ຄະນະຮັບຜິດຊອບນຳທ່ຽວຂອງສຳນັກຂ່າວ ຊາຍນາເດລີ (China Daily) ໄດ້ນຳພາຄະນະສື່ມວນຊົນ ຈາກນາໆປະເທດ ຍ່າງເລາະລຽບ ທ່ຽວຊົມພາບເມືອງເກົ່າ ໄປຕາມຖະໜົນ ສຸຍເຊຖິງ ເຂດພື້ນທີ່ປະຫວັດສາດໝິງຟູ້ເສີງ ໃນສະໄໝລາຊະວົງໝິງ ( ຄສ 1368-1644) ເຊິ່ງເປັນອີກສະຖານທີ່ໜຶ່ງຂອງເຂດເມືອງເກົ່າສ້າງຕັ້ງຂຶ້ນໃນປີ ຄສ 1971 ຢູ່ທີ່ນີ້ປະກອບມີບໍ່ນ້ຳພຸຫຼາຍກວ່າ 100 ບໍ່ທີ່ມີຢູ່ຕາມລຳຄອງ ແລະ ໜອງນ້ຳຍາວຢຽດໄປຕາມເດີ່ນບ້ານ. ທີ່ລະນຶກທາງປະຫວັດສາດທີ່ຍັງຫຼົງເຫຼືອໄວ້ຢູ່ທີ່ນີ້ແມ່ນປະກອບມີວັດວູ່ຢູ,ຟູຮຸ່ຍ,ຫໍຄອຍຈິວຫົວ ແລະ ປະຕູເມືອງບູຮານ. ສິ່ງທີ່ເກົ່າແກ່ໄປກວ່ານັ້ນຄື: ຖະໜົນເກົ່າຫຼາຍກວ່າ 10 ເສັ້ນ ສ້າງຂຶ້ນໃນສະໄໝລາຊະວົງຖັງ ( ຄສ 618-907) ທີ່ອອ້ມຮອບໄປດ້ວຍເຮືອນບູຮານ ໂດຍສະເພາະເຂດອາຄານປະຫວັດສາດເສີນເໝິນ ທີ່ໄດ້ຮັບລາງວັນຊະນະເລີດການປະກວດໃນສະໄໝລາຊະວົງຊິງ ( ຄສ 1644-1912), ລວມທັງໂບດກາໂຕລິກເກົ່າ ແລະ ໂຮງລະຄອນ.

ຈາກນັ້ນ ຄະນະພວກເຮົາໄດ້ຢ້ຽມຊົມສະຖານທີ່ປະຫວັດສາດໄບ້ຫົວຈູ ແລະ ວັດທະນະທຳພາບພິມ ເປັນເຂດສາທິດ ທີ່ຍັງອະນຸລັກປົກປັກຮັກສາສະຖາປັດຕະຍະກຳເກົ່າແກ່ດັ້ງເດີມ ແລະ ການຟື້ນຟູປັບປຸງໃໝ່. ໃນນີ້ຍັງປະກອບມີເຂດພື້ນທີ່ບັນເທີງ,ເຂດວາງສະແດງວັດທະນະທຳ,ເຂດວິຖີຊີວິດແບບພື້ນບ້ານ,ເຂດພື້ນທີ່ການຄ້າ ແລະ ການທ່ອງທ່ຽວ ເຊິ່ງອຳນາດການປົກຄອງທ້ອງຖິ່ນກຳລັງວາງແຜນຕົກແຕ່ງສິ່ງເກົ່າແກ່ບູຮານດັ່ງກ່າວໃຫ້ເໝືອນຫວນກັບຄືນໄປຫາອະດີດຢູ່ໃນຍຸກສະໄໝເກົ່າ ເຊິ່ງລວມມີການສະແດງສາທິດໜັງປະຫຼັດຕື້,ເຄື່ອງປັ້ນດິນເຜົາ,ງານເແກະສະຫຼັກໄມ້ທີ່ຜະລິດເຄື່ອງຂອງທີ່ລະນຶກ, ວິຖີຊີວິດພື້ນບ້ານ, ສາທິດການຂຽນຕົວໜັງສືຈີນ,ຫ້ອງສະສົມປຶ້ມຄວາມຮູ້ຕ່າງໆ,ຫໍພິພິທະພັນ ແລະ ຫໍສິລະປະພື້ນບ້ານ.

ພ້ອມນີ້ຍັງມີການຝຶກອົບຮົມງານຫັດຖະກຳແບບດັ້ງເດີມທີ່ສະທ້ອນໃຫ້ເຫັນເຖິງ 126 ມໍລະດົກວັດທະນະທຳທີ່ບໍ່ມີຕົວຕົນ ແລະ ງານຫັດຖະກຳແບບດັ້ງເດີມທີ່ໄດ້ຮັບການການຖ່າຍທອດລົງໃນພາບພິມທີ່ມີປະມານ 2.000 ຊິ້ນ ທີ່ສືບທອດກັນມາ 100 ຊົ່ວຄົນ. ງານຫັດຖະກຳສີໄມ້ລາຍມືຢູ່ທີ່ນີ້ຍັງປະກອບໄປດ້ວຍສິ່ງປະດິດຕົວລະຄອນໜັງປະຫຼັດຕື້, ສິ່ງປະດິດຈາກເຈ້ຍ ແລະ ງານແກະສະຫຼັກໄມ້ປະເພດຕ່າງໆ. ການຝຶກອົບຮົມຍັງເປີດໂອກາດໃຫ້ທຸກຄົນທີ່ສົນໃຈເຂົ້າໄປສຶກສາຮຽນຮູ້ລ້າໆໂດຍບໍ່ເສຍຄ່າ ເລີ່ມແຕ່ເວລາ 8ໂມງເຊົ້າຫາ 9 ໂມງແລງ.ເປົ້າໝາຍຂອງກິດຈະກຳກໍ່ເພື່ອສ້າງລຸ້ນສືບທອດທາງດ້ານສິລະປະ,ວັດທະນະທຳຕໍ່ກັບການດຳລົງຊີວິດຂອງຊຸມຊົນ.

ໂດຍ: ມົນທຽນ
Medialaos Massmedia