ເຈົ້າເມືອງອາດສະພອນ ມອບທີ່ດິນ ແລະອຸປະກອນກໍ່ສ້າງອາຄານເຮືອນ

0
449

ພິທີມອບ-ຮັບທີ່ດິນ ແລະ ວັດສະດຸກໍ່ສ້າງເຮືອນໃຫ້ປະຊາຊົນ ພາຍໃຕ້ໂຄງການຈັດສັນພູມລຳເນົາທີ່ຢູ່ອາໄສຖາວອນ ໄດ້ຈັດຂື້ນໃນວັນທີ 23 ກັນຍາ 2019 ທີ່ບ້ານຫ້ວຍງົວຄຳ ເມືອງອາດສະພອນ ແຂວງສະຫວັນນະເຂດ ໂດຍການເຂົ້າຮ່ວມຂອງ ທ່ານ ປອ ແສງທອງ ວັງແກ້ວມະນີ ກຳມະການພັກແຂວງ ເລຂາພັກເມືອງ ເຈົ້າເມືອງອາດສະພອນ, ມີ ທ່ານ ສີພັນ ສສຸວັນນະສານ ຮອງເລຂາພັກເມືອງ ຮອງເຈົ້າເມືອງ, ພ້ອມດ້ວຍບັນດາທ່ານຫົວໜ້າຫ້ອງການກ່ຽວຂ້ອງ, ອຳນາດການປົກຄອງບ້ານ ແລະພໍ່ແມ່ປະຊາຊົນເຂົ້າຮ່ວມ.

ໂອກາດນິ້ ທ່ານ ສະຫງວນ ຮົ່ມໂພສີ ກຳມະການພັກເມືອງ ຫົວໜ້າຈຸດສຸມນາເລົ່າກໍ່ໄດ້ລາຍງານ ສະພາບການຈັດຕັ້ງປະຕິບັດໂຄງການຈັດສັນພູມລຳເນົາທີ່ຢູ່ອາໄສຖາວອນບ້ານດົງຂັນຄຳ-ບ້ານຫ້ວຍງົວຄຳ ເຊິ່ງທັງສອງບ້ານ ມີ 287 ຫຼັງ, ມີ 311 ຄອບຄົວ, ມີພົນລະເມືອງທັງໝົດ 1.685 ຄົນ, ຍິງ 817 ຄົນ, ມີຄອບຄົວທຸກຍາກ 178 ຄອບຄົວ, ເຊິ່ງກວມເອົາ 57,33%. ທັງສອງບ້ານເປັນບ້ານໂຮມກັນເຂົ້າໂດຍປະຕິບັດຕາມຄຳສັ່ງເລກທີ 09/ກມສພ, ທີຕັ້ງຂອງທັງສອງບ້ານຫ່າງກັນປະມານ 2 ກມ ຈຶ່ງເຮັດໃຫ້ການເຕົ້າໂຮມຄວາມສາມັກຄີ ຫຼືການພົວພັນປະສານງານເຊິ່ງກັນ ແລະກັນມີຄວາມຫຍຸ້ງຍາກ, ປະຊາຊົນມີຄວາມເປັນຢູ່ຕິດພັນກັບທຳມະຊາດເປັນຕົ້ນຕໍ ທັງເປັນເຂດຫ່າງໄກສອກຫຼີກ, ດິນບ້ານຈັດສັນມີເນື້ອທີ່ທັງໝົດ 57 ແຮັກຕາ ໂດຍໄດ້ຈາການມອບຂອງປະຊາຊົນບ້ານດົງຂັນຄຳ ແລະບ້ານຫ້ວຍງົວຄຳ, ພາຍຫຼັງທີ່ໄດ້ຮັບການອຸນຸມັດຈາກລັດຖະບານ ກໍ່ໄດ້ເລີ່ມລົງມືຈັດຕັ້ງປະຕິບັດໂຄງການນັບແຕ່ວັນທີ 25 ພຶດສະພາ 2017 ເປັນຕົ້ນມາ,

ການມອບທີ່ດິນ ແລະວັດສະດຸກໍ່ສ້າງເຮືອນໃນຄັ້ງນີ້ ໄດ້ມອບໃຫ້ປະຊາຊົນ 9 ຄອບຄົວເຊິ່ງມີ 5 ລາຍການຄື: ຄອບຄົວໜຶ່ງຈະໄດ້ຮັບ ແທ່ງຫ້ອງນ້ຳ 4 ແທ່ງ, ເສົາເຮືອນ 9 ເສົາ, ປູນ 2 ສອບ, ບູລອງ 9 ອັນ ແລະຕະປູ 2 ໂລ ໃຫ້ກຽດມອບໂດຍ ທ່ານ ປອ ແສງທອງ ວັງແກ້ວມະນີ ໂດຍມີຕ່າງໜ້າແຕ່ລະຄອບຄົວກ່າວຮັບ. ໂອກາດດຽວກັນນີ້ ທ່ານເຈົ້າເມືອງ ກໍ່ຍັງໄດ້ນຳເຄື່ອງຊ່ວຍເຫຼືອມອບໃຫ້ຄອບຄົວທຸກຍາກບ້ານຫ້ວຍງົວຄຳ 93 ຄອບຄົວ ແລະບ້ານດົງຂັນຄຳອີກ 85 ຄອບຄົວ, ແລະມອບອຸປະກອນການຮຽນໃຫ້ນ້ອງນັກຮຽນ ໂຮງຮຽນປະຖົມຫ້ວຍງົວຄຳ ເປັນຕົ້ນແມ່ນ ກະເປົາ, ບິກ-ສໍ ແລະອຸປະກອນອື່ນໆອີກຈຳນວນໜຶ່ງ.

ພາບ ແລະ ຂ່າວ: ສົມຈິດ ແກ້ວສີຖາທິລາດ