ໃນວັນທີ 04 ຕຸລາ 2019 ທີ່ຜ່ານມານີ້ ແຂວງອຸດົມໄຊ ໄດ້ນຳເງິນສົດມູນຄ່າ 100.000.000 ກີບ ມອບໃຫ້ກະຊວງແຮງງານ ແລະ ສະຫວັດດີການສັງຄົມ (ຮສສ) ເພື່ອໃຫ້ກະຊວງນຳໄປຈັດຕັ້ງປະຕິບັດໃນວຽກແກ້ໄຂໄພນ້ຳຖ້ວມໃນ ແຂວງພາກກາງ ແລະ ພາກໃຕ້ ໂດຍຕາງໜ້າການນຳຂັ້ນແຂວງມອບແມ່ນ ທ່ານ ຄຳພຽງ ຢາຈົງວາ ຮອງເລຂາພັກແຂວງ, ຮອງເຈົ້າແຂວງອຸດົມໄຊ ປະທານຄະນະກຳມະການປ້ອງກັນ ແລະ ຄວບຄຸມໄພພິບັດຂັ້ນແຂວງ (ຄປພຂ) ແລະ ຕາງໜ້າກະຊວງຮັບແມ່ນ ທ່ານ ນາງ ໃບຄຳ ຂັດທິຍະ ຮອງເລຂາຄະນະພັກກະຊວງ, ຮອງລັດຖະມົນຕີກະຊວງ ຮສສ ທັງເປັນຮອງປະທານຄະນະກຳມະການປ້ອງກັນ ແລະ ຄວບຄຸມໄພພິບັດແຫ່ງຊາດ. ພ້ອມນັ້ນ, ຍັງມີໜ່ວຍງານທີ່ກ່ຽວຂ້ອງຂອງກະຊວງເຂົ້າຮ່ວມ.

ທ່ານ ຄຳພຽງ ຢາຈົງວາ ກ່າວວ່າ ສຳລັບເງິນສົດ ຈຳນວນ 100.000.000 ກີບ ທີ່ນຳມາມອບເທື່ອນີ້ແມ່ນໄດ້ຈາກການລະດົມການປຸກລະດົມວັດຖຸປັດໃຈ ແລະ ເງິນສົດ ນຳບັນດາພະນັກງານ, ທະຫານ, ຕຳຫຼວດ, ບໍລິສັດ, ລັດວິສາຫະກິດ, ພໍ່ຄ້າຊາວຂາຍ ແລະ ພໍ່ແມ່ປະຊາຊົນທົ່ວແຂວງອຸດົມໄຊ ປະກອບສ່ວນຊ່ວຍເຫຼືອຟື້ນຟູຜູ້ປະສົບໄພນ້ຳຖ້ວມຢູ່ 2 ແຂວງພາກກາງ ແລະ 4 ແຂວງພາກໃຕ້ ຂອງລາວ ເພື່ອເຮັດໃຫ້ຜູ້ປະສົບໄພນ້ຳຖ້ວມເຫຼົ່ານັ້ນມີຊີວິດການເປັນຢູ່ທີ່ດີຂຶ້ນ ແລະ ໄດ້ຮັບການແກ້ໄຂໂດຍໄວ ເພື່ອທີ່ພວກເຂົາເຫຼົ່ານັ້ນຈະສາມາດກັບມາໃຊ້ຊີວິດໄດ້ຢ່າງເປັນປົກກະຕິ. ພ້ອມດຽວກັນນີ້ ບໍລິສັດແຟເຊັດພັດທະນາແຫຼ່ງທ່ອງທ່ຽວທຳມະຊາດ ຈຳກັດ ໄດ້ມອບເຄື່ອງອຸປະໂພກ-ບໍລິໂພກ ມູນຄ່າ 22.000.000 ກີບ.

ທ່ານ ນາງ ໃບຄຳ ຂັດທິຍະ ກ່າວວ່າ ພາຍຫຼັງທີ່ເກີດເຫດ ກະຊວງ ຮສສ ໄດ້ຮັບມອບໝາຍຈາກລັດຖະບານ ເຊິ່ງກໍໄດ້ຕັ້ງໜ້າປະຕິບັດພາລະບົດບາດຂອງກະຊວງເລີ່ມແຕ່ມື້ເກີດໄພພິບັດມາ ຮອດປັດຈຸບັນແມ່ນຍັງສືບຕໍ່ຂົນສົ່ງເຄື່ອງພ້ອມທັງສະໜອງງົບປະມານທີ່ຈຳເປັນໃຫ້ກັບບັນດາ 6 ແຂວງ ເປັນຕົ້ນ: ເງິນສົດ, ເຄື່ອງອຸປະໂພກ-ບໍລິໂພກ ເພື່ອສົ່ງໃຫ້ກັບແຂວງທີ່ຍັງຈຳເປັນຮີບດ່ວນ. ດັ່ງນັ້ນ, ການປະກອບສ່ວນຂອງແຂວງອຸດົມໄຊ ແລະ ແຟເຊັດພັດທະນາແຫຼ່ງທ່ອງທ່ຽວທຳມະຊາດ ຈຳກັດ ເທື່ອນີ້ແມ່ນຈະໄດ້ນຳໄປຊ່ວຍເຫຼືອປະຊາຊົນຜູ້ປະສົບໄພນ້ຳຖ້ວມດັ່ງກ່າວນັ້ນໃຫ້ເກີດປະໂຫຍດສູງສຸດ.

ຂ່າວ: ບຸນສີບີ້
MEDIALAOS