ເພື່ອເປັນການສົ່ງເສີມການຄ້າລະຫວ່າງປະເທດລາວ – ຫວຽດນາມ ດັ່ງນັ້ນມາໃນຕອນແລງຂອງວັນທີ 25 ກັນຍາ 2019 ຢູ່ທີ່ສູນການຄ້າ ສະຫວັນໄອເຕັກ ໄດ້ຈັດພິທີເປີດງານຕະຫຼາດນັດວາງສະແດງສິນຄ້າ ມິດຕະພາບ ສະຫວັນນະເຂດ – ນະຄອນໂຮ່ຈີມີນ ໂດຍການເຂົ້າຮ່ວມຂອງທ່ານ ທ່ອນແກ້ວ ພຸດທະໄກຍະລາດ ຮອງເຈົ້າແຂວງສະຫວັນນະເຂດ, ທ່ານ ວູ້ແອັງ ຢູງ ກົງສູນໃຫຍ່ ແຫ່ງ ສສ ຫວຽດນາມ ປະຈຳແຂວງສະຫວັນນະເຂດ, ທ່ານນາງ ພີມພາ ແກ້ວມີໄຊ ກົງສູນໃຫຍ່ ແຫ່ງ ສປປ ລາວ ປະຈຳນະຄອນໂຮ່ຈີມີນ ມີບັນດາທ່ານ ທູດການຄ້າ ແຫ່ງ ສສ ຫວຽດນາມ, ຫົວໜ້າ ຮອງຫົວໜ້າພະແນກອຸດສາຫະກຳ ແລະ ການຄ້າ, ຫົວໜ້າ ຮອງຫົວໜ້າ ກົມສົ່ງເສີມການຄ້າ ກະຊວງອຸດສາຫະກຳ ແລະ ການຄ້າ, ພ້ອມດ້ວຍບັນດາຫົວໜ່ວຍທຸລະກິດ, ຜູ້ປະກອບການ ແລະ ແຂກທີ່ຖືກເຊີນທັງ ສປປ ລາວ – ສສ ຫວຽດນາມ ເຂົ້າຮ່ວມ.

ກ່ອນເປີດງານຕະຫຼາດນັດວາງສະແດງສິນຄ້າ ມິດຕະພາບ ສະຫວັນນະເຂດ – ນະຄອນໂຮ່ຈີມີນ ຄັ້ງທີ 3 ປີ 2019 ຢ່າງເປັນການບັນດາແຂກທີ່ເຂົ້າຮ່ວມກໍ່ຍັງໄດ້ຮັບຊົມການສະແດງສິລະປະວັນນະຄະດີຈາກ ແຂວງສະຫວັນນະເຂດ ແລະ ນະຄອນໂຮ່ຈີມີນຈາກນັ້ນ ທ່ານ ຝ້າມທຽດຮວ່າ ຫົວໜ້າ ສູນສົ່ງເສີມການຄ້າ ແລະ ການລົງທືນນະຄອນໂຮ່ຈີມີນ ໄດ້ກ່າວເປີດ ແລະ ຈຸດປະສົງ ຂອງງານວາງສະແດງສິນຄ້າຄັ້ງທີ 3 ນີ້ແມ່ນເປັນການ ສືບຕໍ່ຊຸກຍູ້ສາຍພົວພັນດ້ານເສດຖະກິດການຄ້າ ລະຫວ່າງນະຄອນ ໂຮ່ຈີມີນ ແລະ ແຂວງສະຫວັນນະເຂດ ທັງເປັນການສະໜັບສະໜູນໃຫ້ວິສາຫະກິດນະຄອນໂຮ່ຈີມີນເປີດກ້ວາງການຕະຫຼາດຢູ່ລາວ ໂດຍສະເພາະຢູ່ພາກກາງຂອງລາວ ເປັນເຂດທີ່ມີຄວາມຕ້ອງການດ້ານເຄື່ອງ ອຸປະໂພກ.

ໃນງານຕະຫຼາດນັດຄັ້ງນີ້ ມີຮ້ານວາງສະແດງສິນຄ້າທັງໝົດ 250 ຮ້ານ, ຂອງວິສາຫະກິດ 320 ຮ້ານ, ໃນນັ້ນມີ 200 ຮ້ານ ເປັນຂອງວິສາຫະກິດຫວຽດນາມ ແລະ 50 ວິສາຫະກິດເປັນຂອງລາວ, ເຊິ່ງປະກອບມີກຸ່ມຜະລິດຕະພັນຄື: ອຸດສາຫະກຳ, ເຄື່ອງຕັດຫຍິບ, ເກີບ, ແລະ ຢາງພາລາ, ເຄື່ອງຈັກ ຜະລິດກະສິກຳ ແລະ ອາຫານ, ເຄື່ອງເອເລັກໂຕນິກ, ເຄື່ອງໄຟຟ້າ, ເຟີນິເຈີ ແລະ ອື່ນໆອີກ.

ໃນໂອກາດດຽວກັນ ທ່ານ ສີທົນ ນັນທະລາດ ຫົວນ້າພະແນກອຸດສາຫະກຳ ແລະ ການຄ້າ ແຂວງສະຫວັນນະເຂດ ກໍ່ກ່າວຕ້ອນຮັບ ພ້ອມທັງກ່າວໄຂພິທີ ຢ່າງເປັນທາງການ ຂອງງານຕະຫຼາດນັດວາງສະແດງສິນຄ້າ ມິດຕະພາບ ສະຫວັນນະເຂດ – ນະຄອນໂຮ່ຈີມີນ ຄັ້ງທີ 3 ປີ 2019 ໃນຄັ້ງນີ້ ເຊິ່ງເປັນງານຕະຫຼາດນັດທີ່ມີຄວາມໝາຍ ສຳຄັນຢ່າງຍິງ, ເປັນໂອກາດທີ່ດີໃຫ້ແກ່ພາກທຸລະກິດ SME ທັງສອງແຂວງກໍ່ຄື ສະຫວັນນະເຂດ – ນະຄອນໂຮ່ຈີມີນ ໄດ້ມີເງື່ອນໄຂ ແລະ ໂອກາດ ແລກປ່ຽນ ຖອດຖອນບົດຮຽນ ເຊິ່ງກັນ ແລະ ກັນ ພ້ອມທັງຈັບຄູ່ທຸລະກິດດ້ວຍກັນໃນອະນາຄົດບົບພື້ນຖານ ຕ່າງຝ່າຍຕ່າງມີຜົນປະໂຫຍດ.
ຈາກນັ້ນບັນດາແຂກກໍ່ຮ່ວມກັນຕັດແຖບຜ້າເພື່ອເປັນການເປີດງານຢ່າງເປັນທາງການພ້ອມທັງເດີນຊົມຮ້ານວາງສະແດງສິນຄ້າໃນງານຕະຫຼາດນັດວາງສະແດງສິນຄ້າ ມິດຕະພາບ ສະຫວັນນະເຂດ – ນະຄອນໂຮ່ຈີມີນ ຄັ້ງທີ 3 ປີ 2019 ໃນຄັ້ງນີ້.