ໃນວັນທີ 27 ກັນຍາ 2019ນີ້; ກຸ່ມອາດີດນັກສຶກສາສະຫວັນນະເຂດໄດ້ຮ່ວມກັບຮ້ານຂາຍລົດຮອນດ້າຊົງສີ ແລະ ບໍລິສັດອານັນຂາອອກ – ຂາເຂົ້າໄດ້ນຳເອົາເຄື່ອງອຸປະໂພກ-ບໍລິໂພກມາມອບໃຫ້ແກ່ກອງບັນຊາການປ້ອງກັນຄວາມສະຫງົບ ເມືອງ ອາດສະພັງທອງ ແຂວງ ສະຫວັນນະເຂດ, ເພື່ອຈະນຳໄປມອບໃຫ້ແກ່ຊາວນາ – ຊາວກະສິກອນໃນຈຳນວນ 19 ບ້ານທີ່ຖືກຜົນກະທົບຈາກໄພພິບັດນໍ້າຖ້ວມທີ່ຜ່ານມາຄື: ບ້ານ ດົງເຫັນ, ດົງກິໂລ, ພັງໂຮ, ສີວິໄລ, ນານໍ້າທ່ຽງ, ດົງກຶມ, ນາໄລໂຄກ, ດົງຂວາງ,ໄລກະທະ, ປົ່ງດົງ, ປົ່ງນາ,ນາແຜກ, ດົງໝາກກໍ, ດົງນາຂາມ, ນາຫຼັກ, ນາຄໍາໃຕ້, ຕະບອງເພັດ, ໜອງປາກຊ່ອງ ແລະ ບ້ານນາສະຫວ່າງ, ເຊິ່ງເປັນກຽດຮັບໃນຄັ້ງນີ້ໂດຍທ່ານ ພັທ ຄຳສະໝອງດີ ແກ້ວມະນີວົງ ຫົວໜ້າກອງບັນຊາການ ປກສ ເມືອງອາດສະພັງທອງ, ພ້ອມການນຳຂັ້ນເມືອງ ແລະ ອ້າຍນ້ອງ ປກສ ເມືອງເຂົ້າຮ່ວມເປັນສັກຂີພິຍານນໍາ

ສ່ວນເຄື່ອງທີ່ນຳມາມອບປະກອບປະກອບມີ ເຂົ້າສານໜຽວຈຳນວນ 150 ກິໂລ, ນໍ້າດື່ມໂລມາຄຳ 30 ແພັກ, ເສື້ອກ້າມ 77 ໂຕ, ເສື້ອກັນໜາວ ຈໍານວນ 150 ໂຕ, ໝີ່ 2 ແກັດ, ປ໋ອງປາ 2 ແກັດ ແລະ ຜ້າຮົ່ມອີກຈຳນວນໜື່ງລວມູນຄ່າໝົດ 3.000.000 ກ່ວາກີບ.
ທັງນີ້ກໍ່ເພື່ອເປັນການຊ່ວຍເຫຼືອແບ່ງເບົາບັນເທົາທຸກໃນຂັ້ນເບື້ອງຕົ້ນໃຫ້ແກ່ປະຊາຊົນໃນ 19 ບ້ານທີ່ຂຶ້ນກັບເມືອງ ອາດສະພັງທອງ ຜູ້ທີ່ປະສົບໄພນໍ້າຖ້ວມໃຫ້ມີຄວາມອົບອຸ່ນທາງດ້ານຮ່າງກາຍ ແລະຈິດໃຈ.

ພາບຂ່າວ: ນາງ ພູມມະລາ ດວງເປັນຍາ