ໃນຕອນເຊົ້າວັນທີ 25 ກັນຍາ 2019 ຢູ່ທີ່ ສະຖານີວິທະຍຸກະຈາຍສຽງແຂວງສະຫວັນນະເຂດ ໄດ້ມີພິທີ ມອບຮັບ-ຮັບຕຳແໜ່ງອຳນວຍການສະຖານີວິທະຍຸກະຈາຍສຽງແຂວງສະຫວັນນະເຂດ ລະຫວ່າງ ທ່ານ ຄຳພູທອນ ອາໄພຍະລາດ ຜູ້ອຳນວຍການສະຖານີວິທະຍຸຄົນເກົ່າ ທີ່ຈະອອກຮັບບຳນານ ແລະ ທ່ານ ພອນໄຊ ສີວົງມຸກ ຮອງຜູ້ອຳນວຍການ ສະຖານີວິທະຍຸ ຂຶ້ນເປັນ ຮັກສາການຜູ້ອຳນວຍການສະຖານີວິທະຍຸກະຈາຍສຽງແຂວງສະຫວັນນະເຂດ ຄົນໃໝ່ ໂດຍການເປັນສັກຂີພິຍານ ໃນຄັ້ງນີ້ມີພະນັກງານພາຍໃນພະແນກວິທະຍຸແຂວງສະຫວັນນະເຂດເຂົ້າຮ່ວມ.

ທ່ານ ຄຳພູທອນ ອາໄພຍະລາດ ກໍ່ໄດ້ລາຍງານແຜນການຈັດຕັ້ງປະຕິບັດໃນໄລຍະຜ່ານມາ ເຊິ່ງສະຖານີວິທະຍຸແຂວງສະຫວັນນະເຂດ ແບ່ງອອກເປັນ 4 ກຸ່ມວຽກຄື ຂ່າວ, ລາຍການ, ເຕັກນິກ ແລະ ບໍລິຫານ ມີພະນັກງານທັງໝົດ 22 ຄົນ ຍິງ 9 ຄົນ ມີພາລະບົດບາດໃນການໂຄສະນາເຜີຍແຜ່ ແນວທາງນະໂຍບາຍຂອງພັກ- ກົດລະບຽບ ເຜີຍແຜ່ຂໍ້ມູນຂ່າວສານ ບັນເທິງ ສາລະໜ້າຮູ້ ວຽກດີຄົນເດັ່ນ ວຽກຈິງຄົນແທ້ ເຊີດຊູຈິດໃຈຮັກຊາດ ເປັນເອກະລາດ ແລະ ສາມັກຄີປອງດອງປຸກລະດົມນ້ຳໃຈຮັກຊາດ ອອກສູ່ປະຊາຊົນທຸກຊັ້ນຄົນໃນສັງຄົມ ຢ່າງກວ້າງຂວາງທົ່ວເຖິງ ແລະ ທັນເວລາ ໂດຍຜ່ານລະບົບສື່ມວນຊົນທາງວິທະຍຸກະຈາຍສຽງລະບົບ AM ແລະ FM ພ້ອມນັ້ນ ກໍ່ເຮັດໜ້າທີ່ ໂຄສະນາຊອກແຫຼ່ງລາຍຮັບ ບໍລິຫານສັງຄົມ ເພື່ອເປັນພັນທະມອບງົບປະມານຕາມຕົວເລກ ທີ່ທາງພະແນກຈັດວາງໃຫ້ ນັບແຕ່ເດືອນສິງຫາ 2017 ຫາ ເດືອນ ກັນຍາ 2019 ສາມາດສ້າງລາຍຮັບໄດ້ທັງໝົດ 129.575.000 ກີບ ເຊິ່ງສະຖານີວິທະຍຸກະຈາຍສຽງແຂວງສະຫວັນນະເຂດ ສຳລັບແຜນທີ່ວາງໄວແມ່ນສືບຕໍ່ປັບປຸງບັນດາໜ້າວຽກ, ວຽກຂ່າວ, ລາຍການ, ເຕັກນິກ ແລະ ບໍລິຫານໃຫ້ດີຂຶ້ນ, ຂຶ້ນແຜນຍຸກທະສາດ, ວິໄສທັດຂອງສະຖານີ ແລະ ບັນດາວຽກທີ່ຈຳເປັນດ່ວນຈຳນວນໜຶ່ງ.

ຈາກນັ້ນທ່ານ ພອນໄຊ ສີວົງມຸກ ກໍ່ກ່າວຮັບໜ້າທີ່ ແລະ ສືບຕໍ່ຂະຫຍາຍຜົນງານດ້ານຕ່າງທີ່ຍາດມາໄດ້ໃນຜ່ານມາໃຫ້ກ້າວໜ້າ ຂະຫຍາຍຕົວໄປເລື່ອຍໆປະຕິບັດໜ້າທີ່ ທີ່ຍັງຄົງຄ້າງ ບໍວ່າຈະເປັນວຽກງານຂ່າວ, ລາຍການ ເຕັກນິກ ແລະ ບໍລິຫານ ໃຫ້ໄປໃນທາງທີ່ດີຂຶ້ນເພື່ອເຮັດໃຫ້ສັງຄົມມີຄວາມນິຍົມຊົມຊອບໃນການຮັບຟັງວິທະຍຸກະຈາຍສຽງແຂວງສະຫວັນນະເຂດຂອງພວກເຮົານັບມື້ໃຫ້ຫຼາຍຂຶ້ນ.
ຈາກນັ້ນທັງສອງທ່ານກໍ່ໄດ້ເຊັນ ມອບ-ຮັບໜ້າທີ່ລະຫວ່າງ ທ່ານ ຄຳພູທອນ ອາໄພຍາລາດ ຜູ້ເກົ່າ ແລະ ທ່ານ ພອນໄຊ ສີວົງມຸກ ຜູ້ຮັກສາການສະຖານີວິທະຍຸສະຫວັນນະເຂດຄົນໃໝ່.