ສ່ວຍສາອາກອນປະຈໍາແຂວງເຊກອງຮ່ວມກັບທະນາຄານການຄ້າຕ່າງປະເທດລາວມະຫາຊົນສາຂາເຊກອງ (ທຄຕລ) ແລະຫ້ອງການ-ການເງິນເມືອງລະມາມເປີດຂະບວນການຊຸກຍູ້ເສຍຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານປະຈໍາປີ 2019 ຂຶ້ນໃນວັນທີ 25 ກັນຍາ 2019 ທີ່ເດີ່ນສູນການຄ້າແຂວງເຊກອງ ໂດຍມີທ່ານ ຄອນປະເສີດ ຫຼວງສຸວັນນະວົງ ວ່າການຫົວໜ້າ ທຄຕລ ສາຂາເຊກອງ, ທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງ, ທ່ານຮອງຫົວໜ້າຫ້ອງການໆການເງິນເມືອງລະມາມ, ພະນັກງານວິຊາການກ່ຽວຂ້ອງ ແລະອໍານາດການປົກຄອງ 6 ບ້ານເທສະບານແຂວງເຂົ້າຮ່ວມ.

ທ່ານ ຄອນປະເສີດ ຫຼວງສຸວັນນະວົງ ກ່າວວ່າ: ການເປີດຂະບວນການຊຸກຍູ້ການເສຍຄ່າທຳນຽມທາງ ແລະພາສີທີ່ດິນ ກໍເພື່ອປະຕິບັດຕາມແຈ້ງການຂອງຜູ້ອໍານວຍການໃຫຍ່ທະນາຄານການຄ້າຕ່າງປະເທດລາວມະຫາຊົນ ສະບັບເລກທີ 210/ທຄຕລ, ລົງວັນທີ 3 ກັນຍາ 2019 ໂດຍທົ່ວແຂວງເຊກອງຈະລົງເຄື່ອນໄຫວມີຢູ່ 6 ຈຸດຄື: ຈຸດທີ 1 ຂ້າງສູນການຄ້າຫຼັງໃໝ່ (ຕໍ່ໜ້າຮ້ານສະຕາດາກຈຶງ) ເທສະບານເມືອງລະມາມ; 2. ບ້ານເຊນໍ້ານ້ອຍ; 3. ບ້ານໂພນ; 4. ບ້ານຈຸນລາ; 5. ເທສະບານເມືອງທ່າແຕງ ແລະສຸດທ້າຍແມ່ນຢູ່ເທສະບານເມືອງດາກຈຶງ.
ທັງນີ້ ກໍເພື່ອໂຄສະນາປຸກລະດົມ, ກະຕຸກຊຸກຍູ້ ແລະອໍານວຍຄວາມສະດວກໃຫ້ບັນດາອົງການຈັດຕັ້ງທຸກພາກສ່ວນ, ພະນັກງານ-ລັດຖະກອນ, ທະຫານ-ຕໍາຫຼວດ, ພໍ່ຄ້າຊາວຂາຍ ແລະປະຊາຊົນບັນດາເຜົ່າໄດ້ມາຊໍາລະຄ່າທໍານຽມທາງ ແລະພາສີທີ່ດິນປະຈໍາປີ 2019 ໃຫ້ເປັນຂະບວນຟົດຟື້ນ, ອັນສໍາຄັນກໍ່ແມ່ນການສ້າງຂະບວນການໃຫ້ເປັນແບບຢ່າງນໍາໜ້າສະແດງເຖິງສະຕິຕື່ນຕົວ, ຄວາມສະໝັກໃຈທີ່ປະກອບສ່ວນເຂົ້າງົບປະມານໃຫ້ແກ່ລັດ ກໍຄືການສ້າງສາພັດທະນາປະເທດຊາດ.

ການເສຍ ຫຼື ການຊໍາລະຄ່າທໍານຽມທາງ ແລະພາສີທີ່ດິນຜ່ານລະບົບທະນາຄານສາມາດຊໍາລະໄດ້ 6 ຊ່ອງທາງຄື: ຜ່ານເຄົາເຕີ້ບໍລິການ BCEL, ຜ່ານລະບົບ BCEL one, ຜ່ານ BCEL i-Bank, ຜ່ານຕູ້ເອທີເອັມ ATM ຂອງ BCEL, ຜ່ານຕູ້ຮັບຊໍາລະອັດຕະໂນມັດ ແລະຕົວແທນ BCOME.
ດ້ານທ່ານ ສົມບູນ ພັນຈັນ ຮອງຫົວໜ້າສ່ວຍສາອາກອນປະຈໍາແຂວງເຊກອງ ໃຫ້ຮູ້ວ່າ: ການເກັບຄ່າທໍານຽມທາງ ແລະພາສີທີ່ດິນ ເປັນລາຍຮັບທີ່ສໍາຄັນໜຶ່ງຂອງງົບປະມານແຫ່ງລັດ ໂດຍມາຮອດປະຈຸບັນ ແຂວງເຊກອງສາມາດເກັບລາຍຮັບຈາກຄ່າທໍານຽມທາງ ແລະພາສີທີ່ດິນໄດ້ທັງໝົດ 991 ລ້ານກີບ, ໃນນີ້ລາຍຮັບຈາກພາສີທີ່ດິນ 633 ລ້ານກີບທຽບໃສ່ແຜນການປີເທົ່າກັບ 48,71% ທຽບໃສ່ໄລຍະດຽວຂອງປີກ່ອນເທົ່າກັບ 90% ແລະລາຍຮັບຈາກຄ່າທໍານຽມທາງ 358 ລ້ານກີບທຽບໃສ່ແຜນການປີເທົ່າກັບ 63% ທຽບໃສ່ໄລຍະດຽວຂອງປີກ່ອນເທົ່າກັບ 128%.
ພ້ອມກັນນັ້ນ ທ່ານຮອງຫົວໜ້າສ່ວຍສາອາກອນແຂວງ ຍັງໄດ້ເຊີນຊວນອົງການຈັດຕັ້ງທຸກພາກສ່ວນ, ພະນັກ ງານ-ລັດຖະກອນ, ພໍ່່ແມ່ປະຊາຊົນໃຫ້ພ້ອມກັນມາປະກອບສ່ວນມອບພັນທະເຂົ້າງົບປະມານແຫ່ງລັດ ດ້ວຍການແຈ້ງເສຍຄ່າທໍານຽມທາງ ແລະພາສີທີ່ດິນ, ຮັບປະກັນໃຫ້ໄດ້ໝາກຜົນ ແລະປະສິດທິພາບສູງຕາມຈຸດປະສົງ ແລະລະດັບຄາດໝາຍແຜນການທີ່ວາງໄວ້.

ຂ່າວ : ສັນຍາ