ໃນວັນທີ 26 ກັນຍາ 2019 ນີ້, ແນວລາວສ້າງຊາດແຂວງຊຽງຂວາງ ໄດ້ຮັບເຄື່ອງຊ່ວຍເຫຼືອ ລວມມູນຄ່າ 8.000.000 ກວ່າກີບ ຈາກສະພາການຄ້າແລະອຸດສາຫະກຳແຂວງຊຽງຂວາງ. ຕາງໜ້າກ່າວມອບໂດຍ ທ່ານ ຄຳພູ ວັນນະຈັກ ກຳມະການສູນກາງແນວລາວສ້າງຊາດ ປະທານສະພາການຄ້າ ແລະ ອຸດສາຫະກຳ ແຂວງຊຽງຂວາງ ແລະ ກ່າວຮັບໂດຍ ທ່ານ ດຳດີ ນັນທະວົງ ປະທານແນວລາວສ້າງຊາດແຂວງ ໂດຍການຮ່ວມເປັນສັກຂີພິຍານຂອງຄະນະ ສະພາການຄ້າ ແລະ ອຸດສາຫະກຳ ແລະ ຄະນະແນວລາວສ້າງຊາດແຂວງຊຽງຂວາງ.

ເຄື່ອງຊ່ວຍເຫຼືອທີ່ໄດ້ຮັບໃນຄັ້ງນີ້ມີເຄື່ອງນຸ່ງຮົ່ມ. ສຳລັບເຄື່ອງຈຳນວນດັ່ງກ່າວ ແນວລາວສ້າງຊາດແຂວງຊຽງຂວາງ ເຊີ່ງຈະໄດ້ນຳໄປມອບໃຫ້ຜູ້ແທນຜູ້ຊົງຄຸນວຸດທິບັນດາເຜົ່າ ໃນກອງປະຊຸມພົບປະ #ຜູ້ແທນຜູ້ຊົງຄຸນວຸດທິບັນດາເຜົ່າທົ່ວແຂວງຊຽງຂວາງ ທີ່ຈະຈັດຂື້ນໃນວັນທີ່ 27 ກັນຍາ 2019ນີ້.

ໃນໂອກາດນີ້, ທ່ານປະທານແນວລາວສ້າງຊາດແຂວງຊຽງ ກໍໄດ້ສະແດງຄວາມຂອບໃຈເປັນຢ່າງສູງ ຕໍ່ທ່ານ ຄຳພູ ວັນນະຈັກ ພ້ອມຄະນະ ທີ່ໄດ້ລະດົມ ແລະ ນໍາເອົາເຄື່ອງຈຳນວນດັ່ງກ່າວ ມາມອບໃຫ້ແນວລາວສ້າງຊາດແຂວງຊຽງຂວາງໃນຄັ້ງນີ້ ເຊິ່ງເປັນການປະກອບສ່ວນຊ່ວຍເຫຼືອເຮັດໃຫ້ກອງປະຊຸມຜູ້ຊົງຄຸນວຸດທິບັນດາເຜົ່າໃນຄັ້ງນີ້ມີເນື້ອໃນ ແລະ ຄວາມໝາຍເລິກເຊິ່ງ, ທັງເປັນການເຕົ້າໂຮມຄວາມສາມັກຄີປອງດອງບັນດາເຜົ່າ ມີນ້ຳໃຈຊ່ວຍເຫຼືອເຊິ່ງກັນ ແລະ ກັນ.

ພາບ-ຂ່າວ: ເບ່ຕ່າ ໄຊປັນຍາ( ແນວລາວສ້າງຊາດແຂວງຊຽງຂວາງ)