ໃນວັນທີ 27 ກັນຍາ 2019 ຢູ່ທີ່ສະໂມສອນນະຄອນປາກເຊ,ການນຳແຂວງຈຳປາສັກນຳໂດຍທ່ານ ປອ ບຸນຖອງ ດີວິໄຊ ເລຂາພັກແຂວງ ເຈົ້າແຂວງໆຈໍາປາສັກ,ທ່ານ ເມກສະຫວັນ ພົມພິທັກ ຮອງເລຂາພັກແຂວງ ປະທານສະພາປະຊາຊົນແຂວງ ໄດ້ມອບເຄື່ອງບັັນເທົາທຸກໃຫ້ແກ່ ປະຊາຊົນຜູ້ປະສົບໄພນໍ້າຖ້ວມໜັກ (ເຮືອນເປ່ເພ ແລະສູນຫາຍ)ຈໍານວນ 43 ຄອບຄົວ,ຢູ່ນະຄອນປາກເຊ ໂດຍມີພະແນກແຮງງານສະຫວັດດີການ-ສັງຄົມແຂວງ,ຄະນະກຳມະການຄຸ້ມຄອງໄພພິບັດແຂວງ,ອຳນາດການປົກຄອງນະຄອນ,ກູ່ມ ແລະບ້ານ ຕະຫຼອດຮອດປະຊາຊົນຄອບຄົວທີ່ໄດ້ຮັບປົນກະທົບໜັກເຂົ້າຮ່ວມ.

ເຄື່ອງທີ່ນໍາມາມອບໃນຄັ້ງນີ້ມີ ເຂົ້າສານໜຽວຈໍານວນ 43 ສອບ ,ເຄື່ອງອຸປະໂພກຈາກບັນດາປະເທດອາຊຽນຊ່ວຍເຫຼືອ 43 ແກັດ, ເຄື່ອງອຸປະໂພກຈາກກະຊວງແຮງງານ ແລະສະຫວັດເີການສັງຄົມ ກໍຄືລັດຖະບານ 43 ຖັງ,ສັງກະສີອາລູຊິ້ງ 688 ແຜ່ນ , ລວມມູນຄ່າປະມານ 150 ກ່ວາລ້ານກີບ.
ທ່ານ ປອ ບຸນຖອງ ດີວິໄຊ ເຈົ້າແຂວງໆຈໍາປາສັກ ໄດ້ກ່າວວ່າ ການມອບເຄື່ອງບັນເທົາທຸກໃນຄັ້ງນີ້ ສະແດງເຖີງຄວາມ ເປັນຫ່ວງ ເປັນໄຍຂອງພັກ ແລະ ລັດ ກໍຄືຄະນະພັກ,ອົງການປົກຄອງແຂວງ ທີ່ມີຕໍ່ປະຊາຊົນບັນດາເຜົ່າເວົ້າສະເພາະຊາວນະຄອນປາກເຊ ທີ່ໄດ້ຮັບຜົນກະທົບໜັກ(ເຮືອນເປ້ເພສູນຫາຍ)ຈາກໄພທຳມະຊາດນໍ້າຖ້ວມ ເພື່ອແນໃສ່ແກ້ໄຂໃຫ້ຊີວິດການເປັນຢູ່ຂອງປະຊາຊົນໃຫ້ດີຂຶ້ນ.

ທ່ານເຈົ້າແຂວງຍັງໄດ້ເນັ້ນໃຫ້ປະຊາຊົນມີແນວຄິດອຸ່ນອ່ຽນທຸ່ນທ່ຽງເຊື່ອໝັ້ນຕໍ່ການນໍາພາຂອງພັກ,ເສີມຂະຫຍາຍມູນເຊື້ອດຸໝັ່ນຂະຫຍັນພຽນ,ສາມັກຄີປອງດອງ ຮັກແພງຊ່ວຍເຫຼືອເຊິ່ງກັນ ແລະ ກັນ ,ມີສະຕິລະວັງຕົວບໍ່ຫຼົງເຊື່ອກົນອຸບາຍຂອງຄົນບໍ່ດີທີ່ຫວັງມ້າງເພປະເທດຊາດບ້ານເມືອງຂອງພວກເຮົາ.

ໂດຍ: ເກດສະໜາ ແກ້ວສູວັນນະແສງ