ໃນວັນທີ 20 ກັນຍາ 2019 ນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມດ້ວຍຫົວໜ້າພະແນກການຕ່າງໆອ້ອມຂ້າງແຂວງ ໄດ້ລົງເຄື່ອນໄຫວຢ້ຽມຢາມປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມຢູ່ຈຸດສຸມຊຽງໄຄ ເມືອງໄຊບູລີ. ໂດຍການໃຫ້ກຽດຕ້ອນຮັບຂອງທ່ານ ອ່ອນລຳພັນ ບົວສີແກ້ວ ເຈົ້າເມືອງໄຊບູລີ.

ທ່ານ ພູທອງ ແສງສະຫວ່າງວົງ ເລຂາຄະນະພັກຮາກຖານ ຈຸດສຸມຊຽງໄຄ ໄດ້ລາຍງານສະພາບນ້ຳຖ້ວມຢູ່ຈຸດສຸມຊຽງໄຄໃຫ້ຮູ້ວ່າ: ນ້ຳໄດ້ເລີ່ມຖ້ວມເສັ້ນທາງ,ໄຮ່ນາ,ຮົ້ວສວນ ແລະ ເຮືອນຊານຂອງປະຊາຊົນ ນັບແຕ່ວັນທີ 30 ສິງຫາ ຈົນຮອດວັນທີ 17 ກັນຍາ 2019 ນ້ຳຈຶ່ງໄດ້ບົກລົງ ທາງອຳນາດການປົກຄອງຈຸດສຸມ ແລະ ອຳນາດການປົກຄອງບ້ານແມ່ນໄດ້ເລັ່ງເຄື່ອນຍ້າຍປະຊາຊົນ,ແລ້ວເຄື່ອງໃຊ້ທີ່ຈຳເປັນໄປໄວ້ບ່ອນປອດໄພລວມມີ 3 ບ້ານຄ: ບ້ານຊຽງໄຄ,ແກ້ງແວງ ແລະ ບ້ານດົງໝາກໄຟ ພາຍໃນຈຸດສຸມມີເຮືອນທີ່ຖືກຖ້ວມທັງໝົດ 154 ຫຼັງ,ມີ 228 ຄອບຄົວ,ມີພົນລະເມືອງ 1.190 ຄົນໄດ້ຮັບຜົນກະທົບ,ເນື້ອທີ່ນາຖືກຖ້ວມກວມເອົາ 5 ບ້ານລວມມີ 563 ເຮັກຕາ,ສວນມັນຕົ້ນ 27 ເຮັກ ແລະ ຖ້ວມໜອງສະ 82 ໜອງ.

ຈາກນັ້ນບັນດາປະຊາຊົນກໍ່ໄດ້ສະເໜີ,ມາຍັງການນໍາພັກ – ລັດແຂວງເລື່ອງການຂະຫຍາຍຄອງເໝືອງຊົນລະປະທານເຂົ້າໃນການຜະລິດເຂົ້ານາແຊງເພີ່ມຕື່ມຈາກ 30 ເຮັກຕາເປັນ 50 ເຮັກຕາ,ສະເໜີກັນນ້ຳຫ້ວຍ ລວມທັງການສະໜອງແນວພັນໃຫ້ທັນກັບການຜະລິດລະດູແລ້ງຂອງປະຊາຊົນ ແລະ ສະເໜີສ້າງໂຮງຮຽນຫຼັງໃໝ່ຢູ່ບ້ານແກ້ງແວງຕື່ມອີກ.

ຈາກນັ້ນ ທ່ານ ສັນຕິພາບ ພົມວິຫານກໍ່ໄດ້ມີຄຳເຫັນໂອ້ລົມຕໍ່ກັບປະຊາຊົນຜູ້ທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້ວ່າ: ປີນີ້ແມ່ນເປັນປີທີ 2 ແລ້ວທີ່ແຂວງຂອງພວກເຮົາໄດ້ຮັບຜົນກະທົບຈາກໄພພິບັດນ້ຳຖ້ວມເຖິງຂັ້ນຮ້າຍແຮງ ເຊິ່ງເປັນສາເຫດເຮັດໃຫ້ປະຊາຊົນຈຳນວນຫຼາຍຄອບຄົວອຶດເຂົ້າກິນ ແມ່ນແຕ່ແນວພັນທີ່ຈະນຳໃຊ້ໃນການຜະລິດໃນລະດູແລ້ງກໍ່ຍັງບໍ່ມີ ປັດຈຸບັນແຂວງຂອງພວກເຮົາແມ່ນມີຄວາມຕ້ອງການແນວພັນເຂົ້າໃຫ້ກັບປະຊາຊົນຈຳນວນ 1.800 ໂຕນເພື່ອສະໜອງຕໍ່ຜົນເສຍຫາຍຈາກໄພນ້ຳຖ້ວມ ແລະ ຈະເລັ່ງສ້ອມແປງລະບົບຊົນລະປະທານຈັກສູບນ້ຳ ແລະ ຄອງເໝືອງໃຫ້ທັນຕໍ່ການຜະລິດລະດູແລ້ງ.

ໂອກາດລົງຢ້ຽມຢາມປະຊາຊົນທີ່ຈຸດສຸມຊຽງໄຄໃນຄັ້ງນີ້ ທ່ານເຈົ້າແຂວງ ພ້ອມດ້ວຍບັນດາພະແນກການຕ່າງໆ ກໍ່ຍັງໄດ້ມອບເຄື່ອງອຸປະໂພກໃຫ້ກັບປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມທີ່ຈຸດສຸມຊຽງໄຄຕື່ມອີກລວມມູນຄ່າເກືອບ 20 ລ້ານກີບ.

ພາບ – ຂ່າວ: ອັກສອນສິນ ພົມມະຈັນ