ຈະນຳພາທ່ານໄປຮູ້ຈັກ ແລະ ສຳຜັດແດນມັງກອນ ດິນແດນແຫ່ງອະລິຍະທຳອັນເກົ່າແກ່ທາງປະຫວັດສາດ,ວັດທະນະທຳ ແລະ ຄວາມຮຸ່ງເຮືອງສີວິໄລຂອງໂລກຍຸກໃໝ່ແຫ່ງທະວີບອາຊີຕາເວັນອອກ, ມະຫາອຳນາດທາງດ້ານເສດຖະກິດ ແລະ ການປົກຄອງ.
ນັບວ່າເປັນໂຊກດີທີ່ຜູ້ຂຽນໄດ້ມີໂອກາດເດີນທາງເຂົ້າຮ່ວມກິດຈະກຳສຳລັບສື່ມວນຊົນນາໆຊາດຈາກ 12 ປະເທດໃນແຖບອາຊີ ແລະ ເອີຣົບ ເພື່ອເຂົ້າຮ່ວມກິດຈະກຳພາຍໃຕ້ຫົວຂໍ້ “ສຳຫຼວດປະເທດຈີນ” ຕາມການເຊື້ອເຊີນຂອງສຳນັກຂ່າວ ຊາຍນາເດລີ (China Daily) ທີ່ເມືອງບໍ່ນ້ຳພຸທຳມະຊາດນະຄອນຈີໜານ ເພື່ອສຳຜັດປະສົບການ ແລະ ສຳຫຼວດນະຄອນຈີໜານ ແຂວງຊານຕົງ ແຕ່ວັນທີ 8-12 ກັນຍາ 2019 ຜ່ານມາ ເຊິ່ງເປັນຄັ້ງທຳອິດ ທີ່ຕາງໜ້າໃຫ້ແກ່ສຳນັກຂ່າວໜັງສືພິມຈຳປາໃໝ່ ໃນນາມຕົວແທນສື່ມວນຊົນຈາກ ສປປລາວ. ການເຂົ້າຮ່ວມຄັ້ງນີ້ ຄະນະພວກເຮົາເຫັນວ່າມີຄວາມປະທັບໃຈ ແລະ ໄດ້ບົດຮຽນຫຼາຍຢ່າງ ເພື່ອມາແລກປ່ຽນປະສົບການກັບບັນດາທ່ານຜູ້ອ່ານ ໂດຍສະເພາະແມ່ນການພັດທະນາດ້ານເສດຖະກິດໃນຂະແໜງອຸດສະຫະກຳທີ່ເຂັ້ມແຂງ, ດ້ານວັດທະນະທຳ, ການຮັກສາສິ່ງແວດລ້ອມສີຂຽວ ແລະ ການບໍລິການ.

ນະຄອນຈີໜານເປັນເມືອງເອກຂອງແຂວງຊານຕົງ,ມີປະຊາກອນອາໄສຢູ່ປະມານ 10 ລ້ານຄົນ,ເປັນແຂວງທີ່ຕັ້ງຢູ່ໃກ້ກັບແຄມຊາຍຝັ່ງທະເລຂອງປະເທດຈີນ ທີ່ໄດ້ຮັບການພັດທະນາທາງດ້ານເສດຖະກິດ ແລະ ວັດທະນະທຳທີ່ຈະເລີນຮຸ່ງເຮືອງ. ເປັນໜຶ່ງໃນບັນດາແຂວງທີ່ໃຫຍ່ເປັນອັນດັບ 2 ຂອງຈີນ ທີ່ເປັນສູນກາງທາງດ້ານການເມືອງ,ເສດຖະກິດ,ວັດທະນະທຳ ແລະ ການເງິນ ທີ່ມີການຂະຫຍາຍຕົວໄວຂອງ ຈີດີພີ ໃນປີ 2018 ສຳລັບນະຄອນ ຈີໜານ ປະຊາກອນມີລາຍຮັບສະເລ່ຍ 39.944 ຢ໋ວນ ຫຼື ປະມານ 5.698 ໂດລາຕໍ່ຄົນຕໍ່ປີ. ສ່ວນລາຍຮັບສະເລ່ຍໃນທົ່ວແຂວງບັນລຸໄດ້ 29.205 ຢ໋ວນ ຫຼື ປະມານ 4.166 ໂດລາຕໍ່ຄົນຕໍ່ປີ ເຊິ່ງຈັດເປັນແຂວງທີ່ລ້ຳລວຍເປັນອັນດັບ 8 ຂອງປະເທດ.
ນະຄອນຈີໜານຕັ້ງຢູ່ເຊິ່ງໜ້າພູເຂົາໄຕ່ຊານໄປທາງທິດໃຕ້ ແລະ ເປັນທີ່ຮູ້ຈັກດີໃນນາມເມືອງບໍ່ນ້ຳພຸທາງທຳມະຊາດ ທີ່ມີຫຼາຍກວ່າ 800 ແຫ່ງ ໃນນັ້ນບໍ່ນ້ຳພຸທີ່ມີຊື່ສຽງກວ່າໝູ່ມີ 72 ແຫ່ງເຊັ່ນ: ບໍ່ນ້ຳພຸ ເບົ້າຕູ ທີ່ໄດ້ຮັບການຍົກຍ້ອງວ່າເປັນແຫ່ງທຳອິດ ຢູ່ໃຕ້ສະຫວັນ ໃນສະໄໝເຈົ້າຈັກກະພັດ ສຽນຫຼົງ ແຫ່ງລາຊະວົງຊິງ. ພູມີທັດຂອງບໍ່ນ້ຳພຸ ໄດ້ກາຍເປັນເອກະລັກຂອງນະຄອນຊີໜານ ເຊິ່ງໄດ້ຈົດເຂົ້າໃນບັນຊີລາຍຊື່ສະຖານທີ່ມໍລະດົກໂລກທາງວັດທະນະທຳໃນຕົ້ນເດືອນມິຖຸນາ 2019.

ຢູ່ທີ່ນີ້ປະກອບມີບໍ່ນ້ຳພຸທະເລສາບພຽງແຫ່ງດຽວຂອງຈີນເທົ່ານັ້ນ ທີ່ເກີດຂຶ້ນຕາມທຳມະຊາດ ໃນນັ້ນປະກອບມີທະເລສາບ ດ້າໝິງ ແລະ ລຽບຕາມແຄມແມ່ນໍ້າຮູ້ເສີງ ຫຼື ຄູເມືອງ ທີ່ໄດ້ຮັບການຈັດງານບຸນປະເພນີປະຈຳປີໃນນາມເມືອງບໍ່ນ້ຳພຸນາໆຊາດມາແຕ່ປີ2013 ແລະ ຍັງເປັນເຈົ້າພາບຈັດກິດຈະກຳຕ່າງໆເຊັ່ນ: ການຈັດກອງປະຊຸມພັນທະມິດ ເມືອງພູມີທັດທຳມະຊາດ ແລະ ວັດທະນະທຳບໍ່ນ້ຳພຸ, ພິທີສັກກາລະບູຊາບໍ່ນ້ຳພຸ, ງານວາງສະແດງມໍລະດົກວັດທະນະທຳທີ່ບໍ່ມີຕົວຕົນ ແລະ ວັດທະນະທຳພື້ນບ້ານຂອງນະຄອນຊີໜານທີ່ໄດ້ຮັບຄວາມສົນໃຈຈາກທົ່ວໂລກ
ຕົວເມືອງໄດ້ປະສານກົມກຽວຢ່າງແຂງແຮງ ໃນໂຄງການເຊື່ອມຕໍ່ ສາຍພານ ແລະ ເສັ້ນທາງການຂົນສົ່ງ ທີ່ສະໜອງການເຊື່ອມຈອດທາງລົດໄຟລະຫວ່າງຈີນໄປເຖິງເອີຣົບ ແລະ ການເຊື່ອມໂຍງຈາກປະເທດຈີນໄປຫາອາຊີກາງ. ໃນປີ 2018 ການນຳເຂົ້າ ແລະ ສົ່ງອອກຂອງນະຄອນຊີໜານມີມູນຄ່າທັງໝົດ82,5 ຕື້ຢວນ ເພີ່ມຂຶ້ນພາຍໃນປີ 16,2%. ດ້ານອຸດສະຫະກຳກໍ່ໄດ້ຮັບການພັດທະນາໃນ 10 ຂະແໜງການສຳຄັນເຊັ່ນ: ດ້ານໄອທີ, ເຄື່ອງມືອຸປະກອນທີ່ກ້າວໜ້າ, ອຸດສະຫະກຳການຜະລິດລົດຍົນທີ່ເປັນແຖວໜ້າໃນດ້ານອຸດສະຫະກຳຂອງປະເທດຈີນຕັ້ງຢູ່ນະຄອນຈີໜານ, ເຂດພັດທະນາເສດຖະກິດເສລີການຄ້າ ແລະ ວິທະຍາສາດການແພດທີ່ກ້າວໜ້າ.

ໂດຍ:ມົນທຽນ ໄຊຍະສິດ