ວິທີຫຼຸດຜ່ອນຄ່າໄຟໃນບ້ານ

0
352

ວິທີປະຢັດໄຟໃນບ້ານ ແລະ ບອກລາບິນຄ່າໄຟແພງໃນໄລຍະລະດູຮ້ອນ ມາເບີ່ງກັນວ່າເຮົາສາມາດຊ່ວຍປະຢັດໄຟດ້ວຍວິທີປະຢັດໃນບ້ານໄດ້ແນວໃດ? ທ້າຍເດືອນເທື່ອໃດກໍ່ມີບິນຄ່າໃຊ້ຈ່າຍທີ່ຕ້ອງຈ່າຍໄລຍະຍາວ ຫຼັກໆ ຄ່ານ້ຳ, ຄ່າໄຟ ແລະ ຄ່າໂທລະສັບມືຖື ແຕ່ມີໃຜສັງເກດໂຕເລກບິນຄ່າໃຊ້ຈ່າຍເລົ່ານີ້ບໍ່? ວ່າໃນທຸກໆ ເດືອນບິນຄ່າໃຊ້ຈ່າຍສູງຂື້ນເລື້ອຍໆ ໂດຍສະເພາະຄ່າໄຟ ທີ່ສູງຂື້ນເລື້ອຍໆ ສະນັ້ນຢ່າຢູ່ເສີຍໆ ເຮົາມາຊ່ວຍກັນຫຼຸດຜ່ອນຄ່າໄຟໃນບ້ານດ້ວຍວິທີປະຢັດໄຟໃນບ້ານຕໍ່ໄປນີ້ກັນເລີຍ.

ຫຼຸດຜ່ອນການໃຊ້ແອ: ບ້ານໃດທີ່ມີແອກໍ່ຄວນເປີດໃຊ້ແອເທົ່າທີ່ຈຳເປັນ ເຊັ່ນ: ເປີດໃນມື້ທີ່ຮູ້ສຶກຮ້ອນແທ້ໆ ອີກຢ່າງຄວນເປີດແອໃນອຸ່ນນະພູມທີ່ເໝາະສົມ ໂດຍເປີດແອ 27 ອົງສາກໍ່ພໍ ແລະ ໃຊ້ພັດລົມຊ່ວຍ ຊື່ງຈະຊວຍປະຢັດໄຟໄດ້ດີຫຼາຍ, ແຕ່ຖ້າທ່ານເປັນຄົນທີ່ນອນບໍ່ຫຼັບຫາກບໍ່ເປີດແອ ກໍ່ປ່ຽນມາເປິດແອໄລຍະ 1-2 ຊົ່ວໂມງທໍາອິດກ່ອນຈະນອນຫຼັບກໍ່ໄດ້ຕັ້ງເວລາປິດແອເອົາໄວ້ໃຫ້ຮຽບຮ້ອຍ ແລະ ຢ່າລືມສໍາຫຼວດເບີ່ງປ່ອງຢ້ຽມປະຕູ ແລະ ຊ່ອງຫວ່າງທຸກບ່ອນໃນຫ້ອງນອນນຳແດ່ ພຽງແຕ່ນີ້ກໍ່ຊ່ວຍປະຢັດໄຟໄດ້ດີຫຼາຍ.

ຫຼີກເວັ້ນການໃຊ້ເຄື່ອງດູດຝຸ່ນ: ຖ້າບ້ານໃດບໍ່ໄດ້ລ້ຽງສັດ ແລະ ປົກກະຕິກໍ່ບໍ່ຄ່ອຍມີຝຸ່ນຫຼາຍປານໃດ ກໍ່ສາມາດຫຼີກເວັ້ນຈາກການໃຊ້ເຄື່ອງດູດຝຸ່ນ ທຸກໆ ອາທິດ ມາເປັນດູດຝຸ່ນ 2-3 ຄັ້ງຕໍ່ເດືອນກໍ່ໄດ້ ວິທີນີ້ກໍ່ຊ່ວຍຫຼຸດປະລິມານການໃຊ້ໄຟໃຫ້ທ່ານໄດ້ຫຼາຍເຊັ່ນກັນ.

ຖອດປັກໄຟທຸກໆເທື່ອຫຼັງຈາກບໍ່ໄດ້ໃຊ້ວຽກ: ພຽງແຕ່ປິດສະວິດໄຟຟ້າ ກໍ່ບໍ່ໄດ້ໝາຍຄວາມວ່າຈະເປັນການຕັດກະແສໄຟຟ້າເລີຍ ເພາະຖ້າປັກຍັງສຽບຢູ່ ນັ້ນກໍ່ໝາຍຄວາມວ່າຍັງມີກະແສໄຟວົນວຽນ ເພື່ອໃຫ້ເຮົາເປີດໃຊ້ວຽກເຄື່ອງໃຊ້ໄຟຟ້າໄດ້ໂດຍທັນທີ ໂດຍສະເພາະຄົນທີ່ມັກເປີດໂມດພັກໜ້າຈໍຄອມພິວເຕີໄວ້ ພຽງ 1 ຊົ່ວໂມງກໍ່ສູນເສຍກະແສໄຟບໍ່ຮູ້ເທົ່າໃດຕໍ່ເທົ່າໃດແລ້ວ ແລະ ໃນເມື່ອຮູ້ຢ່າງນີ້ແລ້ວ ກໍ່ຄວນຖອດປັກເຄື່ອງໃຊ້ໄຟຟ້າທີ່ບໍ່ໄດ້ໃຊ້ວຽກອອກທູກໆ ເທື່ອຈະເປັນການດີທີ່ສຸດ.

ເລືອກໃຊ້ຫຼອດໄຟຟູອໍເລສເຊັນສ໌ (ຫຼອດໄຟປະຢັດພະລັງງານ): ຫຼອດໄຟຟູອໍເລສເຊັນສ໌ມີລາຄາແພງກ່ວາຫຼອດໄຟຊະນິດອື່ນກໍ່ແມ່ນ ເພາະຫຼອດໄຟຟູອໍເລສເຊັນສ໌ ສາມາດຊ່ວຍປະຢັດໄຟໄດ້ຫຼາຍກ່ວາຫຼອດໄຟຊະນິດອື່ນ ເຖີງ 75% ແຖມຍັງມີອາຍຸການໃຊ້ງານຍາວກ່ວາ ຫຼື ເວົ້າງ່າຍໆ ວ່າມີຄວາມທົນທານຫຼາຍພໍສົມຄວນ.

ຊັກລີດເຄື່ອງນຸ່ງຫົ່ມໃນເວລາດຽວກັນ: ຈັກຊັກເຄື່ອງ ແລະ ເຕົາລີດເປັນອຸປະກອນໄຟຟ້າທີ່ກິນໄຟຫຼາຍຄືກັນ ດັ່ງນັ້ນຫາກເຮົາຊັກລີດເຄື່ອງນຸ່ງຫົ່ມ ກໍ່ຄວນຊັກລີດເສື້ອຜ້າຫຼາຍໆ ບາດດຽວ ຫຼື ຢ່າງໜ້ອຍ 2ເທື່ອຕໍ່ອາທິດກໍ່ໄດ້ ວິທີນີ້ຈະຊ່ວຍໃຫ້ເຮົາປະຢັດໄຟໄດ້ຫຼາຍ ທ່ານໃດທີ່ມັກລີດເສື້ອຜ້າຕອນເຊົ້າ ຄວນປ່ຽນພຶດຕິກຳດ່ວນ.

ໃຊ້ອຸປະກອນເອເລັກໂຕຼນິກໃຫ້ໜ້ອຍລົງ: ບັນດາເຄື່ຶອງປັ່ນ, ເຕົາໄມໂຄເວັບ, ໝໍ້ແດງ, ເຕົາອົບ ຈັດວ່າເປັນເຄື່ອງໃຊ້ໄຟຟ້າປະເພດສີ້ນເປືອງ ທີ່ກິນໄຟຟ້າບໍ່ໜ້ອຍເລີຍທີດຽວ ສະນັ້ນຫາກເປັນໄປໄດ້ລອງຫຼຸດຜ່ອນການໃຊ້ວຽກເຄື່ອງໃຊ້ໄຟຟ້າເຫຼົ່ານີ້ເບີ່ງ ແລ້ວມາປຽບທ-ຍຈາກຄ່າໄຟທ້າຍເດືອນກັນດີກ່ວາ.

ຈັດການຕູ້ເຢັນໃຫ້ສະອາດ ແລະ ເປັນລະບຽບ: ໃຜທີ່ມັກສະສົມຂອງກິນໄວ້ໃນຕູ້ເຢັນ ສຸດທ້າຍກໍ່ລືມກິນ ແລະ ຖີ້ມໄວ້ໃຫ້ເນົ່າຄາຕູ້ເຢັນ ຮູ້ບໍ່ວ່າພຶດຕິກຳແບບນີ້ເປັນສ່ວນໜື່ງທີ່ເຮັດໃຫ້ໂຕເລກໃບບິນຄ່າໄຟສູງ ຢ່າງບໍ່ໜ້າເຊື່ອ ອີກຢ່າງຍັງເຮັດໃຫ້ຕູ້ເຢັນຂອງທ່ານ ເປື້ອນ ເປັນບ່ອນສະສົມພະຍາດ ແລະ ແບັດທີເລຍ ສົ່ງຜົນກະທົບຕໍ່ສຸຂະພາບຮ່າງກາຍໄດ້ງ່າຍໆ ອີກດ້ວຍ.

ມອດໄຟທີ່ບໍ່ໄດ້ຢູ່: ຫຼາຍຄົນມັກເປີດໄຟທົ່ວບ້ານ ເພາະຢາກໃຫ້ບ້ານແຈ້ງສະຫວ່າງ ແຕ່ຖ້າຫາກໄດ້ເຫັນໃບບິນຄ່າໄຟຕອນທ້າຍເດືອນແລ້ວກໍ່ຄົງຕົກໃຈໄປຫຼາຍເຕີບ ສະນັ້ນປິດໄຟດວງທີ່ບໍ່ໄດ້ໃຊ້ວຽກຈະດີກ່ວາ ແລ້ວອອກຈາກບ້ານທຸກເທື່ອ ກໍ່ຄວນສໍາຫຼວດຮອບບ້ານວ່າມີໄຟດວງໃດທີ່ເປີດຄ້າງຢູ່ຫຼື ບໍ່ ຄ່າໄຟໃນບ້ານຈະໄດ້ບໍ່ແພງ.

ລົງທຶນຕິດຕັ້ງເຊັນເຊີຈັບການເຄື່ອນໄຫວ: ສຳລັບໃຜທີ່ມັກຫຼົງມັກລືມ ອາດຈະລົງທຶນຄັ້ງໃຫຍ່ ກັບການຕິດຕັ້ງເຊັນເຊີຈັບສັນຍານການເຄື່ອນໄຫວໄວ້ຮອບບ້ານກໍ່ໄດ້ ໂຕເຊັນເຊີນີ້ຈະຊ່ອຍເປີດເຄື່ອງໃຊ້ໄຟຟ້າໃຫຍ່ໆ ໃນບ້ານເວລາທີ່ມີຄົນເຂົ້າມາ ແລະ ຢູ່ໃນຫ້ອງນັ້ນ ແຕ່ຫາກໂຕເຊັນເຊີຈັບການເຄື່ອນໄຫວຂອງຄົນບໍ່ໄດ້ ກໍ່ຈະຈັດການປິດໄຟ ແລະ ເຄື່ອງໃຊ້ໄຟຟ້າໃຫ້ອັດຕະໂນມັດ.

ໃຜທີ່ກັງວົນກັບຄ່າໄຟສູງເລື້ອຍໆ ກໍ່ທົດລອງເຮັດຕາມວິທີປະຢັດໄຟທີ່ເຮົາແນະນຳກັນໄດ້ ຮັບຮອງວ່າຄ່າໄຟໃນບ້ານຈະຫຼຸດລົງແນ່ນອນ.