ໃນຕອນເຊົ້າວັນທີ 26 ກັນຍາ 2019 ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ພ້ອມຄະນະ,ໄດ້ນໍາເອົາເຄື່ອງທີ່່ລະດົມໄດ້ຈາກທຸກພາກສ່ວນໃນສັງຄົມພາຍໃນເມືອງເພື່ອນໍາໄປມອບຊ່ວຍເຫຼືອປະຊາຊົນເມືອງຊົນນະບູລີ ທີ່ຖືກຜົນກະທົບຈາກນໍ້າຖ້ວມໃນຜ່ານມາ, ໂດຍຜ່ານການຈັດຕັ້ງຂອງ ເມືອງ,ເຊິ່ງເຄື່ອງທີ່ນໍາໄປມອບປະກອບມີ ມີ່,ເຂົ້າສານ,ນໍ້າດື່ມ,ປາກະປ໊ອງ ແລະ ອື່ນໆ ລວມມູນຄ່າ 27 ລ້ານກວ່າກີບ, ກ່າວຮັບໂດຍແມ່ນທ່ານ ສຸວິໄລ ຫຼວງສະລາດ ເຈົ້າເມືອງຊົນນະບູລີ,ຊ້ອງໜ້າການຈັດຕັ້ງຂອງສອງເມືອງ

ຂະນະດຽວກັນ ທ່ານ ປະສົງສິນ ຈະເລີນສຸກ ເຈົ້າເມືອງອຸທຸມພອນ ກໍ່ໄດ້ມີຄຳເຫັນວ່າ: ເຖິງແມ່ນວ່າເຄື່ອງທີ່ນໍາມາມອບຄັ້ງນີ້ມັນບໍ່ຫຼວງບໍ່ຫຼາຍກໍ່ຕາມ ແຕ່ກໍ່ສະແດງເຖິງຄວາມມີນໍ້າໃຈຊ່ວຍ ເຫຼືອເພື່ອນມະນຸດດ້ວຍທີ່ຕົກທຸກໄດ້ຍາກ,ໂດຍສະເພາະແມ່ນໃນຍາມຖືກນໍ້າຖ້ວມເຮືອນຊານບ້ານຊ່ອງ, ເນື້ອທີ່ຮົ້ວສວນໄຮ່ນາ ຖືກເສຍຫາຍໜັກ ເຮົາຄົນລາວດ້ວຍກັນຕ້ອງຊ່ວຍເຫຼືອກັນ,ພ້ອມນີ້ ທ່ານຍັງໄດ້ຝາກຄວາມຫວັງໄວ້ນໍາການນໍາຂອງເມືອງພາຍຫຼັງນໍ້າລົດລົງແລ້ວຕ້ອງໄດ້ປັບປຸງຟື້ນຟູຊີວິດການເປັນຢູ່ຂອງປະຊາຊົນໃຫ້ດີຂື້ນ, ພ້ອມນໍາພາປະຊາຊົນສ້າງສາພັດທະນາປະເທດຊາດບ້ານເມືອງ ຂອງຕົນໃຫ້ຈະເລີນກ້າວໜ້າ
ສ່ວນທາງດ້ານ ທ່ານ ສຸວິໄລ ຫຼວງສະລາດ ເຈົ້າເມືອງຊົນນະບູລີ ກໍ່ໃຫ້ຄຳໝັ້ນສັນຍາວ່າ: ເຄື່ອງທີ່ການນໍາຂອງເມືອງອຸທຸມພອນນຳມາມອບຄັ້ງນີ້ ແມ່ນເຖິງມືປະຊາຊົນຜູ້ທີ່ໄດ້ຮັບຜົນກະທົບ ຈາກນໍ້າຖ້ວມຢ່າງແນ່ນອນ,ທົ່ວເມືອງມີບ້ານທີ່ຖືກນໍ້າຖ້ວມທັງໝົດ 48 ບ້ານ,ໜັກກວ່າໝູ່ມີ 16 ບ້ານ,ໃນນີ້ມີບ້ານເມືອງໂຮງ ແລະ ບ້ານນາຈານ ໜັກກວ່າໝູ່,ເນື້ອທີ່ນາຖືກນໍ້າຖ້ວມເສຍຫາຍ 10.000 ກວ່າເຮັກຕາ,ເຮັດໃຫ້ເສັ້ນທາງເປ້ເພເສຍ,ໂຮງຮຽນ,ສຸກສາລາເສຍຫາຍ 35 ແຫ່ງ

ສໍາລັບທ່ານນາງ ນ້ອຍ ປະຊາຊົນບ້ານກອງປະທຸມວັນ ເມືອງຊົນນະບູລີ ໜຶ່ງໃນຈຳນວນປະຊາຊົນຜູ້ທີ່ໄດ້ຮັບຜົນກະທົບຈາກນໍ້າຖວ້ມຍັງໃຫ້ສຳພາດຕໍ່ນັກຂ່າວພວກເຮົາວ່າ: ພັດຕັ້ງແຕ່ເກີດມາ 40 ກວ່າປີ ຫາກໍ່ເຫັນປີນີ້ ຖືກນໍ້າຖ້ວມໜັກ ແລະ ເສຍຫາຍຫຼາຍ,ຖ້ວມຈົນເກືອບວິດຫຼັງຄາເຮືອນ ແລະ ສິ່ງທີ່ຕົນເອງຢາກໄດ້ອັນຮີບດ່ວນໃນເມື່ອນໍ້າ ລົດລົງແລ້ວກໍ່ແມ່ນເຂົ້າກິນ, ແນວພັນເຂົ້າປູກເພື່ອເຮັດການຜະລິດເຂົ້ານາແຊງ, ເພື່ອທົດແທນເຂົ້ານາປີ ທີ່ນໍ້າຖ້ວມເສຍຫາຍຈົນໝົດ
ສະເພາະການມອບເຄື່ອງຊ່ວຍເຫຼືອໃຫ້ບັນດາເມືອງທີ່ຖືກນໍ້າຖ້ວມຂອງການນໍາເມືອງອຸທຸມພອນແມ່ນເປັນຄັ້ງທີສາມແລ້ວຖັດຈາກເມືອງເຊໂປນ ແລະ ເມືອງຈຳພອນ.

ນັກຂ່າວເມືອງອຸທຸມພອນ: ບຸນຊູ ພົມມະເທບ