ຄະນະພະສົງສໍາມະເນນ ຈາກວັດຈອມທອງ ບ້ານຈອມທອງ ເມືອງທ່າແຂກ ແຂວງຄໍາມ່ວນ ພ້ອມດ້ວຍອອກຕົນຍາດຍາດໂຍມຈາກເມືອງດັ່ງກ່າວ ໄດ້ເດີນທາງມາມອບເຄື່ອງຊ່ວຍ​ເຫລືອ​ເພື່ອ​ບັນ​ເທົາ​ທຸກໃຫ້ແກ່ 3 ບ້ານຄື: ບ້ານແຊງ, ບ້ານປະທຸມພອນ ແລະ ບ້ານໜອງແຂ້ ເມືອງປະທຸມພອນ ທີ່​ໄດ້​ຮັບ​ຜົນ​ກະທົບ​ຈາກ​ໄພ​ນ້ຳ​ຖ້ວມ ​ໃນ​ວັນ​ທີ 29 ກັນຍາ ຜ່ານ​ມາ ​ເຊິ່ງເຄື່ອງ​ທີ່​ນຳ​ມາ​ຊ່ວຍ​ເຫລືອ​ຄັ້ງ​ນີ້ ປະກອບ​ມີ: ນໍ້າດື່ມ, ໝີ່, ປາກະປ໋ອງ, ເຂົ້າໜົມ, ເຄື່ອງໄຊ້ທີ່ຈໍາເປັນ ແລະ ຢາປົວພະຍາດຈໍານວນໜຶ່ງ ລວມມີ 600 ກວ່າ​ຖົງ ລວມມູນ​ຄ່າ​ເກືອບ 14 ລ້ານ​ກີບ.

ການລົງມາມອບເຄື່ອງຊ່ວຍ​ເຫລືອໃນຄັ້ງນີ້, ມີຄະນະການນໍາຈາກເມືອງ ນໍາໂດຍ ທ່ານສົມເບັງ ໄຊຍະວົງ ຮອງເຈົ້າເມືອງປະທຸມພອນ, ປະທານຄະນະກໍາມະການປ້ອງກັນ ແລະ ຄວບຄຸມໄພພິບັດຂັ້ນເມືອງ, ເລຂາຄະນະພັກຮາກຖານກຸ່ມບ້ານ, ອໍານາດການປົກຄອງບ້ານແຕ່ລະຂັ້ນ ພ້ອມດ້ວຍພໍ່ແມ່ປະຊາຊົນທີ່ຖືກຜົນກະທົບເຂົ້າຮ່ວມຕ້ອນຮັບຢ່າງຫລວງຫລາຍ.