ໃນວັນທີ 21 ກັນຍາ 2019 ນີ້ ທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ປະທານກວດກາສູນກາງພັກ ໄດ້ລົງຢ້ຽມຢາມຜູ້ປະສົບໄພນ້ຳຖ້ວມທີ່ເມືອງຈຳພອນ ແຂວງສະຫວັນນະເຂດ ພ້ອມທັງໂອ້ລົມການນຳຂອງແຂວງ ແລະ ການນຳຂອງເມືອງ. ໃຫ້ກຽດຕ້ອນຮັບການມາຢ້ຽມຢາມຂອງທ່ານຮອງນາຍົກໃນຄັ້ງນີ້ ໂດຍແມ່ນທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ພ້ອມຄະນະ.

ໃນໂອກາດຕ້ອນຮັບທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ຄັ້ງນີ້ ທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ກໍ່ໄດ້ລາຍງານກ່ຽວກັບການພັດທະນາເສດຖະກິດ – ສັງຄົມຂອງແຂວງໃນໄລຍະ 6 ເດືອນຜ່ານມາ ພ້ອມທັງລາຍງານກ່ຽວກັບສະພາບຄວາມເສຍຫາຍຈາກໄພນ້ຳຖ້ວມພາຍໃນແຂວງສະຫວັນນະເຂດ ໂດຍທ່ານໄດ້ໃຫ້ຮູ້ວ່າ: ສະພາບນ້ຳຖ້ວມທີ່ແຂວງສະຫວັນນະເຂດໃນຄັ້ງນີ້ ມັນໄດ້ສົ່ງຜົນກະທົບ ແລະ ສ້າງຄວາມເສຍຫາຍໃນຫຼາຍດ້ານຕໍ່ການພັດທະນາຂອງແຂວງເປັນຕົ້ນແມ່ນ ດ້ານທີ່ຢູ່ອາເຮືອນຊານບ້ານຊ່ອງຂອງປະຊາຊົນ,ດ້ານການຜະລິດ ນ້ຳຖ້ວມເນື້ອທີ່ນາ,ເນື້ອທີ່ສວນລວມທັງສັດລ້ຽງຕາຍ ແລະ ສູນຫາຍເປັນຈຳນວນຫຼວງຫຼາຍ,ກະທົບຕໍ່ພື້ນຖານໂຄງລ່າງໄຟຟ້າ,ຖະໜົນຫົນທາງເປ້ເພເສຍຫາຍຈຳນວນບໍ່ໜ້ອຍ,ກະທົບຕໍ່ການສຶກສາ,ສາທາລະນະສຸກ ໂຮງຮຽນ ແລະ ສຸກສາລາຫຼາຍແຫ່ງໄດ້ຮັບຄວາມເສຍຫາຍ. ປັດຈຸບັນແຂວງສະຫວັນນະເຂດມີຄວາມຕ້ອງອັນຮີບດ່ວນໃນສະເພາະໜ້ານີ້ ແມ່ນຄວາມຕ້ອງການໃນການສືບຕໍ່ໃຫ້ການຊ່ວຍເຫຼືອປະຊາຊົນ ຍັງມີຫຼາຍອັນທີ່ພວກເຮົາຍັງຂາດເຂີນ ແລະ ຈຳເປັນ ເພາະວ່າປະຊາຊົນຜູ້ປະສົບໄພພິບັດຈຳນວນໜຶ່ງເຊັ່ນ: ເຂົ້າ, ນໍ້າ, ວັດຖຸສິ່ງຂອງຖືກເສຍຫາຍໝົດ.

ຕາມການຄິດໄລ່ປະເມີນເບື້ອງຕົ້ນ ຖ້າຈະຊ່ວຍປະຊາຊົນຜູ້ປະສົບໄພ ເຂົ້າກິນ 3 ເດືອນ, ເປັນເຂົ້າຢ່າງ ໜ້ອຍ 1.500 ໂຕນ. ງົບປະມານທີ່ຈະປັບປຸງເສັ້ນທາງ, ຂົວໃຫ້ກັບຄືນສູ່ປົກກະຕິ ປະມານ 67,7 ຕື້ກີບ. ນອກຈາກນັ້ນຍັງຕ້ອງການງົບປະມານ ເຂົ້າໄປຟື້ນຟູວຽກງານກະສິກຳ ເປັນຕົ້ນ, ຊົນລະປະທານ, ແນວພັນເຂົ້າ ແລະ ອຶ່ນໆປະມານ 48,5 ຕື້ກີບ; ງົບປະມານສຳລັບສາທາລະນະສຸກ ໂດຍສະເພາະຢາປົວພະຍາດ, ຟື້ນຟູລະບົບສາທາລະນະສຸກຫຼັງນ້ຳຫຼຸດລົງ ປະມານ 895 ລ້ານກີບ.

ຈາກນັ້ນທ່ານ ບຸນທອງ ຈິດມະນີ ຮອງນາຍົກລັດຖະມົນຕີ ກໍ່ໄດ້ມີຄຳເຫັນໂອ້ລົມຕໍ່ການນຳຂອງແຂວງ ແລະ ການນຳຂອງເມືອງ ເຊິ່ງກ່ອນອື່ນທ່ານກໍ່ໄດ້ຍ້ອງຍໍຊົມເຊີຍຕໍ່ການນຳພັກ – ລັດແຂວງ,ເມືອງທີ່ໄດ້ເອົາໃຈໃສ່ແກ້ໄຂຜົນກະທົບຈາກໄພນໍ້າຖ້ວມໃນທົ່ວແຂວງ ໃຫ້ກ້າວເຂົ້າສູ່ສະພາບປົກກະຕິ ພ້ອມນັ້ນທ່ານກໍ່ຍັງໄດ້ເນັ້ນໜັກໃຫ້ການນຳພັກ – ລັດແຂວງເລັ່ງເອົາໃຈໃສ່ຊ່ວຍເຫຼືອປະຊາຊົນທີ່ຂາດບ່ອນຢູ່ອາໃສ,ແກ້ໄຂເຂົ້າກິນ ແລະ ສະໜອງຢາປົວພະຍາດໃຫ້ກັບປະຊາຊົນ,ເລັ່ງຟື້ນຟູໂຮງຮຽນເພື່ອໃຫ້ລູກຫຼານໄດ້ເຂົ້າໂຮງຮຽນຢ່າງປົກກະຕິ,ເລັ່ງຟື້ນຟູສຸກສາລາ ເພື່ອໃຫ້ປະຊາຊົນໄດ້ເຂົ້ານຳໃຊ້ບໍລິການດ້ານສຸຂະພາບ ແລະ ວຽກງານລະບົບຊົນລະປະທານກໍ່ຄວນເລັ່ງດ່ວນແກ້ໄຂໃຫ້ໄວທີ່ສຸດເພື່ອໃຫ້ທັນກັບການຜະລິດລະດູແລ້ງຂອງປະຊາຊົນ
ໂອກາດລົງຢ້ຽມຢາມຜູ້ປະສົບໄພນ້ຳຖ້ວມທີ່ເມືອງຈຳພອນ ແຂວງສະຫວັນນະເຂດ ຄັ້ງນີ້ທ່ານ ບຸນທອງ ຈິດມະນີ ກໍ່ຍັງໄດ້ມອບເງິນຈຳນວນ 100 ລ້ານກີບໃຫ້ກັບແຂວງສະຫວັນນະເຂດ ແລະ ມອບເງິນໃຫ້ເມືອງຈຳພອນ,ເມືອງຊົນນະບູລີເມືອງລະ 50 ລ້ານກີບ. ພ້ອມທັງມອບເຄື່ອງບໍລິໂພກໃຫ້ກັບ 2 ເມືອງ ຈຳພອນ ແລະ ຊົນນະບູລີ ລວມມູນຄ່າ 55 ລ້ານກີບຕື່ມອີກ.

ພາບ – ຂ່າວ: ອັກສອນສິນ ພົມມະຈັນ