ທ່ານ ບຸນເລດ ຈັນທອງທິບ ຜູ້ປະຈຳການພະແນກກະສິກຳ ແລະ ປ່າໄມ້ແຂວງສະຫວັນນະເຂດ ໄດ້ໃຫ້ສຳພາດຕໍ່ຜູ້ສື່ຂ່າວສະຖານີວິທະຍຸກະຈາຍສຽງຂອງພວກເຮົາວ່າ: ປີນີ້ແຂວງສະຫວັນນະເຂດຂອງພວກເຮົາໄດ້ຖືກຜົນກະທົບຈາກໄພນ້ຳຖ້ວມຢ່າງໜັກໜ່ວງ ເຊິ່ງມັນໄດ້ສ້າງຄວາມເສຍຫາຍໃຫ້ແກ່ຜົນຜະລິດດ້ານກະສິກຳ ແລະ ລະບົບຊົນລະປະທານເປັນຈຳນວນມູນຄ່າມະຫາສານ ໃນນັ້ນທົ່ວແຂວງມີເນື້ອທີ່ນາຖືກຖ້ວມທັງໝົດ 49.900 ເຮັກຕາ,ເສຍຫາຍ 80% ເທົ່າກັບ 39.900 ເຮັກຕາ ເສຍຫາຍຫຼາຍກວ່າໝູ່ມີ 4 ເມືອງຄື:

ເມືອງຈຳພອນ,ສອງຄອນ,ຊົນນະບູລີ ແລະ ເມືອງໄຊບູລີ ລວມມູນຄ່າຄວາມເສຍຫາຍສະເພາະເຂົ້ານາປີແມ່ນ 249 ຕື້ກີບ. ເພື່ອເປັນການທົດແທນຄືນຕໍ່ຜົນເສຍຫາຍຄັ້ງນີ້ ທາງພະແນກກະສິກຳ ແລະ ປ່າໄມ້ແຂວງຍັງມີແຜນຜະລິດເຂົ້ານາແຊງໃນເນື້ອທີ່ 30.000 ເຮັກຕາ. ສະນັ້ນຈຶ່ງໄດ້ເລັ່ງໃສ່ຢ່າງຮີບດ່ວນໃນ 3 ວຽກງານໃຫຍ່ເພື່ອໃຫ້ທັນກັບການຜະລິດໃນລະດູແລ້ງນີ້ຄື: ເລັ່ງໃສ່ສ້ອມແປງຈັກສູບນ້ຳ,ລະດົມກຳລັງແຮງຂອງປະຊາຊົນສ້ອມແປງຄອງເໝືອງບ່ອນທີ່ມັນເປ້ເພເສຍຫາຍເລັກໜ້ອຍ,ຖ້າຫາກຈຸດໃດເປ້ເພໜັກເຫຼືອບ່າກວ່າແຮງຂອງປະຊາຊົນ ທາງພະແນກກະສິກຳ ແລະ ປ່າໄມ້ແຂວງກໍ່ຈະໄດ້ນຳໃຊ້ເຄື່ອງກົນຈັກເຂົ້າໄປຊ່ວຍ ແລະ ວຽກງານອັນທີສາມແມ່ນການຈັດຫາແນວພັນເຂົ້າ ໃນຈຳນວນ 1.800 ໂຕນໃສ່ການຜະລິດລະດູແລ້ງ ປັດຈຸບັນແຂວງມີແລ້ວ 800 ໂຕນ ແລະ ຍັງຈະຕ້ອງໄດ້ຊອກຫາຕື່ມອີກຈຳນວນ 1.000 ໂຕນ

ທ່ານ ບຸນເລດ ຈັນທອງທິບ ຍັງເວົ້າຕື່ມອີກວ່າ: ນອກຈາກການກະກຽມເລັ່ງໃສ່ການຜະລິດເຂົ້ານາແຊງແລ້ວ ທາງພະແນກກະສິກຳ ແລະ ປ່າໄມ້ແຂວງຍັງມີແຜນຊຸກຍູ້ສົ່ງເສີມໃຫ້ປະຊາຊົນບ່ອນທີ່ບໍ່ມີລະບົບຊົນລະປະທານ ຫັນມາປູກພືດລະດູແລ້ງເປັນຕົ້ນແມ່ນປູກ ໝາກໂມ,ໝາກແຕງ,ສາລີ ແລະ ພືດຜັກຊະນິດຕ່າງໆໃຫ້ກາຍເປັນສິນຄ້າຕື່ມອີກ.

ພາບ – ຂ່າວ: ອັກສອນສິນ ພົມມະຈັນ