ໃນຕອນເຊົ້າວັນທີ 4 ຕຸລາ2019ນີ້ຢູ່ທີ່ສະໂມສອນໂຮງຮຽນການເມືອງ-ການປົກຄອງແຂວງສະຫວັນນະເຂດໄດ້ຈັດຕັ້ງຟັງປາຖະກາຖາ 4 ວັນທີ່ສຳຄັນຄື:ວັນຄູແຫ່ງຊາດຄົບຮອບ 25 ປີ, ວັນຄົນພິການແຫ່ງຊາດຄົບຮອບ 27 ປີ,ວັນສາກົນຜູ້ອາຍຸສູງຄົບຮອບ 20ປີ ແລະວັນຊາດ ສປ ຈີນຄົບຮອບ 70 ປີໂດຍໃຫ້ກຽດເຂົ້າຮ່ວມຂອງທ່ານ ນາງ ຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະ ກິລາແຂວງ, ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ ແລະ ສະຫວັດດີການສັງຄົມ, ທ່ານ ນາງ ຫົງຄຳ ໄຊຍະຄົມ ຮອງຫົວໜ້າຄະນະໂຄສະນາອົບຮົມແຂວງ ພ້ອມີບັນດາພະນັກງານຫຼັກແຫຼ່ງອ້ອມຂ້າງແຂວງເຂົ້າຮ່ວມຮັບຟັງ.

ໃນພິທີ ທ່ານ ນາງຫຼິງທອງ ແສງຕາວັນ ຫົວໜ້າພະແນກສຶກສາທິການ ແລະກິລາແຂວງ ກໍ່ໄດ້ໃຫ້ກຽດ ປາຖະກາຖາວັນຄູແຫ່ງຊາດ ຄົບຮອບ 25ປີ ໂດຍທ່ານໄດ້ຍົກໃຫ້ເຫັນຄວາມເປັນມາຂອງວັນຄູແຫ່ງຊາດເຊິ່ງ ໃນຊຸມປີ 1905ຄົນລາວໄດ້ເຂົ້າຮຽນມີໜ້ອຍທີ່ສຸດ ໃນນັ້ນໄດ້ມີຜູ້ໜຶ່ງຊື່ວ່າ ທ້າວ ຄຳ ໄດ້ຮຽນແຕ່ຫ້ອງທີ 1 ຈົນຈົບປໍ 6 ແລະ ໄດ້ເຂົ້າຮ່ວມຝຶກອົບຮົມຄູເປັນຜູ້ທຳອິດຂອງຄົນລາວ,ພາຍຫຼັງສຳເລັດການສຶກສາທ້າວ ຄຳ ກໍ່ໄດ້ເຂົ້າຮັບລາດຊະການເປັນຄູສອນເລີ່ມແຕ່ວັນທີ 7ເດືອນຕຸລາປີ 1907,

ຕະຫຼອດຊີວິດຂອງນາຍຄູຄຳນອກຈາກເຮັດໜ້າທີ່ການສິດສອນແລ້ວຍັງໄດ້ເຂົ້າຮ່ວມຂະບວນກາຍນຳພາປະຊາຊົນລາວລຸກຂຶ້ນຕໍ່ສູ້ຕ້ານການຮຸກຮານຂອງພວກລ່າເມືອງຂຶ້ນ ຈົນໄດ້ຮັບໄຊຊະນະເປັນແຕ່ລະໄລຍຍແລະໄດ້ສະຖາປານາເປັນ ສາທາລະນະລັດ ປະຊາທິປະໄຕ ປະຊາຊົນລາວໃນວັນທີ 2 ທັນວາ1975ເຊິ່ງໄດ້ເປັນເງື່ອນໄຂເອື້ອອຳນວຍໃນການພັດທະນາການສຶກສາຂອງລາວເວົ້າລວມເວົ້າສະເພາະແມ່ນການພັດທະນາທັນແຖວຄູ-ອາຈານສອນຈຶ່ງໄດ້ເພີ່ມຈຳນວນຂຶ້ນ ດັ່ງນັ້ນເພື່ອເຮັດໃຫ້ຄວາມກະຕັນຍູຮູ້ບຸນຄຸນຕໍ່ຄູ-ອາຈານໃນທົ່ວສັງຄົມໄດ້ກາຍມາເປັນພຶດຕິກຳຕົວຈິງລັດຖະບານຈຶ່ງໄດ້ກຳນົດເອົາ ວັນທີ 7 ຕຸລາ ຂອງທຸກໆປີເປັນວັນຄູແຫ່ງຊາດ ເຊິ່ງປີນີ້ແມ່ນ ຄົບຮອບ25ປີພໍດີ.


ຈາກນັ້ນ, ທ່ານ ບຸນລົບ ໂຄດຫຼັກຄຳ ຫົວໜ້າພະແນກແຮງງານ ແລະ ສະຫວັດດີການສັງຄົມ, ທ່ານ ນາງ ຫົງຄຳ ໄຊຍະຄົມ ຮອງຫົວໜ້າຄະນະໂຄສະນາອົບຮົມແຂວງກໍ່ໄດ້ຜັດປ່ຽນກັນ ປາຖະກາຖາວັນຄົນພິການແຫ່ງຊາດຄົບຮອບ 27 ປີ, ວັນສາກົນຜູ້ອາຍຸສູງຄົບຮອບ 20 ປີ ແລະ ວັນຊາດ ສປ ຈີນຄົບຮອບ70ປີ ເພື່ອໃຫ້ພະນັກງານຫຼັກແຫຼ່ງໄດ້ຮັບຮູ້ເຂົ້າໃຈ ແລະ ເຊື່ອມຊືມເຖິງວັນປະຫວັດສາດພ້ອມທັງນຳເອົາບົດຮຽນຕ່າງໆໄປໝູນໃຊ້ເຂົ້າໃນວຽກງານຂອງຕົນ.

ຂ່າວ: ວິລັດດາ ດວງຈັນທາ
Medialaos Massmedia