ໂຮງຮຽນອະນຸບານ+ປະຖົມພຸດທະພອນ ໄດ້ຮັບການອະນຸມັດສ້າງຕັ້ງເປັນກຳມະບານຮາກຖານຢ່າງເປັນທາງການ

0
143

ໃນຕອນເຊົ້າຂອງວັນທີ 20 ກັນຍາ 2019 ໂຮງຮຽນອະນຸບານ+ປະຖົມພຸດທະພອນ ໄດ້ມີການຈັດພິທີປະກາດສ້າງຕັ້ງກຳມະບານຮາກຖານ ແລະ ຮັບມະຫາຊົນກ້າວໜ້າເຂົ້າເປັນສະມາຊິກກຳມະບານໃໝ່ ຂື້ນຢ່າງເປັນທາງການທີ່ສະໂມສອນຂອງໂຮງຮຽນດັ່ງກ່າວ, ໂດຍການເຂົ້າຮ່ວມໃນພິທີຂອງສະຫາຍ ບຸນຍໍ ວໍລະສັກສິດ ກຳມະການພັກນະຄອນ ປະທານຄະນະບໍລິຫານງານສະຫະພັນກຳມະບານນະຄອນໄກສອນພົມວິຫານ, ມີສະຫາຍ ນາງ ດວງມາ ບຸດສະບົວບານ ຜູ້ອຳນວຍການໂຮງຮຽນອະນຸບານ+ປະຖົມພຸດທະພອນ ພ້ອມດ້ວຍແຂກ ແລະ ຄູອາຈານຂອງຕົນເຂົ້າຮ່ວມຈຳນວນ 20 ສະຫາຍ, ຍິງ 13 ສະຫາຍ.

ເຊິ່ງໃນນັ້ນຍັງໄດ້ມີການຜ່ານຂໍ້ຕົກລົງຂອງປະທານຄະນະບໍລິຫານງານສະຫະພັນກຳມະບານນະຄອນ ວ່າດ້ວຍການສ້າງຕັ້ງກຳມະບານຮາກຖານໂຮງຮຽນອະນຸບານ+ປະຖົມພຸດທະພອນ ໂດຍການບົ່ງຕົວແຕ່ງຕັ້ງໃຫ້ສະຫາຍ ນາງ ພອນສະຫວັນ ໄຊຍະວົງສິນ ເປັນປະທານກຳມະບານຮາກຖານ, ສະຫາຍ ນາງ ດາວລຳໄຟ ໄຊຍະລາດ ເປັນຮອງປະທານ, ທັງເປັນປະທານກວດກາ ແລະ ສະຫາຍ ສອນນາລີ ພວງທຳ ເປັນຮອງປະທານ. ພ້ອມນີ້ກໍ່ຍັງໄດ້ມີການອະນຸມັດຮັບເອົາມະຫາຊົນຜູ້ກ້າວໜ້າເຂົ້າເປັນສະມາຊິກກຳມະບານໃໝ່ຈຳນວນ 16 ສະຫາຍ, ຍິງ 11 ສະຫາຍຕື່ມອີກ.

ສະຫະພັນກຳມະບານແຂວງສະຫວັນນະເຂດ
ຂ່າວ -ພາບ:ວັນນະເລດ ມະນີວົງ.