ກອງປະຊຸມໃຫຍ່ຄັ້ງທີ VIII ຂອງອົງຄະນະພັກ ເມືອງ ພຽງ ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 22 ກັນຍາ 2019 ນີ້ ທີ່ສະໂມສອນຂອງເມືອງດັ່ງກ່າວ, ໂດຍການເປັນປະທານຂອງ ສະຫາຍ ເສີດ ແສງສຸລິນ ວ່າການເລຂາພັກເມືອງ, ວ່າການເຈົ້າເມືອງໆ ພຽງ, ເປັນກຽດເຂົ້າຮ່ວມໂດຍ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ເລຂາຄະນະບໍລິຫານງານພັກ 10 ເມືອງທົ່ວແຂວງ, ກອງພົນທະຫານຮາບທີII, ພະນັກງານອາວຸໂສບຳນານ, ມີນັກທຸລະກິດ, ຜູ້ປະກອບການ, ຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ, ແຂກຮັບເຊີນທີ່ມາຈາກສູນກາງ ແລະ ແຂວງ ເຂົ້າຮ່ວມ 200 ກວ່າສະຫາຍ, ໃນນີ້ ມີຜູ້ແທນສົມບູນເຂົ້າຮ່ວມ 129 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວເມືອງ 2085 ສະຫາຍ, ຍິງ 641 ສະຫາຍ.

ກອງປະຊຸມໃຫຍ່ຄັ້ງນີ້ ຈະໄດ້ພ້ອມກັນທົບທວນຕີລາຄາຄືນຜົນງານ ໃນແຕ່ລະດ້ານທີ່ຍາດມາໄດ້, ຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ, ມະຕິກອງປະຊຸມໃຫຍ່ຄັ້ງທີ VII ຂອງອົງຄະນະພັກເມືອງ ພຽງ ແລະ ພ້ອມກັນກຳນົດທິດທາງຄາດໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອງພຽງແຕ່ນີ້ຮອດປີ 2024, ອັນສໍາຄັນຜູ້ແທນກອງປະຊຸມຈະໄດ້ພ້ອມກັນເລືອກຕັ້ງເອົາຄະນະບໍລິຫານງານພັກເມືອງຊຸດໃຫມ່, ເລືອກໃຫ້ໄດ້ບຸກຄົນທີ່ມີຄວາມຮູ້ຄວາມສາມາດ, ມີຄຸນສົມບັດສິນທຳປະຕິວັດ, ມີຄວາມຮັບຜິດຊອບຕໍ່ຫນ້າທີ່ການເມືອງ, ເພື່ອສືບຕໍ່ຊີ້ນຳ-ນຳພາເມືອງພຽງກ້າວຂຶ້ນຢ່າງບໍ່ຢຸດຢັ້ງດ້ວຍຜົນງານ ແລະ ຜົນສໍາເລັດໃຫຍ່ຫຼວງກ່ວາເກົ່າ, ສູ້ຊົນພັດທະນາເມືອງ ພຽງ ໃຫ້ມີການຫັນປ່ຽນຢ່າງຕັ້ງຫນ້າໃນທຸກດ້ານ, ຕາມທິດຢືນຢົງ, ສີຂຽວ ແລະ ເປັນມິດກັບສິ່ງແວດລ້ອມ, ໂດຍລວມແລ້ວຕະຫຼອດໄລຍະ 5 ປີຜ່ານມາ ເມືອງພຽງແມ່ນໄດ້ຫັ້ນເອົາພະນັກງານລົງກໍ່ສ້າງຮາກຖານການເມືອງຕາມ 4 ເນື້ອໃນ 4 ຄາດໝາຍ,

ໂຄສະນາເຜີຍແຜ່ແນວທາງປ້ອງກັນຊາດ-ປ້ອງກັນຄວາມສະຫງົບທົ່ວປວງຊົນຮອບດ້ານໃຫ້ແກ່ພະນັກງານສະມາຊິກພັກ, ພະນັກງານລັດຖະກອນ ແລະ ພໍ່ແມ່ປະຊາຊົນບັນດາເຜົ່າ, ເຮັດໃຫ້ເມືອງ ສືບຕໍ່ມີສະຖຽນລະພາບທ້າງດ້ານການເມືອງ, ສັງຄົມມີຄວາມສະຫງົບ, ມີຄວາມເປັນລະບຽບຮຽບຮ້ອຍໂດຍພື້ນຖານ, ເສດຖະກິດມະຫາພາກຂອງເມືອງສືບຕໍ່ຂະຫຍາຍຕົວສະເລ່ຍ 9,3% ລາຍໄດ້ສະເລ່ຍໃສ່ຫົວຄົນໜຶ່ງໄດ້ 20 ລ້ານ 7 ແສນກີບ ຫຼື ເທົ່າກັບ 2.588 ໂດລາສະຫະລັດ, ທຽບໃສ່ ປີ 2014 ເພີ່ມຂຶ້ນ 804 ໂດລາສະຫະລັດ, ພື້ນຖານໂຄງລ່າງ, ເສັ້ນທາງ, ໄຟຟ້າ, ນໍ້າປະປາ ໄດ້ຮັບການພັດທະນາ ຍົກລະດັບດີຂຶ້ນກວ່າຜ່ານມາ, ຄວາມທຸກຍາກຂອງປະຊາຊົນ ໄດ້ຮັບການແກ້ໄຂຫຼຸດລົງຢ່າງຈະແຈ້ງ ຍັງເຫຼືອ 45 ຄອບຄົວ ເທົ່າກັບ 0,39% ຂອງຄອບຄົວທັງໝົດ, ຂົງເຂດວັດທະນະທໍາ-ສັງຄົມ ໄດ້ຮັບການພັດທະນາຍົກລະດັບ ໃຫ້ມີຄຸນນະພາບດີຂຶ້ນກວ່າເກົ່າ, ລະບົບການເມືອງຢູ່ຮາກຖານໄດ້ຮັບການປັບປຸງ ໃຫ້ມີຄວາມເຂັ້ມແຂງຂຶ້ນເປັນກ້າວໆ.

ກອງປະຊຸມຄັ້ງນີ້ ຍັງຈະໄດ້ຮັບຟັງການໂອ້ລົມຂອງ ສະຫາຍ ພົງສະຫວັນ ສິດທະວົງ, ທີ່ຈະເປັນທິດຊີ້ນໍາອັນສໍາຄັນໃຫ້ແກ່ອົງຄະນະພັກເມືອງພຽງ ໃນການສືບຕໍ່ປະຕິບັດໜ້າທີ່ວຽກງານກໍ່ຄືການຈັດຕັ້ງຜັນຂະຫຍາຍມະຕິກອງປະຊຸມໃຫຍ່ຄັ້ງນີ້ໃຫ້ເກີດຜົນເປັນຈິງ ແລະ ກອງປະຊຸມຈະໄດ້ດຳເນີນເປັນເວລາ 2 ວັນຈິ່ງຈະສຳເລັດ.