ໃນຕອນເຊົ້າຂອງວັນທີ 28 ກັນຍາ 2019 ທີ່ຜ່ານມາ. ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ພ້ອມຄະນະ ໄດ້ລົງພົບປະໂອ້ລົມອຳນາດການປົກຄອງ ແລະ ປະຊາຊົນກຸ່ມບ້ານດົງທ່າ. ຢູ່ທີ່ສະໂມສອນຫ້ອງການ ກຸ່ມບ້ານດັ່ງກ່າວ.
ຕໍ່ກອງປະຊຸມ ທ່ານ ໄວພົດ ວໍລະເດດ ເລຂາຄະນະພັກຮາກຖານກຸ່ມບ້ານດົງທ່າ ກໍ່ໄດ້ລາຍງານ ສະພາບໂດຍລວມ ຂອງກຸ່ມບ້ານດົງທ່າ ໃນໄລຍະ 9 ເດືອນຜ່ານມາ. ເຊິ່ງກຸ່ມບ້ານດົງທ່າ ເມືອງອຸທຸມພອນ ຕັ້ງຫ່າງຈາກເທດສະບານເມືອງໄປທາງທິດຕາເວັນອອກຊຽງເໜືອ ປະມານ 35 ກິໂລແມັດ ໂດຍມີເສັ້ນທາງເລກທີ 10 ຕັດຜ່ານ, ກຸ່ມບ້ານດົງທ່າ ປະກອບມີ 6 ບ້ານຂຶ້ນກັບຄື: ບ້ານດົງທ່າ, ບ້ານດົງໃນ, ບ້ານໜອງແປນ, ບ້ານໂນນປ່າໄລ່, ບ້ານດົງຂວາງ ແລະ ບ້ານນາຄຳ. ມີ 874 ຫຼັງຄາເຮືອນ, ມີ 1.099 ຄອບຄົວ, ມີພົນລະເມືອງທັງໝົດ 6.318 ຄົນ, ຍິງ 3.178 ຄົນ, ປະຊາຊົນສ່ວນຫຼາຍມີອາຊີບເຮັດນາເປັນຕົ້ນຕໍ, ປູກຝັງ-ລ້ຽງ ສັດ ແລະ ຄ້າຂາຍເປັນສຳຮອງ.

ປະຈຸບັນພາຍໃນກຸ່ມບ້ານມີເນື້ອທີ່ນາທັງໝົດ 1.270 ກວ່າເຮັກຕາ, ສະເລ່ຍສະມັດຕະພາບການຜະລິດເຂົ້ານາປີໄດ້ 3,5 ໂຕນ/ເຮັກຕາ. ທຽບໃສ່ຫົວຄົນໄດ້ 702 ກິໂລ/ຄົນ/ປີ. ນອກຈາກນີ້ຍັງມີເນື້ອທີ່ປູກອ້ອຍຈຳນວນ 59 ກວ່າເຮັກຕາ, ປູກມັນຕົ້ນ 15 ກວ່າເຮັກຕາ ແລະ ປູກຍາງພາລາ 1.200 ກວ່າເຮັກຕາ.
ຈາກນັ້ນ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ກໍ່ໄດ້ມີຄຳເຫັນໂອ້ລົມອຳນາດການປົກຄອງ ແລະ ພໍ່ແມ່ປະຊາຊົນ. ຕໍ່ວຽກງານພັດທະນາເສດຖະກິດ-ສັງຄົມຂອງກຸ່ມບ້ານດັ່ງກ່າວ ໂດຍທ່ານໄດ້ເນັ້ນໃຫ້ເອົາໃຈ ໃສ່ໃນການພັດທະນາພືນຖານໂຄງລາງ ພ້ອມທັງຮັກສາຄວາມສາມັກຄີພາຍໃນບ້ານ-ກຸ່ມບ້ານ ໃຫ້ເປັນປຶກແຜ່ນ, ເອົາໃຈໃສ່ຕ້ານປະກົດການຫຍໍ້ທໍ້ຕ່າງໆ ທີ່ເກີດຂື້ນໃນສັງຄົມ ບໍ່ວ່າຈະເປັນຂີ້ລັກ, ງັດແງະ, ຢາເສບຕິດ ແລະ ບັນຫາອື່ນໆ ຄຽງຄູ່ກັນນີ້ ກໍ່ຄວນເອົາໃຈໃສ່ເຮັດການຜະລິດປູກຝັງລ້ຽງສັດ ໃຫ້ໄດ້ຫຼາຍກາຍເປັນສິນຄ້າ ສ້າງໃຫ້ຄອບຄົວຂອງຕົນມີລາຍຮັບເພີ່ມຂຶ້ນ.

ໂອກາດນີ້ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ພ້ອມຄະນະ ກໍ່ຍັງໄດ້ລົງຢ້ຽມເບິ່ງ ພຣະທາດພຣະນົມຈຳລອງ ຢູ່ບ້ານດົງໃນ, ວັດປ່າບໍ່ນ້ຳບຸ້ຍ ແລະ ໂຄງການກໍ່ສ້າງອ່າງເກັບນ້ຳ ຊົນລະປະທານບ້ານນາຄຳ ນຳອີກດ້ວຍ.

ນັກຂ່າວເມືອງອຸທຸມພອນ: ພອນປະເສີດ ແຜນພັກດີ