ປະທານສູນກາງສະຫະພັນກຳມະບານລາວ ເຂົ້າຢ້ຽມຂ່ຳນັບທ່ານ ເຈົ້າແຂວງສະຫວັນນະເຂດ

0
400

ໃນຕອນເຊົ້າວັນທີ 30 ກັນຍາ 2019 ຢູ່ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະເຂດ ທ່ານ ປານ ນ້ອຍມະນີ ປະທານສູນກາງສະຫະພັນກຳມະບານລາວ ໄດ້ເຂົ້າຢ້ຽມຂ່ຳນັບທ່ານເຈົ້າແຂວງສະຫວັນນະເຂດ ໂດຍການຕ້ອນຮັບຂອງ ທ່ານສັນຕິພາບ ພົມວິຫານ ເຈົ້າແຂວງສະຫວັນນະເຂດ
ໃນໂອກາດທີ່ໄດ້ເຂົ້າຢ້ຽມຂ່ຳນັບທ່ານເຈົ້າແຂວງສະຫວັນນະເຂດຄັ້ງນີ້ ທ່ານ ປານ ນ້ອຍມະນີ ປະທານສູນກາງສະຫະພັນກຳມະບານລາວ ກໍ່ໄດ້ຢື້ຢາມຖາມຂ່າວກ່ຽວກັບການຟື້ນຟູສະພາບຄວາມເສຍຫາຍຈາກໄພພິບັດນ້ຳຖ້ວນຢູ່ແຂວງສະຫວັນນະເຂດ ໂດຍສະເພາະແມ່ນການແກ້ໄຂຊີວິດການເປັນຢູ່ຂອງປະຊາຊົນ ບໍວ່າຈະເປັນດ້ານຄວາມເສຍຫາຍທາງການຜະລິດ, ແລະ ອີກບັນຫາໜຶ່ງແມ່ນການກະກຽມກອງປະຊຸມໃຫຍ່ 3 ຂັ້ນໂດຍສະເພາະຢູ່ແຂວງສະຫວັນນະເຂດ ທີ່ຈະໄດ້ເປີດຂຶ້ນໃນຫມໍ່ໆນີ້.

ຈາກນັ້ນທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ ກໍ່ໄດ້ຍົກໃຫ້ເຫັນກ່ຽວກັບສະພາບຄວາມເສຍຫາຍຈາກໄພນ້ຳຖ້ວມທີ່ແຂວງສະຫວັນນະເຂດ ລວມທັງຄວາມຕ້ອງການອັນຮີບດ່ວນເຂົ້າໃນການຟື້ນຟູຊີວິດການເປັນຢູ່ຂອງປະຊາຊົນທີ່ໄດ້ຮັບຜົນກະທົບຈາກໄພນ້ຳຖ້ວມໃນຄັ້ງນີ້ ໂດຍສະເພາະກໍ່ແມ່ນບັນຫາເລື່ອງເຂົ້າກິນໃຫ້ກັບປະຊາຊົນໃນໄລຍະ 3 ເດືອນຕໍ່ໜ້ານີ້ຈຳນວນ 1.500 ໂຕນ. ນອກນັ້ນກໍ່ແມ່ນເລັ່ງໃສ່ຟື້ນຟູລະບົບພື້ນຖານໂຄງລ່າງ,ຊົນລະປະທານ ເພື່ອໃຫ້ປະຊາຊົນໄດ້ຜະລິດລະດູແລ້ງໂດຍສະເພາະກໍ່ແມ່ນການຜະລິດເຂົ້ານາແຊງເພື່ອທົດແທນກັບຜົນເສຍຫາຍທີ່ເກີດຂຶ້ນ
ສຳລັບວຽກງານກະກຽມໃຫ້ແກ່ກອງປະຊຸມໃຫຍ່ 3 ຂັ້ນຂອງແຂວງສະຫວັນນະເຂດແມ່ນຈະເລັ່ງໃສ່ໃນການປັບປຸງລະບົບການຈັດຢູ່ບັນດາພະແນກການຂອງແຂວງ ລວມທັງສ້າງຂະບວນການຕ່າງໆເພື່ອຕ້ອນຮັບກອງປະຊຸມໃຫຍ່ 3 ຂັ້ນຂອງແຂວງໃຫ້ເປັນຂະບວນການຟົດຟື້ນ.