທານແນວລາວສ້າງຊາດບ້ານໃຫຍ່ຄັງວຽງ ທັງເປັນຕາງໜ້າຄະນະຮັບຜິດຊອບ ຂຶ້ນຜ່ານບົດສະຫຼຸບກ່ຽວກັບວຽກງານການສ້າງຄອບຄົວແລະບ້ານສາມັກຄີປອງດອງຂອງແນວລາວສ້າງຊາດ ໃນໄລຍະຜ່ານມາ ແລະທິດທາງແຜນ ການໃນຕໍ່ໜ້າ. ທ່ານໄດ້ຍົກໃຫ້ເຫັນເຖີງການຈັດຕັ້ງປະຕິບັດວຽກງານໃນໄລຍະຜ່ານມາ, ໄດ້ເອົາໃຈໃສ່ສຶກສາອົບຮົມ, ການເມືອງແນວຄິດ ໃຫ້ພໍ່ແມ່ປະຊາຊົນມີຄວາມຮັກແພງ, ຊ່ວຍເຫຼືອເຊີ່ງກັນ ແລະກັນ, ຮັກສາມູນເຊື້ອຮີດຄອງປະເພນີອັນດີງາມຂອງເຜົ່າ, ຕິດພັນກັບການສ້າງຂະບວນການຮັກຊາດ ແລະພັດທະນາ, ບັນດາໜ້າວຽກປະສົບຜົນສຳເລັດເວົ້າລວມເວົ້ນສະເພາະແມ່ນ ການສ້າງຄອບຄົວ ແລະ ບ້ານສາມັກຄີປອງດອງຢ່າງເປັນຂະບວນການຟົດຟື້ນ. 5 ບ້ານລວມມີ 364 ຄອບຄົວ ຜ່ານການປະເມີນຕາມມາດຕະຖານການສ້າງຄອບຄົວ ແລະບ້ານສາມັກປອງດອງ ຂອງສູນກາງແນວລາວສ້າງຊາດວາງອອກມີ 364 ຄອບຄົວ ເທົ່າກັບ100%. ຈາກນັ້ນ, ໃນພິທີໄດ້ມອບຮັບໃບຢັ້ງຢືນຄອບຄົວ ແລະບ້ານສາມັກຄີປອງດອງ ໃຫ້ແກ່ອຳນາດການປົກຄອງບ້ານ ແລະຄອບຄົວທີ່ຜ່ານການຮັບຮອງ. ເປັນກຽດຂຶ້ນມອບໂດຍທ່ານ ຄໍາກ້ອນ ອົ້ວນວນສາ ແລະ ທ່ານ ດວງໄຊ ທໍ່ຢ່າບຼົ່ງ.

ໃນຕອນທ້າຍຂອງພິທີຍັງໄດ້ຮັບຟັງການໂອ້ລົມຂອງທ່ານ ດວງໄຊ ທໍ່ຢ່າບຼົ່ງ ເຊີ່ງກ່ອນອື່ນທ່ານໄດ້ສະແດງຄວາມຍ້ອງຍໍຊົມເຊີຍຕໍ່ຜົນງານການຈັດຕັ້ງປະຕິບັດ ວຽກງານຂະບວນການສ້າງຄອບຄົວແລະ ບ້ານສາມັກຄີປອງດອງ ທີ່ຄະນະພັກອຳນາດການປົກຄອງບ້ານ, ແນວລາວສ້າງຊາດຂັ້ນບ້ານ ແລະ ພໍ່ແມ່ປະຊາຊົນບັນດາເຜົ່າໄດ້ພ້ອມພຽງຮຽງໜ້າກັນ, ສາມັກຄີກັນ້ ເຊີ່ງໄດປະກາດເປັນຄອບຄົວ ແລະບ້ານສາມັກຄີໃນຄັ້ງນີ້ ທ່ານໄດ້ກ່າວວ່າ: ພິທີມອບ-ຮັບໃບຢັ້ງຢືນຄອບຄົວ ແລະ ບ້ານສາມັກຄີງປອງດອງໃນຄັ້ງນີ້, ໄດ້ເປັນໃບໜ້າທີ່ສຳຄັນຂອງແຂວງຊຽງຂວາງເວົ້າລວມ, ເວົ້າສະເພາະກໍ່ແມ່ນຂອງເມືອງ ແລະ ຂອງ 5 ບ້ານ ເຊີ່ງໄດ້ສະແດງ, ບົ່ງບອກເຖີງກ້ອນກຳລັງຄວາມສໍາມັກຄີຂອງປະຊາຊົນບັນດາເຜົ່າ, ຄຽງຄູ່ກັນນັ້ນທ່ານຍັງໄດ້ເນັ່ນໜັກ ໃຫ້ຄະນະຮັບຜິດຊອບຂະບວນການສ້າງຄອບຄົວ ແລະບ້ານສາມັກຄີປອງດອງ ຕ້ອງຕິດຕາມ-ກວດກາ, ລາຍງານ, ຂໍທິດຊີ້ນຳຈາກຂັ້ນເທີງເປັນແຕ່ລະໄລຍະ, ຊຸກຍູ້ບັນດາຄອບຄົວ-ບ້ານທີ່ໄດ້ຮັບໃບຢັ້ງຢືນໃຫ້ເຂົາເຈົ້າຈົ່ງ ປົກປັກຮັກສານາມມະຍົດຂອງຕົນໃຫ້ຍືນຢົງຕະຫຼອດໄປ, ອຳນາດການປົກຄອງບ້ານ, ແນວລາວສ້າງຊາດຂັ້ນບ້ານ ຕ້ອງເປັນເຈົ້າການປະສານສົມທົບກັບບັນດາອົງການຈັດຕັ້ງພັກ-ລັດ ແລະອົງການຈັດຕັ້ງມະຫາຊົນຂອງຕົນ ເພື່ອຄົ້ນຄວ້າປຶກສາຫາລືຄວາມເປັນເອກະພາບໃນວຽກງານດັ່ງກ່າວ, ກຳແໜ້ນແນວທາງນະໂຍບາຍຂອງພັກ, ລະບຽບກົດໝາຍຂອງລັດ, ປະຕິບັດໃຫ້ຖຶກຕ້ອງສອດຄ່ອງ ກັບນິຕິກຳກ່ຽວກັບການສ້າງຄອບຄົວ ແລະບ້ານສາມັກຄີປອງດອງ ຂອງແນວລາວສ້າງຊາດວາງອອກຢ່າງເຂັ້ມງວດ, ພໍ່ແມ່ປະຊາຊົນບັນດາເຜົ່າ ຈົ່ງສືບຕໍ່ພ້ອມກັນຮັກສາມູນເຊື້ອຂອງຄອບຄົວ ແລະ ບ້ານສາມັກຄີປອງດອງໃນປີຕໍ່ໆໄປ ເພື່ອຜັນຂະຫຍາຍ ແລະໃຫ້ກາຍເປັນຄອບຄົວສາມັກຄີປອງດອງ, ບ້ານສາມັກຄີປອງດອງ ແລະເມືອງສາມັກຄີປອງໃນຕໍ່ໜ້າ.

ພາບຂ່າວ: ເບ່ຕ່າ ໄຊປັນຍາ (ແນວລາວສ້າງຊາດແຂວງຊຽງຂວາງ)