ໃນຕອນເຊົ້າວັນທີ 26 ກັນຍາ 2019 ນີ້ ຢູ່ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະເຂດ, ທ່ານ ນາງ ພິມພາ ແກ້ວມີໄຊ ກົງສູນໃຫຍ່ ແຫ່ງ ສປປ ລາວ ປະຈຳນະຄອນໂຮ່ຈີມິນ ສສ ຫວຽດນາມ ເຂົ້າພົບຢ້ຽມຢາມການນຳແຂວງສະຫວັນນະເຂດ ໃນໂອກາດທີ່ຮັບໜ້າທີ່ໃໝ່ ໂດຍການຕ້ອນຮັບຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ.

ຈຸດປະສົງຂອງການມາ ຢ້ຽມຢາມຄັ້ງນີ້ເພື່ອຂໍ່ານັບຮັບຕ້ອນທ່ານເຈົ້າແຂວງເນື່ອງໃນໂອກາດໄດ້ຮັບການແຕ່ງຕັ້ງເປັນກົງສູນໃຫຍ່ ແຫ່ງ ສປປ ລາວ ປະຈຳນະຄອນໂຮ່ຈີມິນ ສສ ຫວຽດນາມ ແລະ ເຮັດວຽກຮ່ວມກັນກັພະແນກການຕ່າງປະເທດ, ເພື່ອຖອດຖອນບົດຮຽນໃນການຈັດຕັ້ງປະຕິບັດຮ່ວມມືໃນໄລຍະຜ່ານມາໂດຍທ່ານ ກົງສູນໃຫຍ່ລາຍງານໃຫ້ຮູ້ວ່າ: ຜ່ານມາໄດ້ເຂົ້າພົບປະກັບພະແນກການຕ່າງປະເທດ ແລະ ໄດ້ເຮັດວຽກພ້ອມປຶກສາຫາລືກັນມີຢູ່ 3 ບັນຫາໃຫຍ່ຄື: ເວົ້າເລື່ອງແຜນການຮ່ວມມືລະຫວ່າງແຂວງກັບຝ່າຍຫວຽດນາມພ້ອມທັງເຈາະຈົງແຂວງພາກໃຕ້ຫວຽດນາມທີ່ຢູ່ໃນຄວາມຮັບຜິດຊອບຂອງກົງສູນລາວເຮົາທີ່ປະຈຳຢູ່ໂຮ່ຈີມິນ, ແຜນການເຮັດວຽກກັບຝ່າຍຫວຽດນາມວ່າໃນຂົງເຂດມີບັນຫາໃດແນ່ ແລະ ໄດ້ຖອດຖອນບົດຮຽນເວົ້າເຖິງຂໍ້ສະດວກຂໍ້ຫຍຸ້ງຍາກໃນການເຮັດວຽກແລກປ່ຽນຄຳຄິດເຫັນນຳກັນ ໂດຍບາງຈຸດທີ່ວ່າຕ້ອງເອົາໃຈໃສ່ກັບ ພະແນກການຕ່າງປະເທດຂອງແຂວງ.

ໂອກາດຕ້ອນຮັບ ທ່ານ ເຈົ້າແຂວງກໍ່ໄດ້ລາຍງານເຖິງການພົວພັນ ນະຄອນໂຮ່ຈີ່ມິນ ແລະ ບັນດາແຂວງແຮກສ່ວຽວອື່ນຂອງ ສສຫວຽດນາມໂດຍພົວພັນແຮກສ່ຽວກັບ 9 ແຂວງ 3 ນະຄອນ ໂດຍເລັ່ງໃສ່ການພັດທະນາຊັບພະຍາກອນມະນຸດ ແລະ ຂະແໜງການສຶກສາ, ເຊິ່ງໄດ້ຮັບການຮ່ວມມືເປັນຢ່າງດີ, ນອກນັ້ນຍັງມີກິດຈະກຳຕ່າງໆນຳກັນ ໂດຍສະເພາະການຈັດກິດຈະກຳວາງສະແດງສິນຄ້າ ກັບນະຄອນດານັງ ພິເສດກັບນະຄອນໂຮ່ຈິມິນກໍ່ໄດ້ຮ່ວມມືນຳກັນເປັນຕົ້ນແມ່ນການວາງສະແດງສິນຄ້າ ແລະ ປີນີ້ຈັດການວ່າສະແດງສິນຄ້າເປັນປີທີ 3 ເຊິ່ງເຂົາເຈົ້າໄດ້ສະໜັບສະໜູນສົ່ງເສີມສິນຄ້າແຂວງເຮົາ ແລະ ນຳເອົາສິນຄ້າຂອງເຮົາໄປວາງສະແດງຢູ່ນະຄອນໂຮ່ຈີ່ມິນ, ເພິ່ນກໍ່ໄດ້ຊ່ວຍເຫຼືອ ທາງດ້ານການສຶກສາເຊິ່ງ ແຂວງຂອງພວກເຮົາທາງຂະແໜງສຶກສາກໍ່ໄດ້ສົ່ງນັກສຶກສາໄປສຶກສາຢູ່ ສສ ຫວຽດນາມ ກັບບັນດາແຂວງອື່ນໆກໍ່ໄດ້ມີການຮ່ວມມືກັນ.
ຂ່າວຍັງແຈ້ງໃຫ້ຮູ້ຕື່ມອີກວ່າມາໃນວັນດຽວກັນນີ້ ທ່ານ ບາລາສຸບຣາມານຽມ ໂມຣາດີ ຮອງຫົວໜ້າອົງການສະຫະປະຊາຊາດເພື່ອການພັດທະນາປະຈຳ ສ ປປ ລາວ ກໍ່ໄດ້ເຂົ້າຂໍ່ານັບຢ້ຽມຢາມ ທ່ານ ເຈົ້າແຂວງສະຫວັນນະເຂດເຊັ່ນດຽວກັນ.

ຂ່າວ: ວິລັດດາ ດວງຈັນທາ