ພິທີປະກາດຮັບຮອງເອົາຄະນະພັກຊຸດໃໝ່ສະໄໝທີ V ກອງພັນໃຫຍ່ 644 ໄດ້ຈັດຂື້ນໃນວັນທີ 24 ກັນຍາ 2019 ທີ່ຜ່ານມານີ້. ພາຍໄຕ້ການເປັນປະທານຂອງທ່ານ ພົວ ວົງສອນ ອິນປານພິມ ຄະນະພັກກະຊວງປ້ອງກັນປະເທດ – ຮອງຫົວໜ້າກົມໃຫຍ່ການເມືອງກອງທັບ ມີບັນດາແຂກທີ່ຖືກເຊື້ອເຊີນຈາກກົມຈັດຕັ້ງພັກ, ກົມປ້ອງກັນອາກາດ, ມີການນຳເມືອງອຸທຸມພອນ, ກອງພົນທີ 4 ໂຮງໝໍບໍລິເວນ 109, ໂຮງງານປະສານເຫຼົ່າພາກກາງ, ສາງອໍ 4, ສາງນ້ຳມັນເຊື້ອໄຟເລກ 9 ແລະ ສະມາຊິກພັກທົ່ວກອງພັນໃຫຍ່ 644 ເຂົ້າຮ່ວມ.

ທ່ານ ພັອ ທອງສີ ວິຈິດວົງສາ ຮອງຫົວໜ້າກົມໃຫຍ່ການເມືອງກອງທັບໄດ້ຂື້ນຜ່ານຂໍ້ຕົກລົງຂອງຄະນະພັກກະຊວງປ້ອງກັນປະເທດ ເລກທີ 3648/ຄພກປທ. ລົງວັນທີ 2/9/2019. ວ່າດ້ວຍການຮັບຮອງເອົາຄະນະພັກກອງພັນໃຫຍ່ 644 ສະໄໝທີ V ຕາມກົດລະບຽບຂອງພັກປະຊາຊົນປະຕິວັດລາວສະໄໝທີ X ໝວດທີ V ມາດຕາ 25 ວ່າດ້ວຍສະໄໝກອງປະຊຸມໃຫຍ່ຜູ້ແທນ ຫຼື ກອງປະຊຸມໃຫຍ່ສະມາຊິກພັກ. ອີງຕາມຜົນຂອງກອງປະຊຸມໃຫຍ່ຄັ້ງວັນທີ 7/8/2019 ເລືອກເອົາຄະນະບໍລິຫານງານພັກກອງພັນໃຫຍ່ 644. ສະໄໝທີ V ແລະ ຕາມໜັງສືສະເໜີສະບັບເລກທີ 147/ຄພຍ ລົງວັນທີ 21/8/2019 ກ່ຽວກັບການຂໍອະນຸມັດຮັບຮອງເອົາຄະນະພັກກອງພັນໃຫຍ່ 644 ສະໄໝທີ V ປະກອບມີ 9 ສະຫາຍ ຄື: ພັອ ຄຳສີ ພົມມະຈັນ, ພັອ ລຳທູນ ລາດວິໄຊ, ພັ.ທ ແກ້ວວຽງສັກ ແກ້ວລາ, ພັທ ບຸນລົ້ນ ໄຊຍະລາດ, ພັທ ບຸນສວຍ ວິໄລຂັນ, ພັ.ທ ວິໄລພົງ ມະນີບົດ, ພັ.ທ ຄຳຕັ້ງ ມຸກສະຫວັນ, ພັທ ແກ້ວວຽງໄຊ ພໍເພັດຜູ່ໄທ ແລະ ພັ.ທ ແອໄຊ ສຸວັນນະສິງ. ມາດຕາ 2 : ຮັບຮອງເອົາຄະນະປະຈຳພັກປະກອບມີ 3 ສະຫາຍ ຄື: ພັອ ຄຳສີ ພົມມະຈັນ, ສະຫາຍ ພັ.ອ ລຳທູນ ລາດວິໄຊ ແລະ ສະຫາຍ ພັທ ແກ້ວວຽງສັກ ແກ້ວລາ. ມາດຕາ 3 : ຮັບຮອງເອົາເລຂາ, ຮອງເລຂາຄະນະພັກ ຄື: ສະຫາຍ ພັອ ຄຳສີ ພົມມະຈັນ ເປັນເລຂາຄະນະພັກ, ສະຫາຍ ພັອ ລຳທູນ ລາດວິໄຊ ເປັນຮອງເລຂາຄະນະພັກ. ມາດຕາ 4 : ຕົກລົງຮັບຮອງເອົາປະທານ – ຮອງປະທານກວດກາພັກ. ປະກອບມີ 3 ສະຫາຍ ຄື: ສະຫາຍ ພັທ ບຸນລົ້ນ ໄຊຍະລາດ ເປັນປະທານກວດກາພັກ, ສະຫາຍ ພັຕ ພູມີ ແກ້ວດວງສິນ ແລະ ສະຫາຍ ພັຕ ລາດສະວົງ ນັດລູນີ ເປັນຮອງປະທານກວດກາພັກ.

ໂອກາດນີ້ : ທ່ານ ພົວ ວົງສອນ ອິນປານພິມ ຄະນະພັກກະຊວງປ້ອງກັນປະເທດ – ຮອງຫົວໜ້າກົມໃຫຍ່ການເມືອງກອງທັບ ກໍ່ໄດ້ໃຫ້ທັດສະນະໂອ້ລົມຕໍ່ກອງປະຊຸມ ກ່ອນອື່ນກໍ່ສະແດງຄວາມຍ້ອງຍໍ – ຊົມເຊີຍ ຕໍ່ຜົນງານກໍ່ຄືຜົນສຳເລັດກອງປະຊຸມໃຫຍ່ສະໄໝທີ V ຂອງຄະນະບໍລິຫານງານພັກກອງພັນໃຫຍ່ 644 ຄັ້ງນີ້ຢ່າງສຸດໃຈ. ພ້ອມນີ້ : ກໍ່ໄດ້ຮຽກຮ້ອງເນັ້ນຕື່ມໃຫ້ບັນດາສະຫາຍທຸກຄົນຈົ່ງພ້ອມກັນເອົາໃຈໃສ່ຈັດຕັ້ງປະຕິບັດວຽກງານໃຫ້ໄດ້ດີກວ່າເກົ່າ. ໂດຍສະເພາະແມ່ນບັນດາສະຫາຍ ຄະນະພັກຊຸດໃໝ່ ຈົ່ງພ້ອມກັນເອົາໃຈໃສ່ຕໍ່ໜ້າທີ່ວຽກງານ, ຮັກສາໄດ້ຄວາມສາມັກຄີພາຍໃນໃຫ້ມີຄວາມໜັກແໜ້ນ, ພ້ອມກັນປັບປຸງແກ້ໄຂຊີ້ນຳ – ນຳພາ, ບັນຊາກົມກອງ ສ້າງໃຫ້ກົມກອງຂອງຕົນກ່າຍເປັນກົມກອງທີ່ມີແບບແຜນທັນສະໄໝກ້າວຂື້ນຢ່າງບໍ່ຢຸດຢັ້ງ.