ກອງປະຊຸມພົບປະຜູ້ຊົງຄຸນວຸດທິບັນດາຊົນເຜົ່າທົ່ວແຂວງຊຽງຂວາງ

0
359

ໃນວັນທີ 27 ກັນຍາ 2019 ນີ້ ຢູທີ່ຫ້ອງປະຊຸມໃຫຍ່ຫ້ອງວ່າການແຂວງຊຽງຂວາງສູນກາງແນວລາວສ້າງຊາດ ຮ່ວມກັບແນວລາວສ້າງຊາດແຂວງຊຽງຂວາງ ຈັດກອງປະຊຸມພົບປະຜູ້ຊົງຄຸນວຸດທິບັນດາເຜົ່າ ຄັ້ງທີ່ 1 ທົ່ວແຂວງຊຽງຂວາງຂື້ນຢ່າງເປັນທາງການ ພາຍໃຕ້ການເປັນປະທານຂອງທ່ານ ດຳດີ ນັນທະວົງ ກຳມະການພັກແຂວງ ປະທານແນວລາວສ້າງຊາດແຂວງຊຽງຂວາງ ເປັນກຽດເຂົ້າຮ່ວມມີ ທ່ານ ຄຳໃບ ດຳລັດ ກຳມະການສູນກາງພັກ ຮອງປະທານສູນກາງແນວລາວສ້າງຊາດ, ທ່ານ ບຸນຕົ້ນ ຈັນທະພອນ ເລຂາພັກແຂວງເຈົ້າແຂວງໆຊຽງຂວາງ, ມີຄະນະປະຈຳພັກແຂວງ, ກຳມະການພັກແຂວງ, ຜູ້ຕາງໜ້າຈາກພະແນກການອ້ອມຂ້າງຂອງແຂວງ, ຄະນະນຳຈາກສູນກາງແນວລາວສ້າງຊາດ, ຄະນະກຳມະການສູນກາງແນວລາວສ້າງຊາດປະຈຳຢູ່ແຂວງ ຕະຫຼອດຮອດຜູ້ຊົງຄຸນວຸດທິບັນດາຊົນເຜົ່າທົ່ວແຂວງແລະພະອາຈານເຂົ້າຮ່ວມ.

ໃນພິທີ, ທ່ານປະທານແນວລາວສ້າງຊາດໄດ້ຂື້ນກ່າວເປີດພີທີຢ່າງເປັນທາງການ, ຈາກນັ້ນທ່ານ ບຸນຕົ້ນ ຈັນທະພອນ ເລຂາພັກແຂວງ ຂື້ນກ່າວຕ້ອນຮັບແຂກ, ຜູ້ແທນກອງປະຊຸມ ແລະ ມີຄຳເຫັນຕໍ່ກອງປະຊຸມ ເຊິ່ງທ່ານໄດ້ຍົກໃຫ້ເຫັນສະພາບລວມການພັດທະນາເສດຖະກິດ-ສັງຄົມ ຂອງແຂວງ ແລະ ທ່ານໄດ້ຍົກໃຫ້ຮູ້ເຖິງພາລະບົດບາດ ຂອງຜູ້ຊົງຄຸນວຸດທິບັນດາຊົນເຜົ່າ, ເປັນຜູ້ນຳພາຂະບວນການສຶກສາອົບຮົມການເມືອງ-ແນວຄິດ, ທາງດ້ານເສດຖະກິດ-ສັງຄົມ, ຮີດຄອງປະເພນີ, ການດຳລົງຊີວິດ, ແກ້ໄຂໄກ່ເກ່ຍຂໍ້ຂັດແຍ່ງໃນສັງຄົມ ແລະ ອື່ນໆ ກອງປະຊຸມຜູ້ຊົງຄຸນວຸດທິໃນຄັ້ງນີ້, ເພື່ອເປັນການປັບປຸງກ້ອນກຳລັງມະຫາສາມັກຄີທົ່ວປວງຊົນທັງຊາດ ແນ່ໃສຍົກລະດັບຄວາມຕື່ນຕົວທາງດ້ານການເມືອງ, ຄວາມເປັນເອກະພາບພາຍໃນແຂວງ, ດ້ານໜື່ງກໍ່ເພື່ອເຊີດຊູຄັນທຸງນຳໜ້າ, ເຂົ້າຮ່ວມປະກອບສ່ວນທຶນຮອນໃນຕະຫຼອດໄລຍະ43ປີ ແຫ່ງການປົກປັກຮັກສາ ແລະ ສ້າງສາລະບອບໃໝ່, ຜູ້ຊົງຄຸນວຸດທິເປັນເຈົ້າການໂຄສະນາສຶກສາອົບຮົມ ແນວທາງນະໂຍບາຍຂອງພັກ ແລະ ລະບຽບກົດໝາຍຂອງລັດ, ເຕົ້າໂຮມຄວາມສາມັກຄີບັນດາເຜົ່າຢູ່ຮາກຖານ-ທ້ອງຖີ່ນ. ປຸກລະ ດົມຊັ້ນຄົນ, ຊົນເຜົ່າ, ສາສະໜາ, ເພດ-ໄວ, ເຂົ້າຮ່ວມຈັດຕັ້ງປະຕິບັດວຽກງານປ້ອງກັນຊາດ-ປ້ອງກັນຄວາມສະຫງົບ, ແຜນພັດທະນາເສດຖະກິດ-ສັງຄົມ, ປະກອບສ່ວນສ້າງ ແລະ ປັບປຸງລະບົບການເມືອງ, ແກ້ໄຂຄວາມທຸກຢາກ ແລະ ບັນຫາປະກົດການຫຍໍ່້ທໍ່ຕ່າງໆ.

ຈາກນັ້ນ, ທ່ານ ດວງໄຊ ທໍ່ຢ່າບຼົ່ງ ຮອງປະທານແນວລາວສ້າງຊາດແຂວງ ໄດ້ລາຍງານການຈັດຕັ້ງປະຕິບັດວຽກງານຂອງຜູ້ຊົງຄຸນວຸດທິບັນດາເຜົ່າ, ໃນການເຕົ້າໂຮມຄວາມສາມັກຄີ ປະຊາຊົນລາວບັນດາເຜົ່າໃນໄລຍະຜ່ານມາ ແລະ ທິດທາງຈຸດສຸມໃນຕໍ່ໜ້າ.

ພາບ-ຂ່າວ: ເບ່ຕ່າ ໄຊປັນຍາ( ແນວລາວສ້າງຊາດແຂວງຊຽງຂວາງ).