ສະຫະພັນແມ່ຍິງຮາກຖານ ປກສ ແຂວງສະຫວັນນະເຂດໄດ້ຈັດກອງປະຊຸມສະຫຼຸບການຈັດຕັ້ງປະຕິບັດຂໍ້ແຂ່ງຂັນ3ດີ ປະຈຳປີ2019ແລະວາງທິດທາງແຜນການປີ2020 ຂຶ້ນໃນວັນທີ26ກັນຍາ2019ນີ້ ໂດຍເປັນປະທານຂອງທ່ານພັທ ນາງວິໄລວັນ ເນດຕະວົງສາ ປະທານສະຫະພັນແມ່ຍິງຮາກຖານ ປກສແຂວງ ເຂົ້າຮ່ວມມີທ່ານນາງ ແກ້ວພອນ ເກດຕະວົງ ຮອງປະທານສະຫະພັນແມ່ຍິງແຂວງ, ມີຄະນະສະຫະພັນແມ່ຍິງຮາກຖານປກສແຂວງ, ຄະນະພັກກອງບັນຊາການປກສແຂວງ, ຄະນະໜ່ວຍແລະ ແຂກຖືກເຊີນເຂົ້າຮ່ວມ.

ທ່ານພັທ ນາງວິໄລວັນ ເນດຕະວົງສາ ປະທານສະຫະພັນແມ່ຍິງ ຮາກຖານປກສ ແຂວງໄດ້ຂຶ້ນຜ່ານບົດສະຫຼຸບການຈັດຕັ້ງປະຕິບັດຂໍ້ແຂ່ງຂັນ3ດີ ໃນໄລຍະໜຶ່ງປີຜ່ານມາ ແລະ ທິດທາງແຜນການໃນຕໍ່ໜ້າ ເຊິ່ງຍົກໃຫ້ເຫັນສະພາບລວມໃນການຈັດຕັ້ງປະຕິບັດຂໍ້ແຂ່ງຂັນ3ດີ, ດ້ານດີ, ຜົນງານ, ດ້ານອ່ອນຂໍ້ຄົງຄ້າງແລະ ບົດຮຽນທີ່ຖອດຖອນໄດ້ ຢູ່ໃນບັນດາວຽກງານ ຂະບວນການແຂ່ງຂັນ3ດີ, ເປັນພົນລະເມືອງດີ, ພັດທະນາດີ, ສ້າງຄອບຄົວດີແລະອື່ນໆ ໃນນີ້ບຸກຄົນ 3ດີປະເພດໜຶ່ງ ມີ 356ຄົນ, ກວມເອົາ93, 68%, ຂອງຜູ້ເຂົ້າຮ່ວມແຂ່ງຂັນທັງໝົດ380ຄົນ, ປະເພດ ສອງ ມີ24ຄົນ, ກວມເອົາ6,31%ຂອງຜູ້ເຂົ້າຮ່ວມແຂ່ງຂັນທັງໝົດ380ຄົນ,ບຸກຄົນຕົວແບບດ້ານວິຊາການມີ49ຄົນ,ຕົວແບບດ້ານເສດຖະກິດ 5ຄົນ,ຢັ້ງຢືນໜ່ວຍພັກ 3ດີ 10ໜ່ວຍແລະ1ຮາກຖານ ແລະ ສຶບຕໍ່ຈັດຕັ້ງປະຕິບັດໃສ່ທິດທາງແຜນການໃນປີ2020ໃຫ້ສຳເລັດຜົນຕາມລະດັບຄາດໝາຍທີ່ວາງໄວ້ ໂດຍສະເພາະວຽກງານການເມືອງນຳພາແນວຄິດ, ເປັນພົນລະເມືອງດີ,ພັດທະນາດີແລະສ້າງຄອບຄົວດີ,

ຈາກນັ້ນ ທ່ານພັຕ ນາງບົວຜັນ ພົມມະລິນ ຮອງປະທານສະຫະພັນແມ່ຍິງຮາກຖານປກສແຂວງໄດ້ຂຶ້ນຜ່ານຂໍ້ຕົກລົງ ຂອງປະທານສະຫະພັນແມ່ຍິງແຂວງ ເລກທີ 672/ສຍຂ ລົງວັນທີ 19 ກັນຍາ2019 ວ່າດ້ວຍການຍ້ອງຍໍບຸກຄົນ, ຢັ້ງຢືນສະຫະພັນແມ່ຍິງຮາກຖານ 3ດີ ຂອງສະຫະພັນແມ່ຍິງຮາກຖານປກສແຂວງປີ2019 ໃນນີ້ຍ້ອງຍໍສະມາຊິກສະຫະພັນແມ່ຍິງ3ດີ ປະເພດໜຶ່ງມີ 356ຄົນ, ປະເພດສອງ ມີ 24ຄົນ, ຍ້ອງຍໍບຸກຄົນຕົວແບບດ້ານວິຊາການມີ 49ຄົນ, ບຸກຄົນຕົວແບບດ້ານສ້າງເສດຖະກິດຄອບຄົວມີ 5ຄົນ ແລະ ມອບໃບຢັ້ງຢືນສະຫະພັນແມ່ຍິງໜ່ວຍ 3ດີຂຶ້ນກັບຮາກຖານມີ 10ໜ່ວຍ ມອບໂດຍທ່ານ ນາງ ແກ້ວພອນ ເກດຕະວົງ ຮອງປະທານສະຫະພັນແມ່ຍິງແຂວງ

ຂ່າວ: ຂຽວໃຫຍ່