ຫ້ອງການສາທາລະນະສຸກ ເມືອງສະໜາມໄຊ ແຂວງອັດຕະປື ກໍເປັນອີກໜ່ວຍງານໜຶ່ງ ທີ່ໄດ້ຮັບຜົນກະທົບຈາກນໍ້າຖ້ວມ ຜ່ານມາ ເຊິ່ງມາຮອດປັດຈຸບັນ ໄດ້ມີການເອົາໃຈໃສ່ແກ້ໄຂ ແລະ ຄວມຄຸມພະຍາດລະບາດຫລັງນໍ້າແຫ້ງລົງ. ພ້ອມທັງໂຄສະນາແນະນໍາ ໃຫ້ພໍ່ແມ່ປະຊາ ຊົນປະຕິບັດ ຕາມລັກການອານາໄມຢູ່ສະອາດ, ກິນສະອາດ ແລະ ດື່ມສະອາດ.

ທ່ານ ສົມພອນ ເຄນນະລາດ ຫົວໜ້າຫ້ອງການສາທາລະນະສຸກ ເມືອງສະໜາມໄຊ ໃຫ້ຮູ້ວ່າ: ພະຍາດຕ່າງໆ ທີ່ເກີດຂຶ້ນໃນໄລຍະນໍ້າຖ້ວມ ເຫັນວ່າບໍ່ຮ້າຍແຮງ ສາມາດ ແກ້ໄຂໄດ້ສໍາເລັດ ໂດຍສະເພາະຫ້ອງການ ສາທາລະນະສຸກເມືອງ ໄດ້ສົ່ງແພດໝໍຈາກໂຮງໝໍເມືອງ ລົງສົມທົບກັບສຸກສາລາ ເຄື່ອນໄຫວກວດກາ ແລະ ເຝົ້າລະວັງ ການລະບາດຂອງພະຍາດຕ່າງໆ ພ້ອມທັງໂຄສະນາສຸຂະສຶກສາ ຢູ່ແຕ່ລະບ້ານ ເພື່ອໃຫ້ປະຊາຊົນເອົາໃຈໃສ່ ຮັກສາອານາໄມ 3 ສະ ອາດ ທັງເອົາໃຈໃສ່ ທໍາລາຍແຫລ່ງເພາະພັນຂອງຍຸງລາຍ. ພ້ອມນີ້ ຍັງໄດ້ສົມທົບກັບສຸກສາ ລາອີກ 8 ແຫ່ງພາຍໃນເມືອງ ແລະ ອົງການປົກຄອງບ້ານນໍາພາປະຊາຊົນ ອະນາໄມສຸກສາ ລາ ເພື່ອໃຫ້ການ ບໍລິການດ້ານສຸຂະພາບ ໃຫ້ກັບຄືນສຸສະພາບປົກກະຕິໂດຍໄວ ແລະ ສືບຕໍ່ເຄື່ອນໄຫວໂຄສະນາສຸຂະສຶກສາ ໃຫ້ປະຊາຊົນເຂົ້າໃຈ ວິທີຮັກສາສຸຂະພາບ ແລະ ປ້ອງກັນ ພະຍາດຕ່າງໆ.

ທ່ານ ສົມພອນ ເຄນນະລາດ ໃຫ້ຮູ້ຕື່ມວ່າ: ໄພພິບັດປີນີ້ໄດ້ເຮັດໃຫ້ສຸກສາລາ 8 ແຫ່ງຖືກນໍ້າຖ້ວມ ແລະ 3 ແຫ່ງຖືກຖ້ວມໜັກ, ອຸປະກອນການແພດ ຈໍານວນໜຶ່ງ ເສຍຫາຍໃນນັ້ນ ໄລ ຍະນໍ້າຖ້ວມນີ້ພະຍາດ ທີ່ມັກເກີດຂຶ້ນມີຫລາຍກໍລະນີ ເຊັ່ນ: ເປັນໄຂ້ຫວັດ 350 ກວ່າຄົນ, ຖອກທ້ອງ 150 ກວ່າຄົນ, ໄຂ້ຍຸງລາຍ 300 ກວ່າຄົນ, ອັກເສບປອດ 120 ກວ່າຄົນ ແລະ ເປັນພະຍາດຕຸ່ມເປື່ອຍຈໍານວນໜຶ່ງ. ທ່ານ ສົມພອນ ເຄນນະລາດ ໃຫ້ຮູ້ຕື່ມວ່າ: ສໍາລັບສິ່ງທີ່ຂາດເຂີນ ໃນການ ເຄື່ອນໄຫວ ວຽກງານຫ້ອງການ ສາທາລະນະສຸກເມືອງໃນປັດຈຸບັນ ແມ່ນອຸປະກອນການແພດ ແລະ ພະນັກງານແພດໝໍໄປປະຈໍາຢູ່ໃນແຕ່ລະສຸກສາລາ ທີ່ຍັງບໍ່ທັນ ພຽງພໍສ່ວນຫລາຍ ຈະເປັນອາສາໝັກ.

#Medialaos #Massmedia