ໃນຕອນເຊົ້າວັນທີ 24 ກັນຍາ 2019ນີ້ຢູ່ທີ່ຫ້ອງປະຊຸມພະແນກຖະແຫຼງຂ່າວ, ວັດທະນະທຳ ແລະ ທ່ອງທ່ຽວແຂວງສະຫວັນນະເຂດ ໄດ້ຈັດກອງປະຊຸມເລືອກຕັ້ງຄະນະກຸ່ມທຸລະກິດທ່ອງທ່ຽວ, ໂຮງແຮມ ເຮືອນພັກ ແລະ ຮ້ານອາຫານ – ບັນເທິງພາຍໃນແຂວງສະຫວັນນະເຂດ. ໂດຍການເຂົ້າຮ່ວມຂອງທ່ານ ສີຫາ ພັນນະວົງ ຮອງຫົວໜ້າພະແນກຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ.

ທ່ານ ສອນທະວົງ ເຄນນະວົງ ປະທານກຸ່ມບໍລິສັດທ່ອງທ່ຽວກໍ່ໄດ້ຜ່ານສະພາບການເຄື່ອນໄຫວທຸລະກິດທ່ອງທ່ຽວໃນໄລຍະຜ່ານມາວ່າ: ທຸລະກິດທ່ອງທ່ຽວແມ່ນພາກສ່ວນຫນຶ່ງທີ່ສ້າງລາຍຮັບໃຫ້ແກ່ເສດຖະກິດແຫ່ງຊາດເວົ້າລວມເວົ້າສະເພາະເສດຖະກິດຂອງແຂວງສະຫວັນນະເຂດ,ແຕ່ປະຈຸບັນນີ້ເສດຖະກິດດ້ານການທ່ອງທ່ຽວເຫັນວ່າລຸດລົງຖ້າທຽບໃສ່ໄລຍະກ່ອນຫນ້ານີ້ສະແດງອອກ ໃນສະຖິຕິການທ່ອງທ່ຽວຂອງແຂວງສະຫວັນນະເຂດໃນຕົ້ນປີ 2013 ຂຽນໂດຍຂະແຫນງທ່ອງທ່ຽວ (ພະແນກຖະແຫຼງຂ່າວ ວັດຖະນະທໍາແລະທ່ອງທ່ຽວ )ເຫັນວ່ານັກທ່ອງທ່ຽວລຸດລົງ, ຜ່ານການບໍລິການບໍລິສັດທ່ອງທ່ຽວແຫ່ງລຸດລົງຫຼາຍ, ດ້ານການຈັດຕັ້ງ ບໍລິສັດໄດ້ເສຍພັນທະໃຫ້ລັດຕາມລະບຽບກົດຫມາຍເຊັ່ນ:ພັນທະອາກອນໃຫ້ລັດ,ພັນທະກອງທຶນທ່ອງທ່ຽວແລະພັນທະຕ່າງໆທີ່ກ່ຽວຂ້ອງກັບບໍລິສັດໄດ້ເປັນປົກກະຕິ,ໄດ້ເຮັດກາຂອງກຸ່ມໄດ້ສໍາເລັດ ແລະ ອອກມານໍາໃຊ້ຢ່າງເປັນທາງການ,ສະມາຊິກຂອງກຸ່ມມີຜົນງານດີໄດ້ຮັບລາງວັນການພັດທະນາການທ່ອງທ່ຽວດີເດັ່ນແລະຍືນຍົງຂອງ ສປປລາວ ມີ 2 ບໍລິສັດເຊັ່ນ: ບໍລິສັດ ໂກເດີ້ນແລັນທ່ອງທ່ຽວ,ບໍລິສັດລັດຕະນະວົງທ່ອງທ່ຽວ ໄດ້ຮ່ວມກັນຮັບແຂກຂະບວນຈູດບັ້ງໄຟຈາກປະເທດໄທຈັດຂື້ນທີ່ເມືອງໄຊພູທອງ ກະຈາຍລາຍໄດ້ໃຫ້ສັງຄົມຫຼາຍພໍສົມຄວນ, ຈັດຂະບວນລົດຖີບຈາກແຂວງສະຫວັນນະເຂດໄປນະຄອນພະນົມປະເທດໄທ 1 ຄັ້ງ,ຮັບຂະບວນຄາລະວານລົດຖີບຈາກນະຄອນພະນົມມາແຂວງສະຫວັນນະເຂດໄດ້ 1 ຄັ້ງ, ໄດ້ເຂົ້າຮ່ວມເປີດຮ້ານງານວາງສະແດງໂຄສະນາວຽກງານທ່ອງທ່ຽວຢູ່ສະຫວັນໄອເຕັກໄດ້ 2 ຄັ້ງ.

ຈາກນັ້ນໃນກອງປະຊຸມກໍ່ໄດ້ມີການປ່ອນບັດເລືອກຕັ້ງເອົາຄະນະປະທານກຸ່ມທຸລະກິດ ທ່ອງທ່ຽວເຊິ່ງລົງສະມັກເລືອກຕັ້ງມີ 5 ທ່ານ ເລືອກເອົາ 3 ທ່ານ ແລະ ຜົນຂອງການຂັດເລືອກໄດ້ ທ່ານ ນາງ ວິໄລວັນ ຈັນທະວົງ ເປັນປະທານ, ທ່ານ ສິງຄຳ ລັດຕະນະວົງເປັນຮອງ, ທ່ານ ວັງດິງ ໄຊຍະວົງເປັນກຳມະການ, ແລະ ກຸ່ມເຮືອນພັກ,ຮ້ານອາຫານ – ບັນເທິງ ສະມັກເລືອກຕັ້ງມີ 10ທ່ານ ເລືອກເອົາ 5 ທ່ານ ເຊິ່ງເລືອກໄດ້ ທ່ານ ວົງວິຫານ ຂັນທະນະວົງ ເປັນປະທານ, ທ່ານ ພຸດສະຫວັດ ແກ້ວຫານາມເປັນຮອງ, ທ່ານ ນາງອິນ ປອນ ເປັນຮອງ, ທ່ານ ທອງລາ ຊອນວິຫານ ເປັນຄະນະກຳມະການ ແລະ ທ່ານ ນາງ ອຳພອນ ຍົດໄຊວິບູນ ເປັນຄະນະກຳມະການ.
ຈາກນັ້ນ ທ່ານ ສີຫາ ພັນນະວົງ ຮອງຫົວໜ້າພະແນກຖະແຫຼງຂ່າວວັນທະນະທຳ ແລະ ທ່ອງທ່ຽວແຂວງ ກໍ່ໄດ້ມີຄຳເຫັນໂອ້ລົມຕໍ່ຄະນະປະທານກຸ່ມຊຸດໃຫມ່ວ່າ: ຜົນການປ່ອນບັດເລືອກຕັ້ງຄະນະຊຸດໃຫມ່ໃນມື້ນີ້ກໍ່ຖືວ່າບັນລຸຕາມເປົ້າໝາຍທີ່ວາງໄວ້ ແລະ ຂໍຮຽກຮ້ອງເຖິງນັກປະກອບການ,ນັກທຸລະກິດ ໃຫ້ມີຄວາມສາມັກຄີກັນ ບັນດາຄະນະກຸ່ມໃຫມ່ຕ້ອງໃສ່ໃຈສືບຕໍ່ເລື່ອງການຈັດການກ່ຽວກັບເຮືອນພັກ,ຮ້ານອາຫານ-ບັນເທິງເພື່ອໃຫ້ເຂົ້າສູ່ລະບົບປະກອບກົດໝາຍ ແລະ ຝາກເຖິງຄະນະກຸ່ມໃໝ່ໃຫ້ຕັ້ງອົກຕັ້ງໃຈເຮັດວຽກໃຫ້ໄດ້ຕາມໝາກຜົນ ແລະ ສະມາຊິກປະກອບການກໍ່ໃຫ້ຄວາມຮ່ວມມືກັບຄະນະ.

ຂ່າວ:ວິລັດດາ ດວງຈັນທາ