ກອງປະຊຸມໃຫຍ່ຄັ້ງທີ VII ຂອງຜູ້ແທນອົງຄະນະພັກ ເມືອງ ຊຽງຮ່ອນ, ແຂວງ ໄຊຍະບູລີ ໄດ້ໄຂຂຶ້ນຢ່າງເປັນທາງການໃນຕອນເຊົ້າວັນທີ 7 ຕຸລາ 2019 ນີ້, ທີ່ສະໂມສອນໃຫຍ່ຂອງເມືອງດັ່ງກ່າວ, ໂດຍເປັນປະທານຂອງ ສະຫາຍ ບຸນລ້ວນ ຊົມສີຫາປັນຍາ ກໍາມະການພັກແຂວງ, ເລຂາພັກເມືອງ, ເຈົ້າເມືອງ ຊຽງຮ່ອນ, ເຂົ້າຮ່ວມເປັນກຽດໂດຍ ສະຫາຍ ພົງສະຫວັນ ສິດທະວົງ ກໍາມະການສູນກາງພັກ, ເລຂາຄະນະບໍລິຫານງານພັກແຂວງ, ເຈົ້າແຂວງ ໄຊຍະບູລີ, ມີປະທານສະພາປະຊາຊົນແຂວງ, ມີຄະນະປະຈຳພັກແຂວງ, ກຳມະການພັກແຂວງ, ຄະນະປະຈຳພັກເມືອງ, ກຳມະການພັກເມືອງ, ມີພະນັກງານອາວຸໂສບຳນານ, ມີນັກທຸລະກິດ, ຜູ້ປະກອບການ, ແຂກຮັບເຊີນຈາກເມືອງອ້ອມຂ້າງເຂົ້າຮ່ວມເກືອບ 200 ສະຫາຍ, ໃນນີ້ ມີຜູ້ແທນສົມບູນທີ່ມາຈາກຄະນະພັກຮາກຖານ ແລະ ໜ່ວຍພັກທົ່ວເມືອງ103 ສະຫາຍ, ຍິງ13 ສະຫາຍ ທີ່ເປັນຕົວແທນໃຫ້ແກ່ສະມາຊິກພັກທັງໝົດໃນທົ່ວເມືອງ 1.401 ສະຫາຍ, ຍິງ 376 ສະຫາຍ.

ກອງປະຊຸມໃຫຍ່ຜູ້ແທນຄັ້ງນີ້ແມ່ນໄດ້ພ້ອມກັນທົບທວນຕີລາຄາຄືນຜົນງານ ແລະ ໄຊຊະນະທີ່ຍາດມາໄດ້, ຍົກໃຫ້ເຫັນຈຸດອ່ອນຂໍ້ຄົງຄ້າງ ແລະ ສະຫຼຸບຖອດຖອນບົດຮຽນໃນການຈັດຕັ້ງປະຕິບັດແນວທາງນະໂຍບາຍຂອງພັກ ແລະ ມະຕິກອງປະຊຸມໃຫຍ່ຄັ້ງທີ VI ຂອງອົງຄະນະພັກເມືອງໃນໄລຍະ 5 ປີຜ່ານມາ ແລະ ພ້ອມກັນກຳນົດທິດທາງຄາດໝາຍຍຸດທະສາດແຕ່ລະດ້ານໃນການປົກປັກຮັກສາ ແລະ ພັດທະນາເມືອງຊຽງຮ່ອນແຕ່ນີ້ຮອດປີ 2024, ໂດຍລວມແລ້ວເມືອງ ຊຽງຮ່ອນ ແມ່ນມີການປ່ຽນແປງຢ່າງຕັ້ງໜ້າເປັນຕົ້ນແມ່ນ: ສາມາດຮັກສາສະຖຽນລະພາບທາງດ້ານການເມືອງ, ມີຄວາມສະຫງົບ ແລະ ມີຄວາມເປັນລະບຽບຮຽບຮ້ອຍດ້ານສັງຄົມໂດຍພື້ນຖານ, ເສດຖະກິດ, ວັດທະນະທໍາ-ສັງຄົມໄດ້ຮັບການພັດທະນາຢ່າງຕໍ່ເນື່ອງ, ຊີວິດການເປັນຢູ່ຂອງປະຊາຊົນບັນດາເຜົ່າໄດ້ຮັບການຊຸກຍູ້ສົ່ງເສີມນັບມື້ດີຂື້ນ, ເສດຖະກິດຂະຫຍາຍຕົວໃນລະດັບ 15, 33 % ຕໍ່ປີ ລວມຍອດມູນຄ່າຜະລິດຕະພັນພາຍໃນບັນລຸ 532,49 ຕື້ກີບ, ສະເລ່ຍໃສ່ຫົວຄົນໜຶ່ງໄດ້ 15,64 ລ້ານກວ່າກີບ, ເທົ່າກັບ 2.058 ໂດລາສະຫະລັດ ທຽບໃສ່ປີ 2014 ເພີ່ມຂຶ້ນ 789 ໂດລາສະຫະລັດ, ກະສິກໍາຂະຫຍາຍຕົວ 12,35%, ອຸດສາຫະກໍາຂະຫຍາຍຕົວ 14,68% ແລະ ການບໍລິການຂະຫຍາຍຕົວ 24,89%, ການສົ່ງອອກສິນຄ້າບັນລຸ 9,28 ລ້ານກວ່າໂດລາສະຫະລັດ, ການຊົມໃຊ້ໄຟຟ້າຂອງປະຊາຊົນກວມ 100%, ອັດຕາເຂົ້າຮຽນຊັ້ນປະຖົມ ບັນລຸ 99,9%, ມັດທະຍົມຕົ້ນ 82,4%, ມັດທະຍົມປາຍ 45,8%, ອັດຕາການຊົມໃຊ້ນ້ຳສະອາດກວມເອົາ 83%, ອັດຕາການຊົມໃຊ້ວິດຖ່າຍ 94%, ທົ່ວເມືອງມີບ້ານວັດທະນະທຳແລ້ວ 30 ບ້ານ ແລະ 1 ກົມກອງ, ມີແຫຼ່ງທ່ອງທ່ຽວທັງໝົດ 11 ແຫ່ງ, ມີນັກທ່ອງທ່ຽວເຂົ້າມາທ່ຽວຊົມທັງໝົດ 4.092 ຄົນ, ສ້າງບ້ານແບບຢ່າງປະຕິບັດກົດໝາຍໄດ້ 41 ບ້ານ, ບ້ານພັດທະນາ ມີ 25 ບ້ານ ແລະ ຮັບຮອງບ້ານແຮງງານ ແລະ ສະຫວັດດີການສັງຄົມ ໄດ້ 2 ບ້ານ, ກອງປະຊຸມຄັ້ງນີ້ຍັງຈະໄດ້ປ່ອນບັດເລືອກຕັ້ງເອົາຄະນະບໍລິຫານງານພັກເມືອງຊຸດທີ VII, ເລືອກຕັ້ງເອົາຄະນະປະຈໍາພັກເມືອງ, ເລຂາ, ຮອງເລຂາ ແລະ ປະທານ, ຮອງປະທານກວດກາພັກ, ເພື່ອສືບຕໍ່ຊີ້ນຳ-ນຳພາເມືອງຊຽງຮ່ອນໃຫ້ກ້າວຂຶ້ນຢ່າງບໍ່ຢຸດຢັ້ງ ດ້ວຍຜົນງານ ແລະ ໄຊຊະນະໃໝ່ຍິ່ງໃຫຍ່ກ່ວາເກົ່າ, ພ້ອມທັງດໍາເນີນການປ່ອນບັດຄັດເລືອກເອົາຜູ້ແທນທີ່ເປັນຕົວແທນໃຫ້ແກ່ອົງຄະນະພັກເມືອງໄປຮ່ວມກອງປະຊຸມໃຫຍ່ຄັ້ງທີ VII ຂອງອົງຄະນະພັກແຂວງ, ກອງປະຊຸມຄັ້ງນີ້ ຍັງຈະໄດ້ຮັບຟັງການໂອ້ລົມຂອງ ສະຫາຍ ພົງສະຫວັນ ສິດທະວົງ ແລະ ຈະໄດ້ດຳເນີນໄປເປັນເວລາ 2 ວັນຈິ່ງຈະສຳເລັດ.

ຂ່າວ-ພາບ: ອຸ່ນເຮືອນ ໂພທິລັກ.
MEDIALAOS