ໃນວັນທີ 27 ກັນຍາ 2019 ນີ້ ຢູ່ທີ່ຫ້ອງປະຊຸມພະແນກ ຖວທ ແຂວງສະຫວັນນະເຂດ ໄດ້ຈັດກອງປະຊຸມຄົ້ນຄວ້າ – ປຶກສາຫາລື ແລະ ວາງແຜນກິດຈະກໍາຮ່ວມມືໃນຂົງເຂດມໍຣະດົກ,ວັດທະນະທຳ,ທ່ອງທ່ຽວ ແລະ ການພັດທະນາຕົວເມືອງຢູ່ແຂວງສະຫວັນນະເຂດ ຂອງອົງການຝຣັ່ງເພື່ອການພັດທະນາ ຫຼື AFD. ໃຫ້ກຽດເຂົ້າຮ່ວມກອງປະຊຸມຄັ້ງນີ້ໂດຍມີທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ,ທ່ານ ນາງ ດາວວອນ ໄຊສຸລຽນ ຫົວໜ້າພະແນກ ຖະແຫຼງຂ່າວ,ວັດທະນະທຳ ແລະ ທ່ອງທ່ຽວແຂວງ,ທ່ານ ວຽງແກ້ວ ສຸກສະຫວັດດີ ຮອງຫັວໜ້າກົມມໍຣະດົກ ກະຊວງຖະແຫຼງຂ່າວ,ວັດທະນະທຳ ແລະ ທ່ອງທ່ຽວ ພ້ອມດ້ວຍບັນດາທ່ານຜູ້ຕາງໜ້າອົງການຝຣັ່ງເພື່ອການພັດທະນາ ຈາກປະເທດຝຣັ່ງເສດເຂົ້າຮ່ວມ.

ໃນກອງປະຊຸມບັນດາທ່ານຜູ້ຕາງໜ້າອົງການ AFD ກໍ່ໄດ້ຜັດປ່ຽນກັນນໍາສະເໜີກ່ຽວກັບການສຶກສາຄວາມເປັນໄປໄດ້,ລວມທັງກິດຈະກຳຂອງໂຄງການ ເພື່ອການພັດທະນາຕົວເມືອງຢູ່ແຂວງສະຫວັນນະເຂດ ແລະ ຮູບແບບ,ຂັ້ນຕອນໃນການສຳລວດ ລວມທັງວິທີການຈັດຕັ້ງປະຕິບັດໂຄງການ ໃຫ້ກັບທ່ານຮອງເຈົ້າແຂວງ ແລະ ບັນດາພາກສ່ວນທີ່ກ່ຽວຂ້ອງໄດ້ຮັບຮູ້ຢ່າງລະອຽດແລ້ວ. ຈາກນັ້ນທ່ານ ຄຳພູນ ຕຸໄພທູນ ຮອງເຈົ້າແຂວງສະຫວັນນະເຂດ ກໍ່ໄດ້ມີຄຳເຫັນວ່າ: ໂດຍຕາງໜ້າໃຫ້ການນໍາຂອງແຂວງສະຫວັນນະເຂດຂໍສະໜັບສະໜູນການລາຍງານແຜນກິດຈະກຳ,ເວລາ ແລະ ງົບປະມານທີ່ທາງອົງການ AFD ໄດ້ສະເໜີຕໍ່ກອງປະຊຸມໃນຄັ້ງນີ້ ສ່ວນວ່າເນື້ອໃນຂອງແຕ່ລະກິດຈະກຳນັ້ນແມ່ນຂໍໃຫ້ກົມມໍຣະດົກເປັນຜູ້ສຶກສາໂດຍໃຫ້ສອດຄ່ອງກັບລະບຽບກົດໝາຍ ເປັນຕົ້ນແມ່ນການກຳນົດກິດຈະກຳ,ການວາງງົບປະມານໃສ່ໃນແຕ່ລະກິດຈະກຳໃຫ້ສົມເຫດສົມຜົນ ນອກຈາກນັ້ນກໍ່ແມ່ນການຈຳລອງວັດຖຸມີຄ່າຂອງບ້ານໜອງເຮືອທອງ ເມືອງໄຊລູລີ ວ່າຈະມີວິທີການຄຸ້ມຄອງ ແລະ ຮັກສາຄືແນວໃດເພື່ອບໍ່ໃຫ້ມໍຣະດົກທີ່ລ້ຳຄ່ານັ້ນຖືກປ່ຽນແປງໄປໃນຮູບແບບອື່ນ.
ສຳລັບໂຄງການພັດທະນາຕົວເມືອງຢູ່ແຂວງສະຫວັນນະເຂດ ຂອງອົງການຝຣັ່ງເພື່ອການພັດທະນາ ແມ່ນມີກຳນົດເວລາ 5 ປີໃນການຈັດຕັ້ງປະຕິບັດກິດຈະກຳຂອງໂຄງການ

ພາບ – ຂ່າວ: ອັກສອນສິນ ພົມມະຈັນ