ປາກລາຍຈັດພິທີຍ່າງເພື່ອສຸຂະພາບໃນວັນຄົນພິການ ແລະ ວັນສາກົນຜູ້ອາຍຸສູງ

0
72

ເມືອງປາກລາຍ ແຂວງໄຊຍະບູລີ ຈັດພິທີຍ່າງເພື່ອສຸຂະພາບ ໂອກາດວັນຄົນພິການ ແລະ ວັນສາກົນຜູ້ອາຍຸສູງ ໃນວັນທີ່ 1 ຕຸລາ 2019 ນີ້ ໂດຍມີທ່ານ ສົມຈິດ ຈັນທະວົງ ກຳມະການພັກແຂວງ ເລຂາຄະນະບໍລິຫານງານພັກ ເມືອງປາກລາຍ ເຈົ້າເມືອງໆປາກລາຍ ມີບັນດາການນຳຂອງເມືອງ, ພະນັກງານບໍານານອາວຸໂສປະຕິວັດ, ພະນັກງານລັດຖະກອນ ພ້ອມດ້ວຍພາກສ່ວນຕ່າງໆພາຍໃນເມືອງເຂົ້າຮ່ວມຢ່າງຫຼວງຫຼາຍ.

ການຈັດພິທີໃນຄັ້ງນີ້ຈັດຂຶ້ນເພື່ອເສີມສ້າງ ແລະ ຂະຫຍາຍຄຸນລັກສະນະອັນດີເລີດ ຂອງຜູ້ສູງອາຍຸ ບັນດາເຜົ່າຂອງລາວ ທີ່ມີຜົນງານຕໍ່ພາລະກິດ ຕໍ່ສູ້ກູ້ຊາດໃນເມື່ອກ່ອນ ກໍຄືໃນພາລະກິດປົກປັກຮັກສາ ແລະ ສ້າງສາພັດທະນາປະ ເທດຊາດໃນປັດຈຸບັນ ໃຫ້ນັບມື້ນັບສູງຂຶ້ນ, ໂດຍສ້າງໂອກາດໃຫ້ຄົນພິການ ແລະ ຜູ້ອາຍຸສູງ ສືບຕໍ່ເປັນພົນລະເມືອງທີ່ດີຂອງຊາດ, ຖ່າຍທອດມູນເຊື້ອຄຸນງາມ ຄວາມດີໃຫ້ຄົນຮຸ່ນຫລັງສືບທອດຕໍ່ໄປ.
ພ້ອມນີ້ໃນພິທີໄດ້ມີການກວດເຊັກສຸຂະພາບໂດຍບໍ່ໄດ້ເສຍຄ່າໃຫ້ບັນດາຜູ້ເຂົ້າຮ່ວມ, ສ້າງກິດຈະກໍາຍ່າງເພື່ອສຸຂະພາບ ແລະ ແຂ່ງຂັນກິລາດຶງເຊືອກລະຫວ່າງຄະນະນຳຂອງເມືອງກັບພະນັກງານບຳນານ ດ້ວຍບັນຍາກາດເບີກບານມ່ວນຊື່ນ.

ຂ່າວ:ທອງສະຫວັດ ໄຊຍະລາດ