ກະຊວງປ້ອງກັນຄວາມສະຫງົບມອບເຄື່ອງຊ່ວຍເຫຼືອຜູ້ປະສົບໄພນໍ້າຖ້ວມໃຫ້ແຂວງສະຫວັນນະເຂດ

0
159

ໃນຕອນເຊົ້າວັນທີ 1 ຕຸລາ 2019ນີ້ຢູ່ທີ່ຫ້ອງຮັບແຂກຫ້ອງວ່າການປົກຄອງແຂວງສະຫວັນນະເຂດທ່ານ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບ ໄດ້ນຳເອົາເຄື່ອງ ພ້ອມດ້ວຍເງິນນຳມາມອບໃຫ້ການນຳແຂວງເພື່ອຊ່ວຍເຫຼືອຜູ້ປະສົບໄພນໍ້າຖ້ວມທີ່ແຂວງສະຫວັນນະເຂດໂດຍການຕ້ອນຮັບຂອງທ່ານ ສັນຕິພາບ ພົມວິຫານ ເຈົ້າແຂວງສະຫວັນນະເຂດ.

ທ່ານ ພົນໂທ ວິໄລ ຫຼ້າຄຳຟອງ ລັດຖະມົນຕີກະຊວງປ້ອງກັນຄວາມສະຫງົບໄດ້ກ່າວລາຍງານວ່າ: ຈຸດປະສົງທີ່ນຳເອົາເຄື່ອງມາມອບໃນຄັ້ງນີ້ແມ່ນ ອີງໃສ່ສະພາບທີ່ເຮົາເຫັນໃນໄລຍະຜ່ານມາທີ່ໄດ້ມີການເກີດອຸທົກກະໄພພິບັດນໍ້າຖ້ວມຢູ່ສະເພາະ 6 ແຂວງ ທີ່ໜັກພໍສົມຄວນ ໃນເວລານັ້ນກຳລັງປ້ອງກັນຄວາມສະຫງົບ,ກະຊວງປ້ອງກັນປະເທດກໍ່ໄດ້ເຮັດໜ້າທີ່ຊ່ວຍເຫຼືອພໍສົມຄວນ, ດັ່ງນັ້ນດ້ວຍຄວາມເປັນຫ່ວງເປັນໄຍຂອງກະຊວງປ້ອງກັນຄວາມສະຫງົບຈຶ່ງໄດ້ລະດົມກັນທົ່ວກະຊວງ ແລະ ໄດ້ເງິນຈຳນວນໜຶ່ງ, ກໍຈະໄດ້ແບ່ງໃຫ້ແຂວງທີ່ຖືກອຸທົບກະໄພນໍ້າຖ້ວມເພື່ອແບ່ງເບົາໃຫ້ແກ່ປະຊາຊົນເພື່ອແກ້ໄຂສະພາບຫຼຸດຜ່ອນການແບກຫາບຂອງພວກສະຫາຍ ແລະ ເຄື່ອງທີ່ນຳມອບມອບໃນຄັ້ງນີ້ ເປັນວັດຖຸມີ ເກີບຜູ້ໃຫຍ່ຈຳນວນ 600ຄູ່, ເກີບເດັກນ້ອຍຈຳນວນ 500 ຄູ່, ເຄື່ອງນຸ່ງຫົ່ມ 725 ຊຸດ ກະເປົ໋າ 20 ໜ່ວຍ,ລວມມູນຄ່າເປັນເງິນ169.600.000ກີບ, ພ້ອມເງິນສົດຈຳນວນ 80.000.000ກີບ, ເຄື່ອງ ແລະ ເງິນດັ່ງກ່າວຂໍມອບຜ່ານເຈົ້າແຂວງເພື່ອນຳມອບຕໍ່ໃຫ້ແກ່ປະຊາຊົນ.
ຈາກນັ້ນທ່ານ ເຈົ້າແຂວງກໍສະແດງຄວາມຂອບໃຈມາຍັງກະຊວງປ້ອງກັນຄວາມສະຫງົບທີ່ນຳເອົາວັດຖຸປັດໃຈມາມອບຊ່ວຍເຫຼືອຜູ້ທີ່ຖືກອຸທົກກະໄພຈາກທຳມະຊາດໃນຄັ້ງນີ້ ແລະ ຈະນຳເອົາເຄື່ອງດັ່ງກ່າວນີ້ລົງໄປແຈກຈາຍໃຫ້ກັບປະຊາຊົນຢ່າງທົ່ວເຖິງ.

ຂ່າວ: ວິລັດດາ ດວງຈັນທາ