ກອງປະຊຸມໃຫຍ່ຄັ້ງທີ III ຂອງຄະນະບໍລິຫານງານສະພາການຄ້າ ແລະອຸດສາຫະກໍາແຂວງໄຊຍະບູລີ ໄດ້ຈັດຂຶ້ນໃນວັນທີ 26 ກັນຍາ 2019 ນີ້ຢູ່ທີ່ໂຮງແຮມ ພອນໄພລິນ, ໂດຍການເປັນປະທານ ຂອງທ່ານ ສັງວຽນ ແສງກັນນາລີ ປະທານສະພາການຄ້າ ແລະ ອຸດສາຫະກໍາແຂວງ, ໃຫ້ກຽດເຂົ້າຮ່ວມມີທ່ານ ຍັນຍົງ ສີປະເສີດ ຮອງເຈົ້າແຂວງໄຊຍະບູລີ, ທ່ານ ຈັນເພັງ ພັນທຸອາມາດ ຫົວໜ້າພະແນກອຸດສາຫະກໍາ ແລະ ການຄ້າແຂວງ, ມີບັນດາຮອງເຈົ້າເມືອງ, ຫົວໜ້າພະແນກການ, ຫົວໜ້າຫ້ອງການ ອຸດສາຫະກໍາ ແລະ ການຄ້າ 11 ເມືອງ ພ້ອມດ້ວຍລັດວິສາຫະກິດ, ນັກທຸລະກິດຜູ້ປະກອບການທົ່ວແຂວງເຂົ້າຮ່ວມເກືອບ 100 ຄົນ.

ທ່ານ ສັງວຽນ ແສງກັນນາລີ ປະທານສະພາການຄ້າ ແລະ ອຸດສາຫະກໍາແຂວງໄຊຍະບູລີໄດ້ກ່າວວ່າ ສະພາການຄ້າ ແລະ ອຸດສາຫະກໍາແຂວງໄດ້ເຕີບໃຫຍ່ຂະຫຍາຍຕົວເຊັ່ນ: ການນໍາໃຊ້ສິດທິພິເສດທາງດ້ານການຄ້າໃນອາຊຽນ ແລະ ສາກົນ ເຊິ່ງເຮັດໃຫ້ຫົວໜ່ວຍທຸລະກິດຂອງແຂວງ ສາມາດຜະລິດຕະພັນຂອງຕົນອອກຕ່າງປະເທດໄດ້; ອີກດ້ານໜຶ່ງຍັງເປັນການສົ່ງເສີມໃຫ້ບັນດານັກລົງທຶນໃນແຂວງເພີ່ມຂຶ້ນໃນທຸກໆປີ. ປະຈຸບັນທົ່ວແຂວງມີນັກທຸລະກິດຜູ້ປະກອບການ ທັງໝົດ 8.364 ຫົວໜ່ວຍ ຈັດຕັ້ງເປັນສະມາຄົມ ມີ 17 ສະມາຄົມ, ມີສະມາຊິກສະມາຄົມ 919 ຫົວໜ່ວຍ, ຈັດຕັ້ງເປັນກຸ່ມມີ 117 ກຸ່ມ, ມີສະມາຊິກທັງໝົດ 3.027 ຫົວໜວ່ຍ; ບໍ່ເຂົ້າກຸ່ມ ແລະ ສະມາຄົມມີ 4.418 ຫົວໜ່ວຍ, ເຂົ້າເປັນສະມາຊິກສະພາການຄ້າ ແລະ ອຸດສາຫະກໍາມີ 10 ຫົວໜ່ວຍ ໃນນີ້ມີສະມາຊິກສົມທົບ 2 ຫົວໜ່ວຍ.

ໃນໄລຍະຜ່ານມາສະພາການຄ້າ ແລະ ອຸດສາຫະກໍາແຂວງ ໄດ້ຊຸກຍູ້ບັນດາສະມາຄົມ, ກຸ່ມທຸລະກິດໃຫ້ຂະຫຍາຍຕົວທາງດ້ານການຜະລິດ, ການບໍລິການທາງດ້ານປະລິມານ ແລະ ຄຸນນະພາບຢ່າງຕໍ່ເນື່ອງ ໂດຍຈັດກອງປະຊຸມພົບປະແລກປ່ຽນຄວາມຄິດເຫັນ ລະຫວ່າງພາກລັດກັບນັກທຸລະກິດ ຜູ້ປະກອບການແກ້ໄຂຂໍ້ຫຍຸ້ງຍາກ ຂອງພາກທຸລະກິດ ເພື່ອສ້າງຄວາມເຂັ້ມແຂງໃຫ້ພາກທຸລະກິດຜູ້ປະກອບການດີຂຶ້ນເທື່ອລະກ້າວ. ສະພາການຄ້າ ແລະ ອຸດສາຫະກໍາແຂວງ ໄດ້ຄຸ້ມຄອງອອກໃບຢັ້ງຢືນແຫຼ່ງກໍາເນີດສິນຄ້າມີ 6 ຊະນິດຄື: FORM AK, FORM CO, KOREOL, FORM E, FORM AANZ, FORM AJ ໃຫ້ນັກທຸລະກິດຜູ້ປະກອບການໄດ້ທັງໝົດ 781 ຊຸດ, ມູນຄ່າ 34 ລ້ານກວ່າໂດລາ; FORM CO ມີ 734 ຊຸດ, FORM AK ມີ 7 ຊຸດ. ປະເພດສິນຄ້າກະສິກໍາ 592 ຊຸດ, ປະເພດສິນຄ້າຖ່ານອັດ-ຖ່ານຂາວ 9 ຊຸດ, ປະເພດສິນຄ້າຜະລິດຕະພັນໄມ້ມີ 184 ຊຸດ ແລະ ປະເພດສິນຄ້າແຮ່ຟູອໍຣາຍ 1 ຊຸດ; ພ້ອມນີ້ສະພາການຄ້າ ແລະ ອຸດສາຫະກໍາແຂວງຍັງໄດ້ສົ່ງເສີມນັກທຸລະກິດຜູ້ປະກອບການເຂົ້າຮ່ວມງານວາງສະແດງ ແລະ ຈໍາໜ່າຍສິນຄ້າຢູ່ພາຍໃນ ແລະ ຕ່າງປະເທດໄດ້ 44 ຄັ້ງ ແລະ ເຂົ້າຮ່ວມປະຊຸມຢູ່ພາບໃນ ແລະ ຕ່າງປະເທດໄດ້ 195 ຄັ້ງ. ທ່ານຍັງກ່າວຕື່ມວ່າ ແຕ່ນີ້ຮອດປີ 2024 ຄະນະບໍລິຫານຊຸດໃໝ່ຕ້ອງປັບປຸງໃຫ້ສອດຄ່ອງກັບພາລະບົດບາດໜ້າທີ່ຈັດສັນບຸກຄະລາກອນໃຫ້ແທດເໝາະກັບຕົວຈິງ, ຕັ້ງໜ້າສົ່ງເສີມພາກສ່ວນທຸລະກິດຂະໜາເນ້ອຍ, ຂະໜາດກາງ, ທຸລະກິດອື່ນໆພາຍໃນແຂວງໃຫ້ສາມາດແຂ່ງກັບແຂວງອື່ນ, ປັບປຸງໂຄງສ້າງອົງກອນທຸລະກິດທີ່ເປັນສະມາຊິກຂອງສະພາການຄ້າ ແລະ ອຸດສາຫະກໍາແຂວງໃຫ້ຍັບເຂົ້າກັບສາກົນເທື່ອລະກ້າວ, ຮັບປະກັນການຜະລິດຄຸນນະພາບສິນຄ້າ ຊ່ວຍພາກລັດໃນການລົງທຶນພາຍໃນ ແລະ ຕ່າງປະເທດ, ປະສານສົມທົບກັບພາກລັດທີ່ກ້ຽວຂ້ອງ ປັບປຸງບັນດາສະມາຄົມ, ກຸ່ມທີ່ໄດ້ສ້າງຕັ້ງມາແລ້ວໃຫ້ມີການເຄື່ອນໄຫວຢ່າງຕັ້ງໜ້າ ຊອກໂອກາດໃຫ້ແກ່ພາກທຸລະກິດໄດ້ເຂົ້າສູ່ຕະຫຼາດຕ່າງປະເທດ ແລະ ເຂົ້າຮ່ວມວາງສະແດງສິນຄ້າບັນດາປະເທດອາຊຽນຈັດຂຶ້ນ ຈາກນັ້ນກອງປະຊຸມ ທ່ານ ຈັນເພັງ ພັນທຸອາມາດ ຫົວໜ້າພະແນກ ອຸດສາຫະກໍາ ແລະ ການຄ້າໄດ້ຜ່ານຂໍ້ຕົກລົງ ຂອງທ່ານເຈົ້າແຂວງໄຊຍະບູລີວ່າດ້ວຍການແຕ່ງຕັ້ງປະທານ, ຮອງປະທານ, ຄະນະບໍລິຫານງານສະພາການຄ້າ ແລະ ອຸດສາຫະກໍາ ແຂວງໄຊຍະບູລີ ເຫັນດີແຕ່ງຕັ້ງ ທ່ານ ພວງເພັດ ສີຫາຣາຊ ເປັນປະທານສະພາການຄ້າ ແລະ ອຸດສາຫະກໍາແຂວງໄຊຍະບູລີ, ທ່ານ ຈິດຕະພອນ ທະນາວັນ ເປັນຮອງປະທານ, ທ່ານ ສົມບູນ ແສງກັນນາລີ ເປັນຮອງປະທານສະພາການຄ້າ ແລະ ອຸດສາຫະກໍາແຂວງ, ແຕ່ງຕັ້ງຄະນະກວດກາສະພາການຄ້າ ແລະ ອຸດສາຫະກໍາ ທ່ານ ນາງ ພູມໃຈ ກອງຊະນິດ ບໍລິສັດເອເລັກຊັນ ພ້ອມຄະນະ 4 ທ່ານ, ແຕ່ງຕັ້ງຄະນະທີ່ປຶກສາ ສະພາການຄ້າ ແລະ ອຸດສາຫະກໍາ ທ່ານສັງວຽນ ແສງກັນນາລີ ອາດິດປະທານສະພາການຄ້າ ແລະ ອຸດສາຫະກໍາ ພ້ອມຄະນະ 5 ທ່ານ, ແຕ່ງຕັ້ງເລຂາທິການຜູ້ປະຈໍາການສະພາການຄ້າ ແລະ ອຸດສາຫະກໍາ, ທ່ານ ຄໍາພັນ ແສນທໍາ ເປັນເລຂາທິການຜູ້ປະຈໍາການພ້ອມຄະນະ 4 ທ່ານ.

ຂ່າວ: ບຸນທີ.