ຄະນະຜູ້ແທນຂັ້ນສູງສະພາແຫ່ງຊາດ ແຫ່ງສສ ຫວຽດນາມ ຢ້ຽມຢາມ ແລະ ເຮັດວຽກຢູ່ແຂວງວຽງຈັນ

0
245

ໃນວັນທີ 28 ກັນຍາ 2019 ຜ່ານມາ ຄະນະຜູ້ແທນຂັ້ນສູງສະພາແຫ່ງຊາດ ແຫ່ງສາທາລະນະລັດສັງຄົມນິຍົມຫວຽດນາມ ຢ້ຽມຢາມແລະ ເຮັດວຽກຢູ່ແຂວງວຽງຈັນ ເຊິ່ງນຳໂດຍ ສະຫາຍ ນາງ ຫງວຽນ ທິ ກິມ ເງິນ, ກຳມະການກົມການເມືອງສູນກາງພັກ, ປະທານສະພາແຫ່ງຊາດ ແຫ່ງສາທາລະນະລັດສັງຄົມນິຍົມ ຫວຽດນາມ ເປັນກຽດຕ້ອນຮັບຢ່າງອົບອຸ່ນຂອງ ສະຫາຍ ຄຳພັນ ສິດທິດຳພາ ກຳມະການ ສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ພ້ອມດ້ວຍຄະນະ

ກ່ອນອື່ນແມ່ນໄດ້ໄປຢ້ຽມຢາມ ຫໍສີລາຈາລຶກວິລະບູລຸດນັກຮົບປະສົມ ລາວ-ຫວຽດນາມ ຄະນະຜູ້ແທນໄດ້ພ້ອມກັນວາງພວງມາລາ ແລະ ໄຕ້ທູບ ເພື່ອໄຫວ້ອາໄລເຖິງດວງວິນຍານຂອງບັນດາສະຫາຍນັກຮົບຜູ້ທີ່ໄດ້ເສຍສະຫຼະຊີວິດເລືອດເນື້ອເພື່ອຊາດເພື່ອປະຊາຊົນໃນສະໄໝສົງຄາມຕ້ານຈັກກະພັດຜູ້ຮຸກຮານ ເພື່ອປົດປ່ອຍປະເທດລາວ, ບັນດາສະຫາຍພະນັກງານ, ນັກຮົບອາສາສະໝັກ ແລະ ຊ່ຽວຊານຫວຽດນາມ ໄດ້ຄຽງບ່າຄຽງໄຫຼ່ກັບກອງທັບປະຊາຊົນລາວອ້າຍນ້ອງ ແລະ ປະຊາຊົນລາວບັນດາເຜົ່າ;

ບັນດາສະຫາຍໄດ້ສູ້ຮົບຢ່າງພິລະອາດຫານ ແລະ ໄດ້ເສຍສະຫຼະຊີວິດເພື່ອພາລະກິດປະຕິວັດອັນສູງສົ່ງ ແລະ ນຳເອົາເອກະລາດມາໃຫ້ປະເທດລາວ, ພັກ, ລັດຖະບານ ແລະ ປະຊາຊົນ ສອງຊາດ ລາວ-ຫວຽດນາມ ໄດ້ຈົດຈຳບຸນຄຸນອັນໃຫຍ່ຫຼວງ ແລະ ວິລະກຳອັນລ້ຳເລີດ ຂອງບັນດາສະຫາຍນັກຮົບຜູ້ພິລະອາດຫານໄວ້ຕະຫລອດໄປ.

ໃນໂອກາດນີ້ຄະນະຜູ້ແທນຂັ້ນສູງສະພາແຫ່ງຊາດ ແຫ່ງສາທາລະນະລັດ ສັງຄົມນິຍົມຫວຽດນາມ ຍັງໄດ້ເຂົ້າຢ້ຽມຂ່ຳນັບ ສະຫາຍ ຄຳພັນ ສິດທິດຳພາ ກຳມະການ ສູນກາງພັກ ເລຂາພັກແຂວງ ເຈົ້າແຂວງໆວຽງຈັນ ເພື່ອພົບປະແລກປ່ຽນບົດຮຽນ ໃນການສ້າງສາພັດທະນາເສດຖະກິດ-ສັງຄົມ ໃຫ້ມີການເຕີບໃຫຍ່ຂະຫຍາຍຕົວຢ່າງຕໍ່ເນື່ອງ

ແລະ ທັງເປັນການຮັດແຫນ້ນສາຍພົວພັນສາມັກຄີແບບພິເສດລະຫວ່າງ ສອງຊາດລາວ-ຫວຽດນາມ ກໍຄືບັນດາແຂວງແຮກສ່ຽວ ລະຫວ່າງ ແຂວງວຽງຈັນ ສປປລາວ ແລະ ແຂວງ ອຽນບ້າຍ,ຮ້າຍເຢືອງ,ຮ້າຍຟ໋ອງ ແລະ ແຂວງ ເງະອ່ານ ສສ ຫວຽດນາມທີ່ມີການໄປມາຫາສູ່ ແລະ ແລກປ່ຽນບົດຮຽນຮອບດ້ານພ້ອມທັງໃຫ້ການຊ່ວຍເຫລືອ ສປປລາວ ກໍຄືແຂວງວຽງຈັນທີ່ໄດ້ຊ່ວຍເຫລືອ ແລະ ຮ່ວມມືຮອບດ້ານ ທັງນີ້ກໍເພຶ່ອຮັດແຫນ້ນສາຍພົວພັນສາມັກຄີແບບພິເສດລະຫວ່າງ ສອງລັດ ສອງຊາດ ປະຊາຊົນລາວ ແລະ ຫວຽດນາມ ໃຫ້ມີຄວາມເຕີບໃຫຍ່ ແລະ ຫມັ້ນຄົງທະນົງແກ່ນຍິ່ງໆຂຶ້ນ.