ກອງປະຊຸມໃຫຍ່ ຄັ້ງທີ V ຂອງຄະນະກຳມະການແນວງລາວສ້າງຊາດເມືອງຫົງສາ ແຂວງໄຊຍະບູລີ ໄດ້ຈັດຂຶ້ນໃນລະຫວ່າງ ວັນທີ 19 ຫາ 20 ກັນຍາ 2019 ນີ້, ຢູ່ທີ່ສະໂມສອນເມືອງ. ໂດຍໃຫ້ກຽດເຂົ້າຮ່ວມຂອງທ່ານ ຄຳສິງ ສໍລະສຸກ ກຳມະການປະຈຳພັກແຂວງ ປະທານແນວລາວສ້າງຊາດແຂວງໄຊຍະບູລີ, ທ່ານ ຄຳຫຼ້າ ຜິວວັນນາ ວ່າການເລຂາພັກເມືອງ ວ່າການເຈົ້າເມືອງຫົງສາ, ມີບັນດາທ່ານກຳມະການປະຈຳພັກເມືອງ, ກຳມະການພັກເມືອງ, ສະມາຊິກສະພາປະຊາຊົນແຂວງ, ປະທານ-ຮອງປະທານແນວລາວສ້າງຊາດເມືອງ, ພະນັກງານປະຕິວັດອາວຸໂສບຳນານ, ພະເຖລານຸເຖລະ, ແຂກຖືກເຊີນຈາກແຂວງ-ເມືອງອ້ອມຂ້າງ ແລະ ບັນດາສະຫາຍ ຜູ້ແທນສົມບູນ 60 ກວ່າທ່ານເຂົ້າຮ່ວມ.

ໃນວາລະກອງປະຊຸມທ່ານ ສົມຍົດ ອານຸວົງ ກຳມະການພັກເມືອງ ປະທານແນວລາວສ້າງຊາດເມືອງຫົງສາ ກໍ່ໄດ້ຂຶ້ນກ່າວເປີດກອງປະຊຸມຢ່າງເປັນທາງການ ແລະ ພ້ອມທັງຜ່ານບົດລາຍງານການເມືອງທັງ 2 ພາກ. ກອງປະຊຸມຄັ້ງນີ້, ໄດ້ຄົ້ນຄວ້າຕີລາຄາຄືນການຈັດຕັ້ງປະຕິບັດ ມະຕິກອງປະຊຸມໃຫຍ່ ຄັ້ງທີ IV ຂອງຄະນະກຳມະການແນວລາວສ້າງຊາດເມືອງ. ໂດຍໄດ້ຍົກໃຫ້ເຫັນຜົນງານດ້ານດີ, ດ້ານອ່ອນ ແລະ ບົດຮຽນທີ່ຖອດຖອນໄດ້. ໃນໄລຍະຜ່ານມາ ສາມາດສ້າງຄອບຄົວ ແລະ ບ້ານສາມັກຄີປອງດອງໄດ້ 23 ບ້ານ ກວມເອົາ 69% ຂອງຈຳນວນບ້ານທັງໝົດ, ເຮັດໃຫ້ປະຊາຊົນບັນດາເຜົ່າທົ່ວເມືອງເຫັນໄດ້ຄວາມສຳຄັນຂອງແນວລາວສ້າງຊາດສູງຂຶ້ນກວ່າເກົ່າ. ພ້ອມກັນນັ້ນ, ຜູ້ແທນກອງປະຊຸມ ໄດ້ພ້ອມກັນສຸມທຸກສະຕິປັນຍາຂອງຕົນປະກອບຄຳຄິດຄຳເຫັນຕໍ່ກອງປະຊຸມ, ພ້ອມທັງຄົ້ນຄວ້າພິຈາລະນາເປັນເອກະພາບຮັບຮອງເອົາບົດລາຍງານການເມືອງ ແລະ ຄາດໝາຍສູ້ຊົນຮອດປີ 2023. ເຊິ່ງຈະໄດ້ສືບຕໍ່ເສີມຂະຫຍາຍເຕົ້າໂຮມຄວາມສາມັກຄີປອງດອງ ຂອງປະຊາຊົນບັນດາເຜົ່າ ໃນທົ່ວເມືອງໃຫ້ເປັນຈິດໜຶ່ງໃຈດຽວ ເພື່ອພ້ອມກັນຈັດຕັ້ງປະຕິບັດ ບັນດາໂຄງການ ການເມືອງ ແລະ ຄາດໝາຍສູ້ຊົນ ທີ່ກອງປະຊຸມໃຫຍ່ ຄັ້ງທີ VI ຂອງອົງຄະນະພັກແຂວງ, ມະຕິກອງປະຊຸມໃຫຍ່ ຄັ້ງທີ V ຂອງອົງການແນວລາວສ້າງຊາດແຂວງ, ມະຕິກອງປະຊຸມໃຫຍ່ ຄັ້ງທີ VII ຂອງອົງຄະນະພັກເມືອງຫົງສາວາງອອກ ໃຫ້ປະກົດຜົນເປັນຈິງ.

ກອງປະຊຸມໄດ້ປຶກສາຫາລືຢ່າງມີປະຊາທິປະໄຕ ເປັນເອກະພາບຮັບຮອງເອົາ ຄະນະກຳມະການ ແນວລາວສ້າງຊາດເມືອງຫົງສາ ຊຸດທີ V ຈຳນວນ 62 ທ່ານ, ຍິງ 06 ທ່ານ. ໃນນີ້, ມີພະສົງ 01 ອົງ. ໂດຍກອງປະຊຸມຄັ້ງປະຖົມມະລຶກ ໄດ້ຄົ້ນຄວ້າພິຈາລະນາປະຊາມາຕິເອົາທ່ານ ສົມຍົດ ອານຸວົງ ເປັນປະທານ, ທ່ານ ບຸນຊ້ອຍ ແກ້ວມະນີ ແລະ ທ່ານ ນາງ ປານ ສະຫງວນສິດ ເປັນຮອງປະທານ. ກອງປະຊຸມອັດລົງດ້ວຍຜົນສໍາເລັດອັນຈົບງາມ.

ພາບ-ຂ່າວ: ກິດຕິສັກ ບົວໄລ