ວັນທີ 01 ຕຸລາ 2019 ນີ້; ສະມາຊິກສະພາແຫ່ງຊາດປະຈໍາເຂດເລືອກຕັ້ງທີ 13 ແລະ ສະມາຊິກສະພາແຂວງ ສະຫັວນນະເຂດ ໄດ້ລົງເຄື່ອນໄຫວວຽກງານຢູ່ເມືອງ ອາດສະພັງທອງ. ເຊິ່ງນໍາໂດຍ ທ່ານ ເກດແກ້ວ ສີຫາລາດ ຮອງປະທານກໍາມາທິການເສດຖະກິດແຜນການ ແລະ ກວດສອບສະພາແຫ່ງຊາດ ພ້ອມຄະນະ, ແລະ ສະມາຊິກສະພາປະຊາຊົນແຂວງສະຫວັນນະເຂດໄດ້ລົງເຄື່ອນໄຫວວຽກງານຢູ່ເມືອງອາດສະພັງທອງ. ໂດຍພາຍໃຕ້ການຕ້ອນຮັບຢ່າງອົບອຸ່ນຂອງທ່ານ ອຸໄພວັນ ໄຊຍະວົງ ເຈົ້າເມືອງອາດສະພັງທອງພ້ອມດ້ວຍຄະນະ, ມີເລຂາຄະນະພັກຮາກຖານກຸ່ມບ້ານທີ 7 ດົງນາຂາມ, ນາຍບ້ານໃນ 5 ບ້ານທີ່ຂຶ້ນກັບກຸ່ມຄືບ້ານ: ດົງນາຂາມ, ນາຫຼັກ, ດົງໝາກກໍ, ນາແຜກ ແລະ ນາຄໍາໃຕ້ ຕະຫຼອດຮອດປະຊາຊົນກໍ່ໄດ້ຕ້ອນຮັບນໍາດ້ວຍ.

ໃນການລົງເຄື່ອນໄຫວວຽກງານຢູ່ທີ່ເມືອງ ອາດສະພັງທອງ ໃນຄັ້ງນີ້; ທ່ານ ເກດແກ້ວ ສີຫາລາດ ຮອງປະທານກໍາມາທິການເສດຖະກິດແຜນການ ແລະ ກວດສອບສະພາແຫ່ງຊາດ ພ້ອມຄະນະ, ແລະ ສະມາຊິກສະພາປະຊາຊົນແຂວງສະຫວັນນະເຂດ ກໍ່ໄດ້ຮັບຟັງການລາຍງານບົດລາຍງານໂດຍຫຍໍ້ຂອງກຸ່ມບ້ານທີ 7 ດົງນາຂາມ ຈາກທ່ານ ຕຽງຄໍາ ພຸດທະວົງເລຂາຄະນະພັກຮາກຖານກຸ່ມບ້ານທີ 7 ດົງນາຂາມ ແລະ ຮັບຟັງຂໍ້ສະເໜີຈາກປະຊາຊົນເປັນຕົ້ນກໍ່ແມ່ນເລື່ອງເຂົ້າກິນ, ແນວພັນເຂົ້າ ແລະ ຂໍທຶນ ຊົນລະປະທານຕື່ມດ້ວຍ. ຈາກນັ້ນ; ໃນໂອກາດດັ່ງກ່າວນີ້; ສະມາຊິກສະພາແຫ່ງຊາດ ກໍ່ໄດ້ຜັດປ່ຽນກັນຂື້ນໂອ່ລົມໂດຍໄດ້ຖາມໄຖ່ກ່ຽວກັບສຸກທຸກໃນບັນຫາໄພພິບັດນໍ້າຖ້ວມໃນກຸ່ມບ້ານ ແລະ ຍັງໄດ້ຮຽກຮ້ອງໃຫ້ປະຊາຊົນບັນດາເຜົາກຸ່ມບ້ານທີ 7 ດົງນາຂາມຈົ່ງເອົາໃຈໃສ່ກ່ຽວກັບແບບແຜນການດໍາລົງຊີວິດ ແລະ ຮຽກຮ້ອງໃຫ້ເອົາໃຈໃສ່ທາງດ້ານປະກົດການຫຍໍ້ທໍ້ໃນສັງຄົມໃຫ້ມີຄວາມສະຫງົບປອດໄພຕື່ມອີກດ້ວຍ. ນອກນັ້ນ; ກໍ່ຍັງໄດ້ນໍາເອົາບໍລິໂພກຈໍານວນໜຶ່ງເປັນຕົ້ນກໍ່ແມ່ນໝີ່ ແລະ ນໍ້າມາມອບໃຫ້ແກ່ກຸ່ມບ້ານທີ 7 ດົງນາຂາມ. ນອກຈາກນັ້ນ; ທາງການນໍາຂັ້ນເມືອງ ອາດສະພັງທອງ ກໍ່ຍັງໄດ້ມອບເຄື່ອງຊ່ວຍເຫຼື່ອບັນເທົາທຸກໃນຂັ້ນເບື່ອງຕົ້ນໃຫ້ແກ່ 5 ບ້ານຄື: ດົງນາຂາມ, ນາຫຼັກ, ດົງໝາກກໍ, ນາແຜກ ແລະ ນາຄໍາໃຕ້ ບ້ານລະ 1.000.000 ກີບໃຫ້ກຽດມອບໂດຍທ່ານ ອຸໄພວັນ ໄຊຍະວົງ ເຈົ້າເມືອງ ອາດສະພັງທອງ ໃຫ້ກຽດມອບຢ່າງສົມກຽດໂດຍຊ່ອງໜ້າກັບບັນດາທ່ານ ແລະ ປະຊາຊົນທີ່ເຂົ້າຮ່ວມເປັນສັກຂີພິຍານນໍາດ້ວຍ.

ພາບຂ່າວ: ນັກຂ່າວເມືອງ ອາດສະພັງທອງ.