ເມືອງສອງຄອນ ແຂວງສະຫວັນນະເຂດ ມີໂຮງຮຽນເຖິງ 7 ແຫ່ງ ຖືກນ້ຳຖ້ວມໜັກ ແລະ ຍັງບໍ່ສາມາດເປີດການຮຽນ-ການສອນໄດ້, ຕ້ອງໄດ້ລໍຖ້າການອະນາໄມ, ສ້ອມແປງ ແລະ ຈັດຊື້ອຸປະກອນ ໃໝ່ກ່ອນ.

ທ່ານ ພຸດທະວົງ ພົມມະຈັກ ຮອງເຈົ້າເມືອງສອງຄອນ, ຫົວໜ້າຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນເມືອງ ໄດ້ໃຫ້ສຳພາດໃນວັນທີ 23 ກັນຍາ 2019 ນີ້ວ່າ: ທົ່ວເມືອງສອງຄອນ ມີໂຮງຮຽນທັງໝົດ 13 ແຫ່ງ ຖືກນ້ຳຖ້ວມ ແລະ ໄດ້ຮັບຄວາມເສຍຫາຍ ຈາກໄພ ພິບັດໃນຄັ້ງນີ້, ເຊິ່ງປັດຈຸ ບັນ ພາກສ່ວນທີ່ກ່ຽວຂ້ອງ ລວມທັງຄູ-ອາຈານ ແລະ ນັກຮຽນ ກຳ ລັງສຸມໃສ່ວຽກງານອະນາໄມ ແລະ ສ້ອມແປງອຸປະກອນ ການຮຽນ-ການສອນຕ່າງໆ ເພື່ອໃຫ້ສາມາດເປີດຮຽນ ໄດ້ໂດຍພື້ນຖານ, ທັງນີ້ກໍເປັນການຮັບປະກັນ ໃຫ້ບັນລຸຕາມໂຄງການຫລັກສູດ ຂອງກະຊວງສຶກສາທິການ ແລະ ກິລາວາງອອກ.

ໂຮງຮຽນທີ່ຖືກນ້ຳຖ້ວມໜັກ ຍັງບໍ່ສາມາດເປີດການຮຽນ-ການສອນໄດ້

ທ່ານ ພຸດທະວົງ ພົມມະຈັກ ກ່າວວ່າ: ສາເຫດທີ່ພາໃຫ້ເປີດ ໂຮງຮຽນຊ້າກໍຍ້ອນວ່າ ບັນດາໂຮງ ຮຽນທີ່ຖືກນ້ຳຖ້ວມ ແມ່ນຍັງບໍ່ທັນສາມາດອະນາໄມໄດ້ທັງໝົດ, ເພາະບາງບ່ອນມີຕົມຫລາຍ ເຊິ່ງຕ້ອງ ໄດ້ລໍຖ້າໃຫ້ ແຫ້ງກ່ອນ ຈຶ່ງຈະສາມາດອະນາໄມໄດ້, ໂຕະຕັ່ງ, ກະດານດຳ ແລະ ອຸປະກອນອື່ນໆ ເສຍຫາຍໜັກ ແລະ ບາງອັນກໍບໍ່ສາມາດສ້ອມແປງໄດ້ ຕ້ອງໄດ້ລໍຖ້າງົບປະມານເພື່ອມາຈັດຊື້.

ໂຮງຮຽນຈຳນວນ 7 ແຫ່ງ ທີ່ບໍ່ທັນສາມາດເປີດຮຽນໄດ້ ມີ: ໂຮງຮຽນປະຖົມລະຫານ້ຳ, ໂຮງ ຮຽນປະຖົມ ທ່າລຽນຄຳ, ໂຮງຮຽນປະຖົມ ສອງຄອນ, ໂຮງຮຽນປະຖົມດົງສະຫວ່າງ, ໂຮງຮຽນປະຖົມ ດອນຂຽວ, ໂຮງຮຽນປະຖົມ ມັດທະຍົມສົມບູນ ລະຫານ້ຳ ແລະ ໂຮງຮຽນປະຖົມມັດ ທະຍົມສົມບູນ ສອງຄອນ.

ຢ່າງແນວໃດກໍຕາມ, ຂະແໜງສຶກສາທິການ ແລະ ກິລາ ເມືອງໜອງບົກ ຕ້ອງການງົບປະ ມານ 340 ກວ່າລ້ານກີບ ເພື່ອມາສ້ອມແປງ ແລະ ຊື້ອຸປະກອນຮັບໃຊ້ ການຮຽນ-ການສອນ ທີ່ໄດ້ຮັບຄວາມເສຍຫາຍ ຈາກນ້ຳຖ້ວມ ເພື່ອເຮັດໃຫ້ການຮຽນ-ການສອນ ຢູ່ໃນເມືອງສອງຄອນດຳເນີນ ເປັນປົກກະຕິ. ສຳລັບວຽກງານອະນາໄມ ແລະ ສ້ອມແປງ ແມ່ນຈະພະຍາຍາມ ໃຫ້ສຳເລັດພາຍໃນເດືອນກັນຍາ ແລະ ຄາດຄະເນໃຫ້ສາມາດເປີດຮຽນ ເປັນປົກກະຕິໃນຕົ້ນເດືອນຕຸລານີ້.