ເພື່ອເປັນການບັນເທົາທຸກໃຫ້ແກ່ພໍ່ແມ່ປະຊາຊົນທີ່ຖືກຜົນກະທົບຈາກອຸທົກກະໄພ ຢູ່ບັນດາແຂວງພາກໃຕ້ ໃນໄລຍະຜ່ານມາ ເຊິ່ງໄດ້ສ້າງຄວາມເສຍຫາຍໃຫ້ກັບພໍ່ແມ່ປະຊາຊົນຢ່າງຫຼວງຫຼາຍ ສະນັ້ນ ຄະນະບໍລິຫານງານຊາວໜຸ່ມແຂວງໄຊຍະບູລີ ຈິ່ງໄດ້ຕັ້ງຈຸດຮັບເຄື່ອງຊ່ວຍເຫຼືອບໍ່ວ່າຈະເປັນເງິນສົດ ແລະ ເຄື່ອງອຸປະໂພກ – ບໍລິໂພກ ເລີ່ມແຕ່ວັນທີ 9 ກັນຍາ 2019 ເປັນຕົ້ນມາ ໂດຍໄດ້ຮັບການບໍລິຈາກຈາກບັນດາ ຄຊປປລ ຮາກຖານ-ໜ່ວຍຮາກຖານຊາວໜຸ່ມພະແນກການອ້ອມຂ້າງແຂວງ, ໄຊຍະບູລີ ລວມເປັນມູນຄ່າທັງໝົດ 14 ລ້ານກວ່າກີບ.

ຈາກນັ້ນ ເພື່ອເປັນການສະແດງເຖິງຄວາມຮູ້ບຸນຄຸນຕໍ່ບັນດາ ຄຊປປລ ຮາກຖານ – ໜ່ວຍຮາກຖານຊາວໜຸ່ມ ທີ່ໄດ້ເສຍສະຫຼະວັດຖຸ, ເງິນ ເພື່ອຊ່ວຍເຫຼືອໃຫ້ແກ່ພໍ່ແມ່ປະຊາຊົນ ຜູ້ປະສົບໄພຢູ່ບັນດາແຂວງພາກໃຕ້ ຄະນະບໍລິຫານງານຊາວໜຸ່ມແຂວງໄຊຍະບູລີ ຈິ່ງໄດ້ຈັດພິທີມອບໃບສົມມະນາບຸນຄຸນ ໃຫ້ແກ່ພາກສ່ວນຕ່າງໆ ຂຶ້ນໃນວັນທີ 24 ກັນຍາ 2019 ຢູ່ທີ່ຫ້ອງປະຊຸມຫ້ອງການຄະນະບໍລິຫານງານຊາວໜຸ່ມແຂວງ ໄຊຍະບູລີ ໂດຍພາຍໃຕ້ການເປັນປະທານຂອງ ສະຫາຍ ໜູໄຊ ນໍກີຢາ ເລຂາຄະນະບໍລິຫານງານຊາວໜຸ່ມແຂວງ, ມີບັນດາທ່ານຄະນະ ຊປປລ ຮາກຖານ – ຄະນະໜ່ວຍຊາວໜຸ່ມຮາກຖານ ເຂົ້າຮ່ວມຢ່າງພ້ອມພຽງ ເຊິ່ງໄດ້ມອບໃບສົມມະນາບຸນຄຸນ ຈໍານວນ 7 ໃບ ແລະ ໃບຊົມເຊີຍ ຈໍານວນ 28 ໃບ ໃຫ້ແກ່ຄະນະຊາວໜຸ່ມປະຊາຊົນ ປະຕິວັດລາວຮາກຖານ ແລະ ຄະນະໜ່ວຍຮາກຖານຊາວໜຸ່ມທີ່ໄດ້ປະກອບສ່ວນຊ່ວຍເຫຼືອໃນຄັ້ງນີ້ ເຊິ່ງເປັນກຽດມອບໂດຍ ສະຫາຍ ໜູໄຊ ນໍກີຢາ ເລຂາຄະນະບໍລິຫານງານຊາວໜຸ່ມແຂວງໄຊຍະບູລີ.