ພິທີມອບ – ຮັບເຄື່ອງຊ່ວຍເຫຼືອຊຸດເຄື່ອງແບບນັກຮຽນ ແລະ ອຸປະກອນການຮຽນໃຫ້ແກ່ໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດ ຈາກມູນນິທິມາຣູເບນີປະເທດຍີ່ປຸ່ນ ໄດ້ຈັດຂຶ້ນໃນຕອນເຊົ້າວັນທີ 26 ກັນຍາ 2019 ນີ້ ທີ່ຫ້ອງປະຊຸມມະຫາວິທະຍາໄລສະຫວັນນະເຂດ ໂດຍການໃຫ້ກຽດເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ,ທ່ານ ນາງ ດາລາ ຄ່ຽມທຳມະຄຸນ ວຮັກສາການຜູ້ອຳນວຍການສູນການຮຽນຮ່ວມກະຊວງສຶກສາທິການ ແລະ ກິລາ,ທ່ານ ຄາຊູມິເນະ ຄິຄຸຕະ ຄະນະບໍລິຫານງານມູນນິທິມາຣູເບນີ ປະເທດຍີ່ປຸ່ນ ພ້ອມດ້ວຍຄູ – ອາຈານ ແລະນ້ອງນັກຮຽນພາຍໃນ ໂຮງຮຽນສາມັນກິນນອນຊົນເຜົ່າເຂົ້າຮ່ວມ.

ໃນພິທີພາຍຫຼັງທີ່ ທ່ານ ອາຈານ ສົມລິດ ອຸ່ນທະວີ ຜູ້ອຳນວຍການໂຮງຮຽນສາມັນກິນນອນຊົນເຜົ່າ ໄດ້ລາຍງານກ່ຽວກັບການຈັດຕັ້ງປະຕິບັດແຜນພັດທະນາການສຶກສາຂອງໂຮງຮຽນສາມັນກິນນອນຊົນເຜົ່າປະຈຳສົກຮຽນ 2018 – 2019 ແລະ ແຜນພັດທະນາການສຶກສາສົກຮຽນ 2019 – 2020 ຢ່າງເປັນທາງການທາງແລ້ວ. ໂອກາດເຂົ້າຮ່ວມໃນພິທີຄັ້ງນີ້ ທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ ກໍ່ໄດ້ມີຄຳເຫັນວ່າ: ໂຮງຮຽນສາມັນກິນນອນຊົນເຜົ່າ ແມ່ນເປັນໂຮງຮຽນທີ່ຂຶ້ນກັບພະແນກສຶກສາທິການ ແລະ ກິລາແຂວງສະຫວັນນະເຂດ ປະກອບມີ 7 ຊົນເຜົ່າທີ່ມາກິນ,ນອນ ແລະ ຮຽນຢູ່ໂຮງຮຽນແຫ່ງນີ້ ໃນໄລຍະຜ່ານມາທາງຄະນະອຳນວຍການໂຮງຮຽນກໍ່ຄືຄູອາຈານແມ່ນໄດ້ເອົາໃຈໃສ່ສິດສອນນັກຮຽນຕາມຫຼັກສູດການຮຽນ – ການສອນຂອງກະຊວງສຶກສາທິການ ແລະ ກິລາວາງອອກ ຈົນສາມາດສ້າງໄດ້ນັກຮຽນເກັ່ງລະດັບແຂວງ ແລະ ກ້າວໄປເຖິງການສອບເສັງນັກຮຽນເກັ່ງລະດັບຊາດໃນປີຜ່ານມາ.

ຈາກນັ້ນທ່ານ ຄາຊູມິເນະ ຄິຄຸຕະ ຄະນະບໍລິຫານງານມູນນິທິມາຣູເບນີ ປະເທດຍີ່ປຸ່ນ ກໍ່ໄດ້ມີຄຳເຫັນວ່າ: ມູນນິທິຣຸເບນີປະເທດຍີ່ປຸ່ນ ໄດ້ໃຫ້ການຊ່ວຍເຫຼືອເພື່ອສົ່ງເສີມການສຶກສາ ຢູ່ສາທາລະນະລັດ ປະຊາທິປະໄຕ ປະຊາຊົນລາວ ຖືກສ້າງຕັ້ງຂຶ້ນໃນປີ 2008 ເຊິ່ງກົງກັບການສະເຫຼີມສະຫຼອງວັນຄົບຮອບ 150 ປີີ ຂອງບໍລິສັດມາຣູເບນີ ຄໍໂປເຣຊັນ ປະເທດຍີ່ປຸ່ນ ຈຶ່ງໄດ້ມີການສ້າງຕັ້ງມູນນິທິນີ້ຂຶ້ນມາ ເພື່ອສົ່ງເສີມດ້ານການສຶກສາ ເຊິ່ງການຊ່ວຍເຫຼືອດ້ານຊຸດເຄື່ອງແບບນັກຮຽນ ແລະ ອຸປະກອນການຮຽນໃຫ້ແກ່ໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດ ແມ່ນເລີ່ມແຕ່ສົກຮຽນ 2008 – 2009 ເປັນຕົ້ນມາ ປັດຈຸບັນແມ່ນຄົບຮອບ 11 ປີພໍດີ ໃນປີນີ້ແມ່ນໄດ້ຊ່ວຍເຫຼືອນັກຮຽນຈຳນວນ 420 ຄົນ,ຍິງ 141 ຄົນ. ມູນຄ່າເຄື່ອງທີ່ນຳມາຊ່ວຍເຫຼືອທັງໝົດແມ່ນ 81. 865.000 ກີບ.
ຈາກນັ້ນໃນພິທີກໍ່ໄດ້ມີການມອບ – ຮັບເຄື່ອງຊ່ວຍເຫຼືອຊຸດເຄື່ອງແບບນັກຮຽນ ແລະ ອຸປະກອນການຮຽນໃຫ້ກຽດມອບໂດຍທ່ານ ຄາຊູມິເນະ ຄິຄຸຕະ ແລະ ກ່າວຮັບໂດຍ ທ່ານ ນາງ ຫຼິງທອງ ແສງຕາວັນ ເພື່ອມອບຕໍ່ໃຫ້ກັບນັກຮຽນໂຮງຮຽນສາມັນກິນນອນຊົນເຜົ່າແຂວງສະຫວັນນະເຂດ.

ພາບ – ຂ່າວ: ອັກສອນສິນ ພົມມະຈັນ