ວັນທີ 19 ກັນຍາ 2019, ໄດ້ມີພິທີປະກາດແຕ່ງຕັ້ງຮອງຫົວໜ້າພະແນກການເງິນແຂວງຈໍາປາສັກ ພ້ອມທັງປະກາດແຕ່ງຕັ້ງຫົວໜ້າ, ຮອງຫົວໜ້າຂະແໜງຈັດຕັ້ງ-ບໍລິຫານ ຂຶ້ນ ຢູ່ພະແນກດັ່ງກ່າວ ໂດຍການເຂົ້າຮ່ວມຂອງ ທ່ານ ນິພອນ ວຽງປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ, ທ່ານ ສິດທິສອນ ເທບພາສີ ຫົວໜ້າກົມຈັດຕັ້ງກະຊວງການເງິນ, ທ່ານ ສົມບູນ ເຮືອງວົງສາ ຫົວໜ້າພະແນກການເງິນແຂວງ. ການນໍາຈາກພະແນກການກົມກອງທີ່ກ່ຽວຂ້ອງອ້ອມຂ້າງແຂວງ, ການນໍາຫ້ອງການ ການເງິນ 9 ເມືອງ, 1 ນະຄອນ ແລະ ພະນັກງານວິຊາການທີ່ກ່ຽວຂ້ອງ ເຂົ້າຮ່ວມ.

ໃນພິທີ ໄດ້ຜ່ານຂໍ້ຕົກລົງຂອງທ່ານເຈົ້າແຂວງໆຈໍາປາສັກ ສະບັບເລກທີ 1104/ຈຂ.ຈສ ແລະ ສະບັບເລກທີ 1103/ຈຂ.ຈສ, ລົງວັນທີ 13 ກັນຍາ 2019 ວ່າດ້ວຍການແຕ່ງຕັ້ງ ທ່ານ ວັນທອງ ແກ້ວມະນີວົງສ໌ ຫົວໜ້າຂະແໜງຈັດຕັ້ງ ແລະ ບໍລິຫານພະແນກການເງິນ ເປັນຮອງຫົວໜ້າພະແນການເງິນແຂວງ; ແຕ່ງຕັ້ງ ທ່ານ ນາງ ຄໍາຄັດ ພິມສີດາ ຮອງຫົວໜ້າຂະແໜງຈັດຕັ້ງ-ບໍລິຫານ ເປັນຫົວໜ້າຂະແໜງຈັດຕັ້ງ-ບໍລິຫານ; ແຕ່ງຕັ້ງ ທ່ານ ໄຊຊະນະ ສຸກພົງສະຫວັດ ຫົວໜ້າຈຸງານເລຂາ ແລະ ສັງລວມ ເປັນຮອງຫົວໜ້າຂະແໜງຈັດຕັ້ງ-ບໍລິຫານ. ນອກນີ້ ຍັງໄດ້ຜ່ານຂໍ້ຕົກລົງຂອງຫົວໜ້າພະແນກການເງິນແຂວງ ສະບັບເລກທີ 505/ກງຂ, ລົງວັນທີ 16 ກັນຍາ 2019 ວ່າດ້ວຍການຕົກລົງຍົກຍ້າຍ ທ່ານ ທະວີພອນ ວົງກັນຫາ ຮອງຫົວໜ້າຂະແໜງບັນຊີ ມາເປັນຮອງຫົວໜ້າຂະແໜງຈັດຕັ້ງ-ບໍລິຫານ ພະແນກການເງິນແຂວງ.
ຕອນທ້າຍພິທີ ທ່ານນິພອນ ວຽງປະເສີດ ຮອງເລຂາພັກແຂວງ ຫົວໜ້າຄະນະຈັດຕັ້ງແຂວງ ກໍ່ໄດ້ໃຫ້ກຽດມີຄໍາເຫັນໂອ້ລົມ ຕື່ມອີກ ເພື່ອໃຫ້ຜູ້ທີ່ຖືກແຕ່ງຕັ້ງ, ຍົກຍ້າຍ ໃນຄັ້ງນີ້ ຖືເປັນບ່ອນອີງໃນການເຄື່ອນໄຫວວຽກງານ ໃຫ້ມີຜົນສໍາເລັດຕາມຄາດໝາຍທີ່ວາງໄວ້.

ຂ່າວ-ພາບ: ທູນທອງໃຈ ໜັງສືພິມຈຳປາໃຫມ່