ໃນວັນທີ 17 ກັນຍາ 2019 ນີ້, ຫ້ອງການແຮງງານ ແລະ ສະຫວັດດີການ-ສັງຄົມ ເມືອງປາກຊ່ອງ ແຂວງຈຳປາສັກ ໄດ້ຈັດກອງປະຊຸມສະຫຼູບສັງລວມຜົນກະທົບໄພພິບັດທຳມະຊາດ ( ໄພນ້ຳຖ້ວມ ) ຂື້ນຢູ່ທີ່ສະໂມສອນຂອງເມືອງ ໂດຍການເປັນປະທານຂອງ ທ່ານ ດ້າຍຄຳ ຄຳອຸ່ນເຮືອງ ຮອງເຈົ້້າເມືອງໆປາກຊ່ອງ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດ ຂັ້ນເມືອງ, ມີບັນດາທ່ານຄະນະພັກຮາກຖານກຸ່ມບ້ານ, ຫົວໜ້າຄະນະຫ້ອງການອ້ອມຂ້າງ, ຂະແໜງການກ່ຽວຂ້ອງ ແລະ ຄະນະກຳມະການປ້ອງກັນ ແລະ ຄວບຄຸມໄພພິບັດຂອງເມືອງ ເຂົ້້າຮ່ວມ.

ທ່ານ ສົມຈິດ ໄຊອາສາ ຫົວໜ້າຫ້ອງການແຮງງານແລະສະຫວັດດີການ-ສັງຄົມ ເມືອງປາກຊ່ອງ ລາຍງານໃຫ້ຮູ້ວ່າ: ນັບແຕ່ວັນທີ 1 – 9 ກັນຍາ 2019 ໄດ້ມີພະຍຸ ໂພດຸ ແລະ ຣີຟຣິກກຊັ້ນ ເຄື່ອນທີ່ເຂົ້້າສູ່ 4 ແຂວງພາກໃຕ້ ເວົ້າລວມເວົ້າສະເພາະຢູ່ເມືອງປາກຊ່ອງ ປະຊາຊົນໄດ້ຮັບຜົນກະທົບຈາກພະຍຸດັ່ງກ່າວ ທັງໝົດ 61 ບ້ານ, 2.839 ຫຼັງຄາ, 3003 ຄອບຄົວ, ຈຳນວນພົນລະເມືອງ 14.739 ຄົນ ໃນນັ້ນນ້ຳຖ້ວມພືດຜັກ 725,3 ເຮັກຕາ,​ ໄມ້ໃຫ້ໝາກ 131 ເຮັກຕາ, ໜອງປາ 221 ເຮັກຕາ, ນ້ຳຖວ້ມນາ 252,2 ເຮັກຕາ, ງົວ, ໝູ, ແບ້ ແລະ ສັດປີກ ຈຳນວນໜຶ່ງ ລົ້ມຕາຍ. ນອກນີ້ ເສັ້ນທາງຂວາຂ້າມນ້ຳ 2 ແຫ່ງ ຄື: ຂົວຫ້ວຍຈຳປີ ແລະ ຂົວຫ້ວຍຄົດ ກຸ່ມບ້ານທີ 4​ ຂອງເມືອງຖືກຕັດຂາດ, ສະຖານທີ່ທ່ອງທ່ຽວ 5 ແຫ່ງ ແລະ ໂຮມສະເຕ 1 ແຫ່ງ ໄດ້ຮັບຄວາມເສຍຫາຍ. ຕໍ່ກັບສະພາບ ແລະ ເຫດການດັ່ງກ່າວເຮັດໃຫ້ ປະຊາຊົນບ້ານຫຼັກ 40 ກຸ່ມ 3 ຂອງເມືອງ ທີ່ຂ້າມໄປເຮັດໄຮ່ ຢູ່ພາກຫ້ວຍ ຖືກສາຍນ້ຳພັດໄປ 2 ຄົນ ສູນຫາຍ 1 ຄົນ. ຈາກນັ້ນໃນກອງປະຊຸມຜູ້ເຂົ້້າຮ່ວມກໍ່ໄດ້ມີການປະກອບຄຳຄິດເຫັນປຶກສາຫາລືເອກະພາບກັນໃນການກຳນົດຕົວເລກ, ປະເມີນຜົນເສຍຫາຍ, ກຳນົດສ້າງແຜນ ເພື່ອສະເໜີຕໍ່ຂັ້ນເທິງ ກະກຽມບັນເທົາທຸກຕໍ່ປະຊາຊົນທີ່ໄດ້ຮັບຜົນກະທົບ. ໂອກາດດຽວກັນນີ້ ທ່ານ ດ້າຍຄໍາ ຄໍາ ອຸ່ນເຮືອງ ຮອງເຈົ້້າເມືອງໆປາກຊ່ອງ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດ ຂອງເມືອງ ກໍ່ໄດ້ໂອ້ລົມ ເຊິ່ງທ່ານໄດ້ຊີ້ນຳໃຫ້ຜູ້ເຂົ້້າຮ່ວມ ໂດຍສະເພາະຄະນະກຳມະການປ້ອງກັນ ແລະ ຄວບຄຸມໄພພິບັດ ຂອງເມືອງ ຈົ່ງໄດ້ເພີ່ມທະວີ ຄວາມສາມັກຄີ, ເອົາໃຈໃສ່ສືບຕໍ່ເຄື່ອນໄຫວຈັດຕັ້ງປະຕິບັດ ເກັບກຳຂໍ້ມູນ ທີ່ຍັງຄົງຄ້າງໃຫ້ສຳເລັດໂດຍໄວ.

ພາບ-ຂ່າວ: ສອນໄຊ ຖວທ ເມືອງປາກຊ່ອງ