ພະແນກສຶກສາທິການ ແລະ ກິລາສະເຫຼີມສະຫຼອງວັນຄູແຫ່ງຊາດ 7 ຕຸລາ

0
492

ໃນຕອນເຊົ້າວັນທີ 4 ກັນຍາ 2019 ຢູ່ທີ່ ພະແນກສຶກສາທິການ ແລະ ກິລາແຂວງສະຫວັນນະເຂດ ຈັດພິທີສະເຫຼີມສະຫຼອງວັນຄູແຫ່ງຊາດ 7 ຕຸລາ 2019 ຄົບຮອບ 25 ປີ ໂດຍການເປັນປະທານຂອງທ່ານ ຄູນຄຳ ຣາຊະພົນ ຮອງຫົວໜ້າພະແນກສຶກສາທິການ ແລະ ກິລາແຂວງ, ມີບັນດາຄະນະພະແນກສຶກສາແຂວງ, ພະນັກງານບຳນານ, ອຳນວຍການໂຮງຮຽນ, ຄູອາຈານ ແລະ ນ້ອງນັກຮຽນອ້ອມຂ້າງແຂວງສະຫວັນນະເຂດເຂົ້າຮ່ວມ.
ກ່ອນໄຂພິທີຢ່າງເປັນທາງການບັນດາແຂກທີ່ເຂົ້າຮ່ວມກໍ່ໄດ້ຮັບຊົມການສະແດງສິລະປະວັນນະຄະດີຈາກນ້ອງນັກຮຽນໂຮງຮຽນ ກິນນອນຊົນເຜົ່າ, ໂຮງຮຽນ ມສ ອຸດົມວິໄລ ແລະ ໂຮງຮຽນ ມປາຍ ໂພນສະຫວັນ ຈາກນັ້ນ ທ່ານ ຄູນຄຳ ຣາຊະພົນ ກໍ່ໄດ້ຫວນຄືນຄວາມໝາຍຄວາມສຳຄັນຂອງວັນຄູແຫ່ງຊາດ ແລະ ຜົນງານຂອງວຽກງານການສຶກສາ ແລະ ກິລາແຂວງ ສົກ 2018-2019 ວ່າ:

ມວນມະນຸດໄດ້ມີການພັດທະນາຕົນເອງໃຫ້ກ້າວໜ້າຂຶ້ນຢ່າງບໍຢຸດຢັ້ງ ຊຶ່ງໄດ້ເຮັດໃຫ້ສັງຄົມມະນຸດໄດ້ມີການປ່ຽນແປງຈາກລະບອບສັງຄົມນີ້ ໄປສູ່ສັງຄົມອື່ນ ໃນຂະບວນວິວັດພັດທະນາການດັ່ງກ່າວ ຄູໄດ້ມີບົດບາດປະສ່ວນອັນສຳຄັນ ທີ່ບໍມີໃຜ ແລະ ຊັ້ນຄົນໃດຈະປະຕິເສດໄດ້ ຄູໝາຍເຖິງຄົນທີີ່ມີຄວາມຮູ້ ແລະ ປະສົບການ ຊຶ່ງສາມາດນຳໄປຖ່າຍທອດຄວາມຮູ້ ແລະ ປະສົບການນັ້ນໄປສູ່ຜູ້ອື່ນໆ. ຮູບການຖ່າຍທອດຄວາມຮູ້ຈາກຜູ້ຮູ້ໄປສູ້ຜູ້ບໍຮູ້ ເອີ້ນວ່າ ການຮຽນການສອນ ການສອນ ແລະ ການຮຽນເປັນປັດໃຈສຳຄັນໜຶ່ງໃນການຕັດສິນຄຸນນະພາບຂອງການສຶກສາ ກໍຄືການພັດທະນາມະນຸດ ທຸກຄົນມີຄວາມຮູ້ໂດຍຜ່ານຂະບວນການສອນຂອງຄູ ແລະ ທຸກຄົນລ້ວນແຕ່ມີຄູສອນຕົນເອງ. ສໍາລັບວຽກງານສຶກສາທີ່ພົ້ນເດັ່ນໃນປີ 2019ນີ້ ທົ່ວແຂວງມີໂຮງຮຽນຝາກເດັກ ແລະ ໂຮງຮຽນອະນຸບານທັງໝົດ 544 ແຫ່ງ, ທຽບໃສ່ປີຜ່ານມາເພີ່ມຂຶ້ນ 18 ແຫ່ງ, ໂຮງຮຽນປະຖົມ 1.237 ແຫ່ງ ໃນນັ້ນເອກະຊົນ 19 ແຫ່ງ, ໂຮງຮຽນມັດທະຍົມ 234 ແຫ່ງ ໃນນັ້ນ ມັດທະຍົມຕົ້ນ 134 ແຫ່ງ, ທຽບໃສ່ປີຜ່ານມາເພີ່ມຂຶ້ນ 3 ແຫ່ງ, ຜົນການສອບເສັງຊັ້ນມັດທະຍົມຕອນປາຍທົ່ວປະເທດສາມາດຍາດໄດ້ ອັນດັບທີ 3 ວິຊາ ພາສາລາວ-ວັນນະຄະດີ ແລະ ອັນດັບທີ 3 ວິຊາ ເຄມີ, ໄດ້ອັນດັບທີ 2 ໃນການແຂ່ງຂັນຖາມຕອບວິທະຍາສາດ ແລະ ຄວາມຮູ້ຮອບໂຕ ແລະ ວຽກງານອື່ນໆອີກກໍ່ໄດ້ຈັດຕັ້ງປະຕິບັດໄປພ້ອມໆກັນ
ສຸດທ້າຍໃນພິທີ ກໍ່ຍັງມີການມອບ-ຮັບໃບຍ້ອງຍໍສັນລະສັນຈາກ ກະຊວງສຶກສາທິການ ແລະ ກິລາ, ໃບຍ້ອງຍໍຂອງທ່ານເຈົ້າແຂວງສະຫວັນນະເຂດ ແລະ ຈາກພະແນກສຶກສາທິການ ແລະ ກິລາແຂວງ ໃຫ້ພະນັກງານ ຄູອາຈານທີ່ມີຜົນງານ, ຄຸນງາມຄວາມດີໃນການເຄື່ອນໄຫວວຽກງານການສຶກສາ.

Medialaos Massmedia