ເອື້ອຍນ້ອງແມ່ຍິງເມືອງອຸທຸມພອນ ໄດ້ຫວນຄືນແຜນດຳເນີນງານແຫ່ງຊາດກ່ຽວ ກັບການປ້ອງກັນ ແລະ ລຶບລ້າງຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກ ໃນລາວ, ເຊິ່ງໄດ້ຈັດຂື້ນໃນຕອນເຊົ້າຂອງວັນທີ 27 ກັນຍາ 2019 ທີ່ສະໂມສອນຂອງເມືອງ,ໂດຍໃຫ້ກຽດເຂົ້າຮ່ວມ ແລະ ປາຖະກະຖາຂອງ ທ່ານ ໂພໄຊ ອິນທະວົງສາ ຮອງເຈົ້າເມືອງອຸທຸມພອນ ເຊິ່ງທ່ານໄດຍົກໃຫ້ເຫັນວ່າ: ຄວາມຮຸນແຮງຕໍ່ແມ່ຍິງມີຫຼາຍຮູບການ ບໍ່ວ່າຈະເປັນຄວາມຮຸນແຮງທາງດ້ານຮ່າງກາຍ, ຊຶ່ງຈະສະແດງອອກຈາກການທຸບຕີ,ກັກຂັງ,ການທໍລະມານໃນຮູບແບບຕ່າງໆ ແລະ ອື່ນໆ,ຄວາມຮຸນແຮງທາງດ້ານຈິດໃຈ,ຄວາມຮຸນແຮງທາງດ້ານເພດ ແລະ ການເອົາລັດ ເອົາປຽບ ແລະ ການຂູດຮີດທາງເສດຖະກິດ, ຮູບການ ແລະ ລະດັບຄວາມຮຸນແຮງຕໍ່ແມ່ຍິງ ຂື້ນກັບສະພາບຕົວຈິງທາງດ້ານການເມືອງ ແລະ ລະດັບການພັດທະນາທາງດ້ານເສດຖະກິດ, ອັນພົ້ນເດັ່ນໃນຍຸກໂລກາພິວັດແຫ່ງການ ເຂົ້າເຖິງ ແລະ ຊົມໃຊ້ເທັກໂນໂລຊີຂໍ້ມູນຂ່າວສານຢ່າງກວ້າງຂວາງແມ່ນໄດ້ເກີດມີ ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກໃນຮູບການໃໝ່ເຊັ່ນວ່າ: ຄວາມຮຸນແຮງຕໍ່ແມ່ຍິງ ແລະ ຄວາມຮຸນແຮງຕໍ່ເດັກຜ່ານອິນເຕີເນັດ ແລະ ໂທລະສັບມືຖື

ສ່ວນວ່າແມ່ຍິງທີ່ເປັນກຸ່ມສ່ຽງຂອງຄວາມຮຸນແຮງກວ່າໝູ່ ແມ່ນແມ່ຍິງທີ່ທຸກຍາກ, ແມ່ຍິງຊົນນະບົດ,ແມ່ຍິງຜູ້ລີ້ໄພ,ແຮງງານເຄື່ອນຍ້າຍທີ່ເປັນເພດຍິງ, ແມ່ຍິງທີ່ຢູ່ໃນສະ ຖານທີ່ກັກຂັງ,ເດັກຍິງ,ແມ່ຍິງພິການ,ແມ່ຍິງທີ່ມີອາຍຸສູງ ຫຼື ແມ່ຍິງອົບພະຍົກທີ່ຖືກສົ່ງ ກັບປະເທດໃນເຂດທີ່ມີການປະທະກັນທາງດ້ານອາວຸດ ຫຼື ສົງຄາມການເມືອງ, ການກໍ່ ການຮ້າຍ ລວມທັງການຖືກຈັບໄປເປັນຕົວປະກັນ
ທ່ານ ໂພໄຊ ອິນທະວົງສາ ຍັງເວົ້າອີກວ່າ: ຄວາມຮຸນແຮງຕໍ່ແມ່ຍິງ ເມື່ອເກີດຂື້ນແລ້ວ ມີຜົນກະທົບຍາວນານຕໍ່ກະໂຕແມ່ຍິງ ແລະ ລູກເຕົ້າຂອງເຈົ້າເອງ, ຕະຫຼອດຮອດຜົນກະທົບຕໍ່ຊຸມຊົນ ແລະ ທົ່ວສັງຄົມ.

ນັກຂ່າວເມືອງອຸທຸມພອນ ບຸນຊູ ພົມມະເທບ